هەولێر: دوو ژن بەهۆی سووتانەوە ژیانیان لەدەستدا
وارڤین – هەولێر: لە دوو رووداوی خۆ سووتاندندا، ئەمڕۆ پێنجشەممە لە شاری هەولێر دوو ژن بەهۆی سەختی سووتانەكەیانەوە ژیانیان لەدەستدا.
(كوردستان عەبدوڵڵا) تەمەن (22 ساڵ) نیشتەجێی گەڕەكی (كارێزان)، شەوی رابردوو (3 – 4 / تشرینی یەكەم – ئۆكتۆبەر / 2012) لە حەوشەی كراوەی ماڵەكەیاندا سووتا و بەو هۆیەوە گواسترایەوە بۆ نەخۆشخانەی فریاكەوتنی خۆرئاوا و خرایە ژێر چاودێری تەندروستییەوه، پێش نیوەڕۆی ئەمڕۆ، پێنجشەممە (4 / تشرینی یەكەم – ئۆكتۆبەر / 2012) ژیانی لەدەستدا.
بە گوێرەی ئەو زانیارییانەی دەست (وارڤین) كەوتوون، ئەو ژنە لە كاتی وەرگرتنی گوتەیدا لە لایەن پۆلیسی نەخۆشخانەوە رایگەیاندووە، غازی پێدا تەقیوەتەوە و بەو هۆیەوە گڕی گرتووە.
ئەوەش زانراوە كە (كوردستان عەبدوڵڵا) ماوەی ساڵێكە شوویكردووە و ماڵەكەی سەربەخۆ نەبووە و لەگەڵ ماڵی خەزووریدا ژیانی بەسەر بردووە و دایكی منداڵێك بووە، كه‌سوكاری ئه‌و ژنه ره‌تیده‌كه‌نه‌وه هۆكاری كۆمه‌ڵایه‌تی له پشت خۆ سووتاندنی (كوردستان)ه‌وه بووبێت.
هەر لە درێژەی رووداوەكانی ناچاربوونی ژنان بۆ پەنابردنە بەر خۆ سووتاندن، ئەمڕۆ لە گەڕەكی (تەیراوە)ی شاری هەولێر كچێك بەناوی (ساكار شێرزاد) لەدایكبووی (1986) نەوتی بەخۆیدا رێشتووە و ئاگری لە جەستەی خۆی بەرداوە و دوای رووداوەكە كەسوكاری ئەویان گواستووەتەوە بۆ نەخۆشخانەی فریاكەوتنی خۆرئاوای هەولێر.
دوای ئەوەی خرایە ژێر چارەسەری پزیشكییەوە، بەهۆی سەختی سووتانەكەی كە بە رێژەی زیاتر لە (%95) مەزندە كراوە، (ساكار شێرزاد) كات (2:30)ی دوا نیوەڕۆی ئەمڕۆ (4 / تشرینی یەكەم – ئۆكتۆبەر / 2012) ژیانی لەدەستدا.
سەرچاوەیەكی نزیك لە بنەماڵەی ئەو كچە تایبەت بە (وارڤین) رایگەیاند، "(ساكار) بەهۆی باری فیسیۆلۆژییەوە هەستی بە دڵته‌نگی كردووە و ناچار بووە پەنابەرێتە بەر خۆ سووتاندن".
پۆلیس پەڕاوی بۆ هەردوو حاڵەتەكە كردووەتەوە و زانرا، كە هەردوو حاڵەتەكە گوتەیان لێوەرگیراوە، بەڵام سكاڵایان لەسەر كەس تۆمار نەكردووە.
ئا: ئه‌رسه‌لان ره‌حمان
http://warvin.org/dreja.aspx?=hewal&jmara=1446&Jor=9
---------------------------
راگەیاندنی ژمارە ٢ لە (دەستەی دادپەروەریی بۆ مامۆستا ساكار)-ەوە:
وارڤین – هەولێر: (دەستەی دادپەروەریی بۆ مامۆستا ساكار) راگەیاندنی ژمارە (2)ی دەركرد و تێیدا رایدەگەیەنێت: "دەوڵەتی یاسا نابێت بە لۆژیكی شەیتان كار بكات" و رەخنەش لە چەند رۆژنامەیەكی هەرێم دەگرێت كە بە بێ ناوهێنانی سەرچاوە، هەڕەشەی كەسێكیان لە چاكوانانی ژن بڵاو كردووەتەوە.
ئەمەی خوارەوە دەقی راگەیەندراوەكەیە:
راگەیاندنی ژمارە ٢ لە (دەستەی دادپەروەریی بۆ مامۆستا ساكار)-ەوە:
بۆ ئەوەی دەوڵەتی یاسا بە لۆژیكی شەیتان كار نەكات
لە ڕیپۆرتاژێكی ڕۆژنامەی هاوڵاتی-دا ئەو ڕۆژنامەیە ئەوە دەگوازێتەوە كە كەسوكاری مامۆستا ساكاری غەدرلێكراو داوا دەكەن دامودەزگاكانی دەوڵەت و دادگاكان و ڕێكخراوەكان و هەموو خەڵكی عەدالەتخوازی كوردستان واز لە مولاحەقەی یاسایی و خواستی سزادانی تۆمەتبار بهێنن و ئیتر خوێنڕشتنی ئینسانێك ئەوەندە بە گرنگ نەزانن. ئەم داواكارییە بەو ئارگیومێنتەوە دەخەنە بەرچاو كە گوایە «شەیتان وازی لە مامۆستا ساكار هێناوە» و بیری چۆتەوە و، بۆیە دەبێت ڕێكخراوەكانی ژنان و كۆمەڵگای ئێمەش قبوڵی بكەن كە ئاوا هاوڵاتییان لەناو خەودا خەڵتانی خوێن بكرێن و بكوژەكانیش بەبێ حوكم و سزا بێنەوە ناومان.
ئێمە لە (دەستەی دادپەروەریی بۆ مامۆستا ساكار) كە لەپێناو پێداگریی لەسەر بەنرخیی مرۆڤ و گرنگیی هەبوونی دەزگایەكی دادوەریی ئینساندۆست و زیندوو لە هەرێمی كوردستاندا خۆمان ساز داوە، لێرەدا ئەم چەند خاڵەی خوارەوە دەخەینە ڕوو:
١. دەوڵەتی یاسا نابێت بە لۆژیكی شەیتان كار بكات. ئەگەر كەسوكاری مامۆستا ساكار دەیانەوێت بۆ پێداگریی لەسەر ئەوەی كە دەوڵەت لەسەر بنەمای لۆژیكی شەیتان باكی بەوە نەبێت كە هاوڵاتییان بكەونە گیانی یەك و یەكتر بكوژن، خۆپیشاندان دەكەن و داوا لەسەر ڕێكخراوەكان قەید دەكەن و گوشار بۆ دەسەڵاتی حكومیی و دادگاكان دەهێنن، گرنگە دەسەڵات نەكەوێتە ژێر كاركردی گوشارەوە و شكاتی لەو جۆرە و گوشار و خۆپیشاندانی لەو جۆرە بە جیددی وەرنەگرێت و داوای وا شەیتانیی دژ بە دەوڵەتی یاسا و ڕۆحی دادپەروەریی پشتگوێ بخات. هەر كاتێكیش خۆپیشاندانەكان و گوشارەكان دەگەنە ئەوەی كە جادە دابخەن و لە سنووری ئازادیی دەربڕینەوە دەپەڕنەوە بۆ بەری فەوزادروستكردن و ڤاندالیزم، ئەوا گرنگە دەسەڵاتداران سنووریان بۆ دابنێن و نەهێڵن خێڵ و خانەوادە بە كەڵەگایی داوا بكەن كوشتنی ئینسان بە هەند وەرنەگرین.
٢. دەسەڵاتداران دەبێت هەڕەشەكان دژ بە چالاكوانانی بواری مافەكانی ژنان بەجیددی بگرن و مولاحەقەی یاسایی بۆ هەڕەشەكەران بكەن. گرنگە ئیتر كۆمەڵگای ئێمەش لەڕێگای سزادانی هەڕەشەكەرانەوە ئەوە پیشان بدات كە ئیتر لە كوردستانیش قبوڵ ناكرێت هەڕەشەكردن و چاوترساندن وەسیلەیەكی ناو فەزای گشتیی و دێباتی ناو كۆمەڵگا بێت و ئیتر هەڕەشەش وەك دەستوەشاندن سزای هەبێت.
٣. داواكردنی ئەوەی كە دەوڵەتی یاسا پشتگوێ بخەین و لۆژیكی شەیتان بكەینە مەحەك، داوایەكی ئەوەندە ئینسانیی نییە كە ڕۆژنامەیەك بۆ كەسێكی بكاتە هەواڵ و بیكاتە تایتڵی ڕیپۆرتاژێك. پێداگریی چالاكوانانی مافەكانی ژنان لەسەر زەرورەتی سزادانی تاوانبار لەوێوە نییە كە ئاگادار نەبن كە مامۆستا ساكار مافی ژیانی لێسەندراوەتەوە و تەسلیم بە عەدەم كراوە، تا ڕۆژنامەیەك كۆمێنتارێكی وا پووچ بۆ برایەكی مامۆستا ساكار بكاتە سەردێڕ و هەواڵ. پێداگریی ئێمە لەسەر سزادانی تاوانبار پێداگرییە لەسەر ئەو بەهادارییەی ژیانی مرۆڤ كە دەوڵەتی یاسای لەسەر دامەزراوە. ئەگەر خانەوادەی تۆمەتبار ئارگیومێتێكیان هەیە لەسەر ئەوەی كە بۆچی دەبێت ڕۆحی ئینسانێكمان پێ گرنگ نەبێت و بۆچی دەبێت دەوڵەتی یاسا شمولی بكوژی مامۆستا ساكار نەكات، ئەوا ڕۆژنامەكان مافی خۆیانە بۆیان بڵاو بكەنەوە. بەڵام ئەوەی ڕۆژنامەیەك ڕێگە بدات باشیی و خراپیی كاری ئێمەی چالاكوانان بە لۆژیكی شەیتان پێوانە بكرێت، كارێكی وا ڕۆژنامەگەرییەكی وا ناجیدییانەیە كە كاری تابلۆیدیی لە ڕۆحی هاوڵاتییان پێ گرنگترە.
٤. بڵاوكردنەوەی هەڕەشە لە ڕۆژنامەیەكدا بەبێ دیارییكردنی سەرچاوەی دیارییكراو و بەبێ سەلماندنی هەواڵەكە بە دۆكۆمێنت، بەشدارییە لە زەمینەسازیی بۆ هەڕەشە و دەبێت سزای هەبێت. ڕۆژنامەی ئاوێنە بڵاوی دەكاتەوە كە كەسوكاری تۆمەتبار هەڕەشە لە چالاكوانانی مافەكانی ژنان دەكەن، ئەمە بەبێئەوەی بڵێت كێ هەڕەشەكەی كرد و ڕۆژنامەكە چۆن دەتوانێت بیسەلمێنێت كە ئەو كەسە ئەو هەڕەشەیەی كردووە. ئەم جۆرە هەواڵە خزمەتێكی گەورەیە بە كەسی هەڕەشەكەر چونكە هەم هەڕەشەكەی بۆ دەگەیەنێت و هەمیش ئەو خزمەتەی پێدەكات كە ناوی بەنهێنیی بۆ ڕادەگرێت و لە مولاحەقەی یاسایی دەیپارێزێت. ئەم جۆرە ڕۆژنامەگەرییە لە وڵاتانی تر سزای هەیە چونكە یارمەتییدانی هەڕەشەكەر بەوەی ناوی بە نهێنیی بۆ بهێڵیتەوە، گەیاندنی هەواڵ نییە بەڵكو گەیاندنی هەڕەشەیە. ئەم جۆرە ڕۆژنامەگەرییە هەم خەتەری سەر ژیانی چالاكوانان زیاد دەكات و هەمیش كارێك دەكات بۆ چاوترساندن و كۆڵپێدانیان لە چالاكیی. بۆیە ئێمە ڕەخنەی توندمان لەم جۆرە ڕۆژنامەگەرییە هەیە و هیوادارین بۆ ڕێگرتن لەوەی كە كۆمەڵگای ئێمە هەر درێژە بەوە بدات كە لە مەسەلەی كوشتنی ژناندا بە لۆژیكی شەیتان كار بكات نەك دەوڵەتی یاسا، ڕۆژنامەكان ئیتر بە ڕۆحی بەرپرسیارییەتێكی زۆرترەوە كار بكەن.
دەستەی دادپەروەریی بۆ مامۆستا ساكار
4 - 10 - 2012
desteydadperwerii@yahoo.com'
-----------------------
توركیا: ژنێكی كورد حەكیمە
وارڤین – وان: (گوڵیزار ئیلگاز) تەمەن (63 ساڵ) و خەڵكی ناوچەی (وەستان)ی شاری وانه، وێڕای ئەوەی خوێندەواری نییە، تەمەنێكە لە رێگەی گژو گیای سروشتییەوە چارەسەری نەخۆشییەكانی ژنان دەكات و وەك "حەكیمی حاڵزان" سەیری دەكرێت.
(گوڵیزار ئیلگازی) تەمەن (63 ساڵ) و خەڵكی ناوچەی (وەستان)ی شاری وانه، بەهۆی گوشار و راوەدوونانەكانی حكومەتی توركیاوە، نزیكەی (43 ساڵ)ە ئاوارەی شاری (مێرسین)ی توركیا بووە و وێڕای كارزانییەكەی لە بواری بەكارهێنانی گژوگیای سروشتی بۆ دەرمانكردنی نەخۆشی ژنان، ئەو ئەندامی دەستپشێخەری دایكانی ئاشتییه و ئامانجی ئەوەیە ئاشتیی بۆ خەڵك بەدیبهێنرێت.
(ئیلگاز)ی بە هاوكاریكردن و دەستگرۆیی و شارەزایی لە رادەبەدەری خۆی لە بەكارهێنانی گژ و گیای سروشتی ناوبانگی لە ناوچە كوردیی و تەنانەت توركییەكانیشدا بڵاو بووەتەوە.
ئەو لە میانەی لێدوانێكیدا بە (ئەنەفە) رایگەیاندووە، ماوەی زیاتر لە (30 ساڵ)ە وەك حەكیمێكی گەڕۆك كار دەكات و لەو ماوەیەدا توانیویەتی چارەسەری پێویست بۆ زۆر نەخۆشی سەختی ژنان پێشكەش بە نەخۆشەكانی بكات.
س: ئه‌نه‌فه
http://warvin.org
هیچ نظری موجود نیست:
ارسال یک نظر