ڕێـکخراوه‌کانی کوردستان پشـتیوانی و هاوسۆزی خۆیان بۆ زیندانیـیه کورده‌کانی تورکیا ده‌رده‌بڕن
ڕاپـۆرتی عومه‌ر فه‌رهادی دەنگی کوردی ئەمەریکا
له شـاری هه‌ولێر و له هۆڵی هوتێلی چوارچرا، کاژمێر 10 ی پـێشنیوه‌ڕۆی ئه‌مڕۆ یه‌کشه‌ممه 4 ی مانگی یازده، ڕێـکخراوه‌کانی کۆمه‌ڵـگای مه‌ده‌نی و فدراسیۆنی ڕێـکخراوه ناحکومیـیه‌کانی هه‌رێمی کوردسـتان که نوێنه‌رانی ڕێـکخراوه‌کانی هه‌رسێ پارێزگای هه‌رێمی له‌خۆگرتووه، هه‌روه‌ها ڕێـکخراوه‌کانی پارێزگای که‌رکوک، کۆبوونه‌وه‌یه‌کی تایبه‌ت ئه‌نجام درا بۆ ده‌ربڕینی پاڵپـشـتی و هاوسۆزی بۆ زیندانیـیه کورده‌کانی تورکیا که ماوه‌ی 50 ڕۆژ زیاتره مانیان له خواردن گرتووه و داوای ئازادکردنیان ده‌که‌ن، به تایبه‌تی که ژیانی هه‌ندێـکیان له مه‌ترسیدایه به‌م هۆیه‌وه.
هه‌ر به‌م بۆنه‌یه‌وه فدراسیۆنی ڕێـکخراوه مه‌دنیـیه‌کانی کۆیه به‌یانـنامه‌یه‌کیان ڕاگه‌یاند که تیادا ده‌ڵێن له باکوری کوردسـتان بۆ ماوه‌ی 50 ڕۆژ زیاتر له زیندانیـیه‌کانی حکومه‌تی تورکیا برا کورده‌کانمان ده‌سـتیان کردووه به مانگرتن له خواردن و هه‌روه‌ها له شـاره کوردیـیه‌کانی تورکیاش جه‌ماوه‌ری کورد به گه‌رم‌وگوڕی بۆ خۆپـیشـاندان ڕژانه سه‌ر شه‌قامه‌کان بۆ پشـتگیری له براکانیان له گرتووخانه‌کانی حکومه‌تی تورکیا.
ده‌توانن گوێبیستی درێژه‌ی ڕاپـۆرته‌که‌ی عومه‌ر فه‌رهادی په‌یامنێری ده‌نگی ئه‌مه‌ریکا له هه‌ولێر بن.
http://www.dengiamerika.com/content/article/1539094.html
///////////////////
زێدە ڕۆیی لەمتمانە پێدان و زێدە ڕۆیی لە ناحەزی
خوێندنەوەیەکی سۆسیۆ-پۆڵەتیکیانە بۆ ئێستای عێراق.
بەھرۆز جەعفەر ..
عێراق: وڵاتی شۆڕش و کوتاوئاژاوەو یاخیبونەکانە،جەگرافیایەکە مێژووەکەی تراژیدی و تۆقَنەرو خەمھێنەرە،لێرە ھەمیشە تاکی عێراقی حەزێکی دکتاتۆریانەو خۆسەپێنی ھەیە بەسەر ئەوانی تردا،تەنانەت لەسەر گومان خەڵک دەکوژن بۆ تەمێکردنی ئەوانەی دژی گروپگەرایین لەعێراقدا.ڕەنگە فەلسەفە لەعێراقدا لەو پەندەوە دەست پێبکات کە دەڵێت:" لەبری ئەوەی کشی لێبکەیت،قاچی بشکێنە".واتا پێویست ناکات چەند جارێک کش لەمریشکێک بکەیت و قاوی بدەیت،بەڵکو چارەسەری بنجبڕ ئەوەیە قاچی بشکێنیت،تاجارێکی تر توخنت نەکەوێتەوە.
زیادە ڕۆیی،لەمتمانە پێدان و بەیعەتدان و ،دواتر زیادەڕۆیی لە تۆڵەکردنەوەو سەرشۆڕکردن،بەشێکی گرنگە لەئاکارو کەسێتی تاک و کۆمەڵگەی عێراقی،لەمێژوویەکی کۆندا،ئەو خەواریجیانەی ئێمام عەلی یان کوشت،پێشوتر لەھەرە توندترین ھەوادارو لایەنگرو پێڕەوانی بوون.لە سەردەمی نوێشدا زیندوترین نمونە: ھەڵوێستی عەبدولسەلام عارفە،کە یەکەمین کەس بوو دروشمی (ماکو زعیم الا کریم) ی ھێنایە گۆڕێ و داوای کرد.پێدەچێت زۆرێک لەعێراقیەکان تائێستا ئەوە نەزانن کە عەبدولسەلام زۆر شلگیرو سەرگەرم بوو،زێدەڕۆیی دەکرد لەمتمانەو پشتگیری بۆ " عەبدولکەریم قاسم" لەماوەی کاری لیژنەی باڵای ئەفسەرە ئازادیخوازەکاندا.بەڵام لەکۆتاییدا عەبدولکەریم قاسم دەڕوخێنن،قاسم داوا لەسەلام دەکات کە لەفەرمانی لەداردان ئاوارتەی بکاو دەڵێت:" لەدارم مەدە،چونکە من لەدارم نەدایت.".کەچی عەبدولسەلام گوێی بەم تکا برایانەیە نەدا،بەڵکو زێدە ڕۆیی کردو گوللە بارانیان کرد،قاسم ئەوەندە مەردانە لەپێناو دۆزو بۆچونەکانی خۆیدا جەنگا تەنانەت بەچاوی خۆی تەماشای ئەو گوللانەی دەکرد،کەپێوەی دەنران.لەباری زێدەڕۆیی عێراقیەکان بۆ تۆڵەکردنەوە،بینیمان،لەساڵی (٢٠٠٤) تەرمی سەربازە ئەمریکیەکان دوای کوشتنیان لەفەللوجە،دەسوتێراو بەدوای ئۆتومیلدا ڕادەکێشرا.ھەموو ئەمانە سەرەنجامێکی ترسناکی سیاسی ئەدەن بەدەستەوە،ئەویش قەیرانی متمانەی ھێزە ئایدۆلۆجیاکانە بۆ پێکەوە ھەڵکردن،مەگەر ئەوە حەسەن نەبوو وەسیەتی کرد،کەباوکیشی پێی وتووە:" متمانەتان بەخەڵکی کوفە نەبێت،چونکە ھەم باوکیان کوشت و ھەم سوپاکەیان ھەڵوەشاندو،کەرەستەکانیشیان بەتاڵانبرد.".لە مێژووی شیعرو ئەدەبی عێراقیدا یەک شاعیرو روناکبیر نییە دووفاقی نەکردبێت و دوای چەپڵَەلێدان،تفی لەڕێبازەکەی پێشووی خۆی نەکردبێت.بەزەحمەت نەبێت ئەرێ ئەو چەند ملیۆن کەسەی پێشبڕکێیان دەکرد لەچەپڵلێدان و ھوتاف کێشان و قوون بادان بۆ بەرزڕاگرتنی سەرۆک چییان لێھات..؟."باقر یاسین" سەرکردەی رۆشنبیری بەعس،ئەلێت: بەدرێژایی حوکمی بەعس عێراقم بەجێنەھێشتوو،تەنیا پەروەردگار لەعێراقدا چەپڵەی بۆ ێەدام لێنەداوە."ئەرێ ھەر ئەمانە نەبوون لەپەرلەمان دەنگیان بە فیدراڵیەت داو،دواییش لەدەرەوە دەستی یان کرد بەوتار نوسین دژی و لێدوانی توندیان ئەدا،تەنانەت بەشێکی ئەم پەرلەمانتارانەی ئێستا پشتگیری لەمالیکی دەکەن ،پێشووتر لەسەر بنەمای دژایەتی کردنی مالیکی ھاتوونەتە ناو پەرلەمان و دەنگیان ھێناوە.بەڵێ..ئیمامی عەلی ووتی: خەفەت بۆ ئەوکەسەش ئەخۆم کە ھەوڵی ئاشتەوایی لەگەڵ ئەمانە ئەدات.بۆ..؟.ئەو یەکەم کەس بوو کە باسی لێبوردەیی و ئاشتی و برایەتی و شورای دەکرد،بەڵام شکستی گەورەی خوارد،ئەگەرچی ئەم چەمکانە ئەخلاقین و پێویستن،بەڵام تا دێنەدی ڕەنگە عەیامێکی دوورو درێژی گەرەک بێت.بۆیە عێراق ئەو شوێنەیە کەھیچ تاک و سیاسیەک متمانەی بەئایندە نییە،وەکو چۆن شاعیرەکە ووتی:" ھیچ ساغێک بەمزووانە،بەساغی نامێنێتەوە.".ھەر ئەوەندە ھەستی کرد سەرکەوتووە،ئیتر حوکمی ئاگرو ئاسنی حەجاجیانەی خۆی دەست پێدەکا.
ئەم دیاردەیە( متمانەدانی زیاد لەپێویست)،لەناو بزوتنەوەی ڕزگاریخوازی کوردیدا نادیار نییە.لەحەفتاکانی سەدەی پێشوو،بەشێک لەسەرکردەو کادرەکانی کۆمەڵە،بەئەندازەی دەرۆیشی شەیدای ئەندێشەی –ماو- دەبن.کاتێک ماوتیستۆنگ،دەمرێت.ھەریەکەو لەپاڵ تاشە بەردێکدا دەست بەگریان ئەکەن،کاکە حەمە ووتی:" ماو لەو دورەوە چوزانێ ئێمە بۆی دەگرین و شوێنکەوتووی ئەوین."لەمدواییانە وەفدێک دەچنە چین و باسدەکەن کە چەندین سەرکردەی کورد لەرێگەی بیروباوەڕی ماویزمی ئەوانەوە شەھیدو لەداردراون،دەڵێن" ئێستا دەیبیستین..!!".لەبارودۆخی ئێستای عێراقدا،سەرۆکی ھەرێم و سەرۆکی کۆماری عێراق،کوردن و دوو ڕۆڵی جیاواز دەگێڕن،یەکێکیان کە سەرۆک کۆمارە زۆر سەیر لەسەرئەم تەختەی شانۆیە نمایش دەکات،ئەو پارادۆکسەی کە تاڵەبانی "لەپشت عەلی نوێژ دەکاو،لەسەرسفرەی مەعاویە نان دەخوا.".ھەموو لایەکی حەپەساندووە،تاڵەبانی پیاوێکی رۆشنبیرەو بەئەزموونە،بەڵام ئەمە دیوێکی تاڵەبانیە،دیوەکەی تری سازش کردنە لەسەر ھەندێ قەزیەی وەک کەرکوک و شتی تر لەمەڕ مانەوەی لەبەغداو ڕازی کردنی ئێران.ئەم قسەیە مێژوو یەکلایی دەکاتەوە،دەنا ماڵی شیعەو سووننەی چی..؟.ئەی مالێ یەکێتی کێ ڕیکی بخاتەوە،ھەرچی سەرۆکی ھەرێمیشە،لەسەرەتاوە ئومێدو متمانەی لەڕادەبەدەری دا بەمالیکی و حکومەتەکەی بۆپێکھێنان و،بەغداو ناوچەکانی خوارووی بەپێشمەرگە پاراست،سەرەنجام ئێستا مەرکەز بەھێزبووەو چەکی سووک و قورس دەکڕێت،ناشتوانین بەپێی یاساو دەستور رێگەی لێبگرین،کە نەوت و داھاتی عێراقیش زۆر بوو،بێگومان سەرۆکەکان چەک دەکڕن و شەڕی پێدەکەن،نەک ژینگەی پێ بپارێزن و خۆشبەختی پێبھێنن.بۆیە مالیکی بەبڕوای من زێدەڕۆیی دەکات لەتۆڵە کردنەوەو ناحەزی.سەرەتاکانیشی لەکەرکوکەوە دەبینین.
هیچ نظری موجود نیست:
ارسال یک نظر