هۆنراوەی : کەریم دافعی ( ک . د . ئازاد ) ، خوێندنەوەی : جەماڵ پوورکەریم ، مۆنتاژ : شلێر دەروێشی
ده‌نگی بازنه و موت و مووردێ
هه‌بێ و نه‌بێ،
له شیناوێ،
فریشته‌کان سه‌ما ده‌که‌ن!
ڕوو له قاپیی خودا ده‌که‌ن!
**
جووتێ چه‌کمه‌ی سووری کچانه
به جێ ماون!
له ئاگر دا هه‌ڵقرچاون!
**
دایه دایه نام ناسیه‌وه
ڕۆڵه‌ی خۆتم،
کۆتره باریکه‌ی تاساوه!
له شایلۆغانی ئاگردا
په‌ڕ و باڵه‌که‌م سووتاوه!
**
ئه‌ی کتێبه‌کان و ده‌فته‌ره‌کان
چاوه‌ڕێی چین له‌و مه‌یدانه!
که‌س نیه لاتان لی کاته‌وه
په‌ڕ به په‌ڕ هه‌ڵتان داته‌وه!
**
دایه له کوێی؟
دووکه‌ڵ ناهێڵێ بت بینم!
چاوه‌کانم بێ سۆمان و
بێ هاوڕێکانم خه‌مگینم!
**
هه‌ڵاله‌کان،
له ناو سه‌رما دا دێنه ده‌ر
دوو دوو سێ سێ
برینه‌کانیان ته‌شه‌نان
خۆ ده‌کێشن بۆ لای نسێ!
**
ئه‌وه مۆسیقای ئاسمانه؟
یا ده‌نگی زیقه‌ی مناڵان
به بێ په‌روا؟
ڕه‌شبه‌ڵه‌کی په‌ریه‌کانه
له شیناوێ
یا مناڵان چوونه سه‌یرانی لای خودا؟
هیچ نظری موجود نیست:
ارسال یک نظر