شنگال: گروپێكی نەناسراو هەڕەشەی كوشتنی ژنان دەكەن

تاسیری بۆگەنی ئیسلامی لە سەر ئیزیدیەکان

شنگال: گروپێكی نەناسراو هەڕەشەی كوشتنی ژنان دەكەن

وارڤین – شنگال: لە پەرەسەندنێكی مەترسیداردا گروپێكی نەناسراو لەژێر ناوی ئاینی (ئێزدی)دا لە رێگەی بڵاڤۆكێكەوە، هەڕەشەی كوشتن لەو ژنانە دەكەن كە لە فەرمانگە رەسمی و ناوەندە خزمەتگوزاری و حزبییەكاندا كار دەكەن.

ئەو گروپە نەناسراوە ناویان لە خۆیان ناوە (مەفرەزەی شا تاووس) لە شارۆچكەی (شنگال) (هەڵكەوتوو لە دووری (120كم) لە باكووری خۆرئاوای موسڵ)، بوونی خۆیان راگەیاندووە.

لە یەكەم بلاڤۆكیاندا ناوی (15) ژنیان بڵاوكردووەتەوە، كە لە فەرمانگە حكومی و بنكە حزبییەكاندا كار دەكەن و هەڕەشەی كوشتنیان لێكردوون.

لە لێدوانێكی تایبەت بۆ (وارڤین) بەرپرسی نوسینگەی بەرەنگاربوونەوەی توندوتیژی دژ بە ژنان لە شنگال مولازمی یەكەم (فەلاح  حەسەن) رایگەیاند، ئێمە ئامادەكاری پێویستمان كردووە بۆ پاراستنی گیانی هەر ژنێك كە لەلایەن ئەو جۆرە گروپانەوە كەوتووەتە بەر هەڕەشە و كار بۆ پارێزگاریكردن لە ژنان دەكەین چ لە ماڵەوە بن یان لە كاتی كاركردندا بن و رێككاری یاسایی بەرامبەر هەر جۆرە دەستدرێژییەك بەرامبەر بە ژنان دەگرینە بەر.

گوتیشی: "ئێمە ئامادەین پاسەوان بۆ ئەو ژنانە دابین بكەین كە كەوتوونەتە بەر هەڕەشەی ئەو گروپەی بەناوی پیرۆزییە ئاینییەكانەوە هەڕەشە لە ژنان دەكات".

سەبارەت بە سوود وەرگرتن لە پیرۆزییە ئاینییەكانی ناوچەكە بۆ ترساندن و هەڕەشەكردن لە ژنانی شنگال، لە لێدوانێكی تایبەت بۆ (وارڤین) پیاوی ئاینی ئێزدی (شێخ علۆ) رایگەیاند، جێگەی سەرسامییمانە كە هەندێك كەس بەناوی ئاینەوە هەڕەشە لە ژنان دەكەن، لەكاتێكدا ئەوان لە ژنان لەدایكبوون.

هه‌روه‌ها گوتی: "تاووسی فریشتە خاوەنی مەفرەزە و كەسانێك نییە و نەبووە كە كار بۆ كوشتنی ژنان بكەن، بەڵكو بە پێچەوانەوە ئەو فریشتەیە ئامۆژگاری گەلەكەی كردووە پارێزگاری لە ژنان بكەن و لەو بارەیەوە، زۆرێك لە وتە و نزای تایبەتی ئایینی هەن".

ئەو زانا ئێزدییە بەڵگەنامەیەكی ئاینیی خستەڕوو، كە تێیدا هاتووە: "ئاینی ئێزدی كوشتنی ژنان و هەر چەشنە توندتیژییەك بەرامبەریان قەدەغە دەكات و بەكارهێنانی ناوی شا تاووس و سووكایەتیكردنە بەو پادشایە و پێگە ئاینییە گەورەكەی لە ئێزدیاتیدا".

ئەو گوتیشی: "دوو كچم دەرچووی زانكۆن و ئەگەر كچان بخوێنن و دابمەزرێن دەبنە خاوەن كەسایەتی خۆیان و پارێزگاری لە خۆیان دەكەن و بە گوێرەی رێنماییەكانی ئاینی ئێزدی ژنان هاندەدرێن بخوێنن، هەربۆیە بڵاوكردنەوەی ئەو جۆرە بڵاڤۆكانە دوور و نزیك پەیوەندی بە ئێزدییەوە نییە و ئەوە مەسەلەیەكی سیاسییە و كەسانێك هەن دەیانەوێت لە رێگەی هەڕەشە و ترساندنەوە كچان لە خوێندن داببڕن و دەیانەوێت ژنانی ئێزدی نەزان و نەخوێندەوار بن".

بڵاڤۆكەكە لە ناوەندی ئاینی ئێزدیدا پرسیار و تێڕامانی بەدوای خۆیدا هێناوە و تەنانەت هاووڵاتیان و دانیشتوانی ناوچە ئێزدینشینەكان تووشی سەرسامی بوونە لە بوونی گروپێكی لەو شێوەیە و ئەو جۆرە كارە بە یەكەم كاری لەو شێوەیە دێتە هەژمار لە مێژووی ئاینەكەیاندا.

(شێخ علۆ) لەبارەی خۆ راگەیاندنی ئەو گروپەوە لەو بڕوایەدایە، ئەو گروپە بیانەوێت لە رێگەی بەكارهێنانی ناوی ئاینیی و سیمبوڵەكانی ئەو ئاینەوە خەڵكی ناوچەكە هانبدەن بۆ ژنكوشتن و داواشیكرد، دانیشتوانی ناوچە ئێزدینشینەكان دان بە خۆیاندا بگرن و نەچنە ژێر باری ئەو جۆرە بانگەشانەوە.

ئا: بەرەكات عیسا

http://warvin.org/dreja.aspx?=hewal&jmara=1453&Jor=1

///////////////

مێردەكەم دوای سێ مانگ تەڵاقیدام و گوتی من ژنێكم دەوێ كەمئەندام نەبێت

وارڤین – كەركووك: "باوكمان مرد، دایكمان شوویكردەوە، زڕباوكمان ژیانی لێتاڵ كردین، بە 15 ساڵی منی بە شوودا، پاش ماوەیەك بەبیانوی ئەوەی من ئیشی ناوماڵم پێ ناكرێ ئەو پیاوە تەڵاقی دام، دوای دەساڵ شووم بەكوڕێكی هاوشێوەی خۆم كرد، ئەویش دوای (3) مانگ تەڵاقی دام، پێی وتم: من ژنێكم دەوێ ساغ بێت، تۆ كەمئەندامی ناتوانی ئیدارەی خێزانەكەم بكەی". ئەمە قسەی (ژاڵە عەلی) تەمەن (25 ساڵ)ە.

"ژن بوون تاوانە"

توێژی خاوەنپێداویستییە تایبەتییەكان لە كەركووك لە ئازار و مەینەتییدا دەژین و ئەوان نیگەرانن لەوەی تا ئێستا بە شێوەیەكی جدی ئاوڕ لە ژیانییان نەدراوەتەوە و لەناو ئەو توێژەشدا ژنانی خاوەن پێداویستی تایبەت نیگەرانییەكانییان زیاترە لە پیاوانی خاوەن پێداویستی تایبەت و خەریكە نائومێد دەبن لە ژیان، وەك (ژاڵە عەلی) گوتی: "كچ بوون لەم ژیانە خۆی تاوانە؛ جا خاوەن پێداویستی تایبەتیش بی، گوناحە بژی".

(ژاڵە) بەهۆی ئەوەی بەمنداڵی تەنكی بەسەردا بەربۆتەوە قاچێكی لە جێ دەرچووە،  وەك خۆی گوتی: "بەهۆی هەژاریەوە دایك و باوكم نەیان توانیووە چارەسەرم بكەن، تائێستاش ناتوانم بەباشی بڕۆم".

"بە پانزە ساڵی منی بە شوودا"

(ژاڵە) باسە پڕ ئازارەكانی ژیانی لە نسێی داروبارە چڕەكەی حەوشەی ماڵی دایكیدا دەگێڕایەوە و جار بە جار كە دڵی پڕ دەبوو، فرمسێكی پڕ لە نائومێدی بە چاویدا دەبارین. ئەو كاتەی ئەو دەگریا هەستت دەكرد، ژنانی خاوەن پێداویستی تایبەت چ حەسرەتێكیان لە دڵدایە، ژیان چەند بێمانایە كاتێك ژنێك لە ئاسمان و زەویدا بێ پشتیوان دەمێنێتەوە و كەفوكۆی دڵی بێكەسی، بە گریان دادەمركێنێ.

"كاتێ منداڵبووین، باوكمان مرد، دایكمان شوویكردەوە بۆ ئەوەی ئێمە بێكەس نەبین  و كەس لۆمەی دایكم نەكات و لە دەمودووی خەڵك پارێزراو بێت و چەترێكمان هەبێت و سایەی بەسەرمانەوە بێت، بەڵام زڕباوكەكەم، هەر زوو بوو بە دوژمن، ژیانی لێ تاڵ كردین،  هەر بە 15 ساڵی منی دا بە ژن بۆ براكەم و هەرچی ناڕەزاییم دەربڕی سوودی نەبوو"، (ژاڵه)‌ گوتی.

"گاڵتەیان بە رێڕۆیشتنم دەكرد"

ئەو ژنە بەهۆی ئەوەی لە كاتی رۆیشتندا پێی كورتی هێناوە، رێڕۆیشتنی بووەتە جێی تانە و تەشەری كەسانی نزیكی ماڵی هاوسەرەكەی و تەنانەت خودی هاوسەرەكەشی وەك ناوو و ناتۆرە بە وشە زبرەكانی هەستی بریندار كردووە.

ئەو گوتی: "پاش ماوەیەك بەبیانووی ئەوەی من ئیشی ناوماڵم پێناكرێت، پیاوەكەم تەڵاقیدام، هەمیشە گاڵتەیان بەرۆیشتن و كارەكانم دەكرد.."، ئەمەی گوت؛ چاوەكانی پڕبوون لەفرمێسك، لە لچكێكی سەرپۆشە رەشەكەی چاوەكانی سڕی.

"تۆ كەمئەندامی"

بەردەوام بوو لەسەر گێڕانەوەی بەسەرهاتە تاڵەكانی ژیانی، ئەو وەك خۆی دەیوت بە دەربڕینی خەمەكانی كڵوكۆی دەروونی دادەمركایەوە و درێژە دا و  گوتی:"دوای دەساڵ شووم بەكوڕێكی وەك خۆم خاوەنپێداویستی تایبەت كرد، دەمویست كاریش بكەم و هەردووكمان بەیەكەوە بژین و وام دانابوو هەموو ژیانم تەرخانبكەم بۆ ئەوەی ئەویش بژێنم، خزمەتی بكەم، لە دەستی برا ژن دەربازم بێت،  بەڵام قەدەری من رەشتر بوو لەوەی بیرم لێدەكردەوەبەمن بەخشیووم دوای (3) مانگ ئەویش تەڵاقیدام پێ وتم من ژنێكم ئەوێ ساغ بێت، ببێتە خاوەن ماڵەكەم، تۆ كەمئەندامی ناتوانی ئیدارەی خێزانەكەم بكەی".

بەسەرهاتەكان دواییان نایێ

بەسەرهاتی ئەو ژنانەی كە خاوەنپێداویستی تاییەتن كۆتایی ناێیت و ئەوان بە ئاواتەوەن حكومەت ئاوڕیان لێبداتەوە و كۆمەڵگە بە چاوی مرۆڤبوونەوە بۆیان بڕوانێت و چیدیكە لەبەر ئەوەی لە پێویستییەكی جەستەیان بێبەشن، لە هەموو ژیان بێ بەش نەكرێن.

(هێرۆ) چاوە رەشەكانی پڕن لە ئومێد، كاتێك لە نزیكەوە لەگەڵی دادەنیشی هەست بەوە ناكەیت ئەو خاوەن پێداویستی تایبەت بێت، لە ناو ماڵێكی گەورەدا و لەگەڵ دوو خوشكی وەك خۆی خاوەنپێداویستی تایبەت ژیان دەگوزەرێنن.

(هیرۆ عەبدولڕەحمان) تەمەن (26 ساڵ)، لە تەمەنی (15) ساڵییەوە تووشی نەخۆشی ئیفلیجی بووە، ئەو ناتوانێ رێبكات, كۆمەڵیك ئارەزووی لە خەیاڵدا چنیووە، ئومێدی بەژیانە، دەیەوێ رۆژێك بێت قاچەكانی چاك بێتەوە، بگەڕێتەوە بۆ دۆخی ئاسایی جارانی، بەیادی رابردوو،  لەگەڵ هاوتەمەن و دەستەخوشكەكانی گەڕەك سەرگوزشتەی ژیان بهۆنێتەوە.

"لە پانزە ساڵیدا تووشبووم"

(هیرۆ)  خەون وئارەزووەكانی بۆ (وارڤین) باسكردو گوتی: " بەهۆی ئەوەی دایكم و باوكم ئامۆزان خوێنیان یەكجۆرە،  تەنها خوشك و برایەكم لەخێزانەكەمان تەندروست و باشن ئەوانیدیكە، دەگەنە (15 ساڵ) تووشی شەلەل دەماغ دەبین, (هیرۆ) زیاتر لەسەر ژیانی گوتی: "تەمەنم (15 ساڵ) بوو لە پڕتووشی ئیفلیجی بووم، نەمتوانی بە پێیەكانی خۆم بڕۆم, رۆژ بەرۆژ پێیەكانم لاواز دەبن".

ئەو هەرچەندە بێزارە لە رەوشی ژیانی، بەڵام وەك خۆی گوتی :"كاتەكانم دابەشكردووە و دەخوێنمەوە و گوێ لەرادیۆ دەگرم".

بیر لە ژیانمان بكەنەوە

ئەو كچە هەمیشە هاوڕێی رادیۆ و كتێبەكانیەتی، جگە لە وان كەسێك نیە، كاتەكانی لەگەڵ (هێرۆ) بەسەر بەرێ و گوێ بۆ خەم و  ئاوازی پێكەنینەكانی بگرێ هیرۆ لەبارەی رێكخراوەكانی كەمئەندامان گوتی: "گەر مرۆڤی ئاسای ژیانی لەم شارە پارێزراو نەبێت، كەواتە ئەی كەمئەندام چی بكات".

گوتیشی: "هیواخوازم بیر لە ژیانی كەمئەندامان بكەنەوە، لە چوار دیواری ماڵ دەربازمان بكەن، هیچ نەبێ ئێمەش مرۆڤین دەمانەوێ دەورووبەرەكەمان بناسین پەیوەندی كۆمەڵاتیمان هەبێت".

لە لێدوانێكی تایبەت بۆ (وارڤین) لێپرسراو لقی كەركوكی كۆمەڵەی رۆژ، (هێمن محەممەد) رایگەیاند، لە سنووری پارێزگای كەركووك (175) ئەندامی كۆمەڵەكە لە رەگەزی مێینەن.

گوتیشی: "ئێمەوە وەكو رێكخراوەكەمان هەوڵی زۆر جدیمان داوە بۆ دابینكردنی ژیانی  باش بۆیان، هەمیشە گوێمان بۆ داواكارییەكانی ئەو توێژە گرتووە، توانیومانە لەرێگەی تۆڕی چاودێری خێزانەوە یارمەتی مانگانە بۆ بەشێكیان دابینبكەن، بەڵام بەداخەوە بەگشتی كەمئەندامان لە مافەكانیان بێبەشن  لەچواردیواری ماڵ زیاتر شوێنێك نیە كاتەكانیان تێیدا بەسەربەرن".

گوتیشی: "تائیستاش هاووڵاتیان بەچاوی بەزەییەوە دەڕواننە خاوەن پێداویستییە تایبەتەكان و داواكاریشین، ئیدارەی پارێزگای كەركووك زیاتر گرنگی بە ژیانی كەمئەندامان بدات".

براژنەكانی چارەیان ناوێت

زۆرن ئەو ژنانەی وەك (ژاڵە) ژیانیان پرە لە ناسۆر و تا ئێستا دەرفەتی دركاندنی راستییەكانیان نییە، بێ كەس و بێ دەر ناچارن پەنا بەرنە بەر شوێنەكانی تایبەت بە پەنادانی ژنانی هەڕەشە لێكرا و بێ نەوا.

ژاڵە ئێستا بێ ماڵ و حاڵە، لە پەناگەیەكی ژنان لە شاری سلێمانی ژیان بەسەر دەبات و مانگی جارێك دێتەوە كەركووك و سەردانی ماڵی دایكی دەدات، "براژنەكانم نایانەوێ من بچمە ماڵیان، مانگی جارێك دێم، سەرێك لەدایكە حەسرەت دیدەكەم دەدەم و دەگەڕێمەوە بۆ لای هاوخەمەكانم".

ئا: نێرگز قادر

وارڤین

/////////////////////////

پەیمان حوسێن: پرسی ژنانی كەركووك لە لایەن بەغدا و هەولێرەوە فەرامۆشكراوە

وارڤین – كەركووك: چالاكوانی بواری ژنان و لێپرسراوی ئافرەتانی پارتی پارێزگاران لە شاری كەركووك (پەیمان حوسێن) كە وەك راگەیاندنكارێكیش بەرنامەی تایبەت بە پرسەكانی ژنی لە رادیۆی (دەنگی سەربەخۆیی)پێشكەش كردووە و ئەندامی چەندین كۆنگرەی وەك (ژن و بەشداری سیاسی)،(داخوازینامەی ژنی كورد)، بووە. لە گفتوگۆیەكی تایبەت بە (وارڤین) ئەو ژنە چالاكوانە رەوشی ژنانی كەركووك دەخاتەڕوو.

وارڤین: دوای چەند ساڵێك كاركردنتان لە كەركووك خوێندنەوەتان بۆ رەوشی ئێستای ژن لە كەركووك چۆنە و ئێوە وەكو رێكخراوێكی ژنان ئەو رەوشە چۆن هەڵدەسەنگێنن؟

پەیمان حوسێن: له دوای پرۆسەی ئازادی عێراقەوە رەوشی ژنانی كەركووك گۆڕانكاری و پێشكەوتنی بە خۆیەوە بینیوە، بەڵام وەك پێویست نەبووە. چونكە دانیشتوانی ئەم شارە جۆرێك لە داخراویان پێوە دیارە، هۆكاری ئەوەش دەگەڕێتەوە بۆ ئەو ستەمەی پێشوو، كە حكومڕانیەكی زۆر توندوتیژیانەی دەرحە‌ق بە خەڵكی ئەنجامداوە، هەروەها ژنان پێویستە زیاتر خۆیان هۆشیار بن تاوەك بە مافەكانی خۆیان ئاشنا ببن.

وارڤین: لە دوای (2003)ەوە رێكخراوەكانی ژنان لە شاری كەركووك كار دەكەن، رێگرییەكانی بەردەم كاری رێكخراوەیی ژنان چییە و تا چەند توانیوتانە وەك پێویست كار بكەن؟

پەیمان حوسێن: هۆكار زۆرن بۆ رێگریكردن لەبەردەم كاری رێخراوەكان، بۆنموونە گەر بتەوێ داواكاری وپێشنیازت هەبێت بۆ پرسەكانی ژن لە كەركووكدا، یان بتەوێت پرۆژەیەك ئەنجامبدەیت ماندوبونێكی زۆری دەوێت، هەروەها دەبێت سەرجەم نوێنەری رێكخراوەكان لە پێكهاتەكانی شارەكە بەشداربن ئەوكات رەزامەندی بۆكارەكە وەردەگریت، هەروەها هەندێ كاتیش وەك پێویست نیە، چونكە ئەو نوێنەرانە بەشدارنابن یاخود ئامادەییان تێدا نیە كاربكەن ئەمەش دەبێتە گرفت لەو بابەتەی دەتەوێت بە ئەنجامی بگەیەنیت.

وارڤین: لە كەركووكدا تا ئێستا شەڵتەرێك بۆ پەنادانی ژنانی هەڕەشەلێكراو نییە، ئەمە تا چەندە كاریگەری نەرێنی كردووەتە سەر رەوشی ژنانی شارەكە بە نیاز نین هەوڵی كردنەوەی شەڵتەرێك بدەن بۆ ئەو ژنانەی دەبنە قوربانی توندوتیژ؟

پەیمان حوسێن: بەڵێ بەڕاستی نەبوونی شەڵتەر لە شارێكی وەك كەركووك كاریگەری زۆری هەیە لە رووی بوونی ئەو جۆرە توندوتیژیانەی دەرحەق بە ژنان دەكرێت، هەرچەندە وەك نوێنەری رێخراوەكانی ئافرەتان و ژنان، رێخراوەكانی كۆمەڵی مەدەنی و كەمپینی (نا بۆ كلتوری توندوتیژی لەسەرئافرەتان) چەندینجار داوای زیاد لە شەڵتەرێكمان كردوەو داواكەمان بەرزكردۆتەوە بۆ پارێزگاری كەركووك بەڕێز (د.نەجمەدین كەریم) هەروەها داواكەمان خستۆتە بەردەستی نوێنەرانی شارەكە لە ئەنجومەنی نوێنەران، هەروەها بەڵێنی هاوكاری وكردنەوەی شەڵتەریان داوە بەڵام تا ئێستا جێبەجێنەكراوە، بۆیە هەبوونی شەڵتەر لە شارەكەمان گرنگە وكارێكی پێویستە بۆ ئەو ژنانەی هەڕەشەی كوشتن، یاخود رۆژانە رووبەڕووی توندوتیژی خێزانی دەبنەوە، بۆیە لە پێناو پاراستن و پارێزگاریكردنی گیانیان لە كوشتن وتوندوتیژیەكان بە گشتی شەڵتەر ئەو جێگا گونجاوەیە ژنان پەنای بۆ ببەن تاوەك كێشەكەی چارەسەر دەكرێت.

وارڤین: كاری رێكخراوەیی و هەماهەنگی نێوان رێكخراوەكانی ژنان لە كەركووك لە چ ئاستێكدایە ئایا وەك پێویست لە پێناو سەرخستنی پرسی ژندا توانیوتانە كاری هاوبەش ئەنجام بدەن؟

پەیمان حوسێن: كاری هاوبەش وهەماهەنگی زۆرمان لەگەڵ رێخراوەكان ئەنجامداوە، دەكرێت بڵێم پارساڵ لە ئاستێكی باشدا چەندین جۆر كارمان كردووە چ وەك (كەمپینی نابۆ توندوتیژی لەسەر ئافرەتان) چ وەك پێكهێنانی گروپ بۆ هەر رووداوێك كە بە پێویستمان زانیبێت هەڵوێستی لەسەر وەرگرین، بەڵام  لە ئێستادا كاری هاوبەشمان سستیەكی پێوە دیارە، ئەوەش دەگەڕێنمەوە  بۆ پرسیاری پێشوتان كە رێگری لەبەردەم كارەكانمادا درووست دەبێت، چ لەلایەن بەرپرسانەوە چ وەك لایەنەكان كە نوێنەریان هەیە لەكارە هاوبەشەكاندا بیروبۆچونی لایەنەكان كاریگەریان هەیە لەسەر ئەو رێكخراوانەی سەر بەلایەنەكانن.

وارڤین: لە كەركووك تا ئێستا ئاماری ورد و زانستی لە بارەی حاڵەتەكانی توندوتیژی دژ بە ژنان لەبەر دەستدا نیین، ئێوە وەكو چالاكوانانی ژن ‌لە كەركووك لەو رووەوە چ هەنگاوێكتان ناوە بۆ ئەوەی بتوانن داتا كۆبكەنەوە و لەسەر ئەو ئامارانە بەرنامە و پلانی هاوبەش دابڕێژن و كاری جدی بكەن؟

پەیمان حوسێن: راستە داتایەكی راست و دروست لەبەردەستدا نین ئەوەش دەگەڕێتەوە بۆ نەبوونی بەڕێوبەرایەتی نەهێشتنی توندوتیژی، یاخود نەبوونی شەڵتەر كەئەژماری قوربانیەكان بكات، زۆرجار كوشتن و سوتاندنی ژنان بە شێوازێكی زۆر جیاواز لەلایەن كەسوكاریەوە پەردەپۆش دەكرێت، ئەوەس دەبێتە هۆی نەزانی داتایەكی راست كەپێویست دەكات بخرێتە بەرچاو چ وەك نەخۆشخانەكان یان بەڕێوبەرایەتی پۆلیسی لێ ئاگادار بكرێتەوە، كە پێموایە هاوكاری كردنی ئەو شوێنانەش خۆی لەخۆیدا ئەركێكی مرۆڤانەیە.

وارڤین: تا چەندە پۆلیس و دادگاكانی كەركووك توانیویانە بە لەبەرچاوگرتنی مافەكانی ژن مامەڵە لەگەڵ كەیسەكانی توندوتیژی دژ بە ژنان بكەن؟

پەیمان حوسێن: چەند جارێك هەوڵی ئەوەدراوە، خاڵێك بووە لەداواكاریەكانمان كە لە بەڕێوبەرایەتی پۆلیسی كەركووك بەشی پۆلیسی ژنان هەبێت، وەك چاودێری و لێكۆڵینەوە لە پێناو پاراستنی ئەو ژنانەی دەبردرێنە بنكەكانی پۆلیس ومامەڵە لەگەڵ كەیسەكانیان دەكرێت، چونكە چەندینجار وا روویداوە، كە ژنێك بە هەرجۆرە حاڵەتیك رەوانەی بنكەكانی پۆلیس دەكرێت، لەلایەن پۆلیسەكانەوە "تەعەدایان" لێكراوە لەبڕی ئەوەی ئاسانكاریان بۆ بكرێت كێشەكەیان قوڵتر دەبێت و كۆمەڵگەش بێڕەحمانەو بەجۆرێك كە چەندین بۆچونی  نەشیاو رووبەڕووی ئەو ژنە دەبێتەوە.

وارڤین: كەركووك شارێكی فرە پێكهاتەیە و ماوەی چەند ساڵێكە گیرۆدەی كێشەی تیرۆر بووە، ئایا بوونی ئەو كێشە سیاسیی و ئەمنییەكان چەندە بوونە هۆی پەرەسەندنی دیاردەكانی توندوتیژی دژ بە ژنان؟

پەیمان حوسێن: وەك ئاماژەم پێدا بۆچوونی سیاسی و كەمی ئاسایس وئارامی كاریگەری زۆری هەیە لەسەر پرسەكانی ژنانی كەركووك، بۆ نموونە لەهەر كردەوەیەكی تیرۆرستی كە روویدا ژنەكە باجەكەی دووجار دەدات، چونكە گەر نەبێتە لەدەستدانی خۆی رەنگە هاوسەری یان منداڵی یان سەپەرشتیاری خێزانەكەی لەدەستدەدات، جا چ باوك بێت، یان دایك وبرا بێت لەم حاڵەتەشدا ئەركی ئەو ژنە قورستر دەبێت و بەڕێوبردنی ئەو خێزانە دەكەوێتە سەرشانی لە دابینكردنی هەموو پێداویستیەكانی ماڵ. ئەمەش جۆرێكە لە توندوتیژی كە رووبەڕووی ژنان دەبێتەوە.

وارڤین: پێت وانیە پشتگوێخستنی كەیسەكانی توندوتیژی دژ بە ژنان حكومەت لێی هۆكارەبێت؟

پەیمان حوسێن: حكومەت بە هۆكاری سەرەكی دەزانم لە شارێكی وەك كەركووك بە تایبەتی و ناوچە دابڕاوەكان بە گشتی یاسایەكی ئەوتۆ نیە لە پێناو بەرەنگاربوونەوەو نەهێشتنی توندوتیژیەكان بۆ نموونە لە هەرێمی كوردستان بە خۆشحاڵیەوە چەندین یاسا بڕیاڕی لەسەر دراوە لە پێناو پاراستنی مافەكانی ژنان، یاخود بەڕێوبەرایەتی توندوتیژی هەیە، بەڵام لێرەدا نیە ئێمە وەك (كەمپینی نابۆ كلتوری توندوتیژی لەسەر ئافرەتان) چەند جارێك ئەو داوایەمان بەرزكردۆتەوە بۆ حكومەتی بەغدا، بەڵام مخابن داواكەمان فەرامۆشكراوە، حكومەتی هەرێمی كوردستانیش وەك پێویست نەیانتوانیوە هاوكارمان بن ئەگەر بڵێم لەهەردوو حكومەت فەرامۆشكراوین پرسەكانمان پەراوێز خراوە، بۆ نموونە ئەگەر ئاگاداربن لە كۆنفرانسی (نەتەوەیی ژنی كورد) ئاماژە بە پرسی ژن نەدرا لە كەركووك و ناوچە دابڕاوەكان. كەواتە ئێمە لەهەردوو حكومەتدا تەنها نەهامەتیمان پێبەخشراوە توندوتیژیەكانیش زیاتر رووبەڕوومان بۆتەوە.

وارڤین: بوونی ماڵپەڕێكی هەواڵی تایبەت بە پرسی ژن وەك (ماڵپەری وارڤین) كە رۆژانە رووماڵی توندوتیژییەكانی دژ بە ژنان لە هەرێمی كوردستان و عێراق دەكات بۆ ئەم قۆناغەی كاری ژنان چۆن هەڵدەسەنگێنیت؟

پەیمان  حوسێن: راگەیاندن بە گشتی دەورێكی كاریگەری هەیە بە لەبەر چاوگرتن و خستنەڕووی ئەو توندوتیژیانەی بەرامبەر بە ژنان دەكرێت، من چەند جارێك لە لێدوان و چاوپێكەوتنەكانم ئاماژەم بەوەداوە، كە راگەیاندنەكان وەك پێویست ناچن بەرەوڕووی كێشەكانی ژنانەوە و بەدواداچونی پێویستی بۆ ناكرێت، بەراستی خۆشحاڵم سایتی (وارڤین) ئەم ئەركە قورسەی گرتۆتە ئەستۆو دیاردە و رووداوەكانی ژنان دەخاتەڕوو هیوادارم سەركەوتووبن لە كارەكانتاندا و هەوڵی زیاتر و هەنگاوی باشترو دڵسۆزانەتر بنێن  و نموونەتان زیاتر بێت.

ئا: ژاڵه‌ عه‌زیز

http://warvin.org/dreja.aspx?=hewal&jmara=1411&Jor=28