"ژنە سوریاییەكان لە هەولێر ئیقامەیان پێدەدرێت و لە كەركووك لەشفرۆشیان پێدەكرێت"
وارڤین – كەركووك: (سەمەر حلی) تەمەنی (25 ساڵ)، جگەرەكەی دەستی دادەگیرسێنی و پێكەنیێكی دروستكراو دەكات، بۆ ئەو پیاوانەی، چووبوونە ئەو ماڵەی بووەتە شوێنی لەشفرۆش و لەشكڕەكان، (سەمەر) چەند مانگێكە لەگەڵ بنەماڵەكەی لەترسی شەڕو تێكهەڵچوونە بەردەوامەكانی سوریا چوونەتە كەركووك، ئەگەر پیشەكەی "لەشفرۆشی" نەبوایە بەئاسانی تێكەڵی عێراقییەكان نەدەبوو.
باندەكانی لەشفرۆشی دەرفەت لەهەموو كاتێك دەهێنن بۆ پەیداكردنی كچ و ژنی زیاتر بۆ نێو گروپەكانیان، ئێستا لەشاری كەركووك سەرۆكی باندی لەشفرۆشەكان بەشوێن ژنە ئاوارەكانی سوریادا دەگەڕێن و پارەی باشیان پێ پەیدا دەكەن. خۆیان دەڵێن "ئافرەتی سوریایی پارەی باش پەیدا دەكەن لەم كارەدا".
(سەمەر) نموونەی یەكێك لەو هەموو ژنە سورییانەیە، كە كەوتوونەتە داوی باندەكانی لەشفرۆشی لەكەركووك، لە میانەی وتوێژێكدا لەگەڵ ئامادەكاری ئەم راپۆرتە، (سەمەر) وتوویەتی بەهۆی نەداریی ودەستكورتی ئەو كارە دەكات.
(سەمەر) هەر خۆی نەبوو، كە لەگەڵ باندێكی لەشفرۆشی لەكەركووك كاردەكات، بەڵكو چوار ئافرەتی دیكەی لەگەڵدایە و تەمەنیان لە خوارووی بیست ساڵەوەیە. "وەكو پەناهەندە روومانكردە عێراق، بەهۆی سەختی ژیانمان لێرە بەشێك لەژنەكان سواڵ دەكەین بەشێكی دیكە وەكو من كاری لەشفرۆشی" (سەمەر) بێ ئەوەی شەرم بكات بەڕاشكاوی ئەوقسانەی دەكرد.
بەگوێرەی ئامارێك، كە هیچ دامەزراوەیەكی حكومی لەكەركووك پشتڕاستی نەكردووەتەوە، ئێستا لەشاری كەركووك لەدوای تێكچوونی بارودۆخی سیاسی وكۆمەڵایەتی سوریا، زیاتر لە(300 خێزان)ی سوریایی هەن، بەڵام فەرمانگەی (كۆچ وكۆچبەران) دەڵێ: ئەوان هیچ خێزانێكیان وەكو ئاوارە تۆمارنەكردووەو مۆڵەتیان پێنەدان جگە لەیەك خێزان نەبێ، سەرچاوەیەك لە (بەڕێوبەرایەتی كۆچ و كۆچبەرانی كەركوك) وتی: "تا ئێستا یەك ماڵی سوری لەلایەن بەڕێوبەرایەتیەكەمانەوە مۆڵەتی بۆ وەرگیراوە، ئەوانی دیكە لەهەولێرەوە مۆڵەتیان پێدراوە".
سەرچاوە ئەمنییەكانی كەركووك چەندجار جەختیان لەوە كردووەتەوە، لەو شارە باندی لەشفرۆشیی روو لەزیادبوونن، هەرچەندە دەستگیریان دەكەن، بەڵام ئەو دەستگیركردنانە نەبوونەتە هۆی كەمبوونەوەی دیاردەكە.
(ئەبو ئیهاب) تەمەنی لەسەرو (40 ساڵ) یەكێكە لەو پیاوانەی دەڵاڵی ژنە لەشفرۆشەكانە و سەرپەرشتی باندێك دەكات، ئێستا كەڵكی وەرگرتووە لەو خێزانە ئاوارانەی چوونەتە كەركووك و بۆخۆی ئاشكرایكرد، لەماوەی ساڵێكدا چەندین ئافرەتی سوریایی لەشارەكانی دیكەی عێراق و هەرێمی كوردستانەوە بردووەتە شاری كەركووك و باندێكی لێ پێكهێناون.
(ئەبو ئیهاب) وتی: "جگە لەئافرەتی عێراقی، ئێستا ئەو ئافرەتە سوریانەشمان هێناوەتە نێو باندەكەمان، ئەوان لەشاری هەولێر ئیقامەیان بۆ كراوەو لە كەركووك كاری لەشفرۆشیان پێدەكەین، راستی بڵێم ئەوان مشتەرییەكی باشیان هەیەو زۆربەی ئەو گەنجانەی كە دێن بۆ لامان حەز بە ئافرەتی سووریایی دەكەن".
(ئەبو ئیهاب) دەڵاڵی لەشفرۆشەكان هەروەها وتی: "نرخی سێكسكردن لەگەڵ ئافرەت سوریاییەكان گرانترە لەئافرەتە عێراقییەكان، بەجۆرێ نرخەكانیان دوو هێندەی ئافرەتێكی عێراقییە". رەنگبێ هەر ئەوەیش وایكردبێ باندەكانی لەشفرۆشی لەكەركووك بەزووی پڕبوون لەكچ و ژنە سوریاییەكان، كە ئێستا ئاوارەو لێقەوماون لەوشارە.
بەرپرسانی پۆلیس وهێزە ئەمنییەكان دەڵێن: بەردەوام كاریانكردووە بۆ بنەبڕكردنی دیاردەی لەشفرۆشی، دیارە لەو كارەیان سەركەوتوو نەبوون، بەشێك لەو بەرپرسانە دەڵێن: "ئەوان بەجۆرێ بەشاردا پەرش بڵاو بوونەتەوە، كۆنترۆڵكردنیان ئەستەم بووە".
عەقید (یاسین حەسەن) بەڕێوەبەری بنكەیەكی پۆلیسە لەشاری كەركووك ئاشكرای دەكات، ئافرەتە سوریاییەكان بەشێكیان بەناوی كاركردن لەكافتریاكاندا خۆیان نیشان دەدەن، كەچی دوایی بۆیان دەركەوتووە كارە راستەقینەكەیان لەشفرۆشی بووە.
عەقید (یاسین) بەرپرسی (بنكەی پۆلیسی ئازادی)ــە وتی: "لەسنووری بنكەكەمان كاری لەشفرۆشی زۆرە، بەڵام دوای دەستگیركردنی چەند كەسێكیان لە دوو مانگی رابردوو، ئێستا بەشێوەی ئاشكرا نەماون و پەرش و بڵاو بوونەتەوە بەشارەكە دۆزینەوەیان شتێكی هەروا ئاسان نییە".
عەقید (یاسین) بەدەنگێكی هیوا بڕاوانەوە دەڵێ: "كاری لەشفرۆشی بەڕاستی لەتیرۆر ترسناكترە بۆ شارەكەمان و هەموو عێراق" دیارە تیرۆرو كارە توندوتیژییەكان تاڵاوی زۆریان بردووە بەقوڕگی خۆی و كارمەندەكانیدا، ئێستا قەڵاچۆكردنی دیاردەی لەشفرۆشی- یشی چووەتەسەر.
بەرپرسانی پارێزگای كەركوكیش دەڵێن: هەوڵیانداوە بۆ بنەبڕ كردنی لەشفرۆشی، ئەوانیش بێ هیوا دەردەكەون لەسەركەوتنیان، سەرۆكی (لیژنەی مافی مرۆڤ و كاروباری ژنان و منداڵان) لەئەنجومەنی پارێزگا ئاشكرایكرد هەوڵەكانیان بۆ بەرگرتن بەكاری لەشفرۆشی بێسوود بووە.
(جوان حەسەن) سەرۆكی لیژنەكە وتی: "داوامانكردووە لەپۆلیسی كەركووك لەتەواوی بنكەكانی پۆلیس ژوورێكی تایبەت دابنرێ بۆ ئەوەی لێكۆڵینەوە لەو ئاوارە سوریاییانە بكات كاری لەشفرۆشی دەكەن، تا بگەینە ئەنجامێك بۆ ئەوەی‌رووی نادیاری ئەو دیاریدەیە ئاشكرا بكات، كەچی بەبیانوی ئەوەی بینای بنكەكانی پۆلیس گونجاو نین ئەو كارە نەكراوە".
هەرچەندە چالاكانی رێكخراوە مەدەنییەكان و خەڵكانی خێرخواز هەڵمەتی زۆریان سازدا لە هەرێمی كوردستان بۆ كۆكردنەوەی كۆمەك و هاریكاریی بۆ ئاوارەكانی سوریاو كوردانی رۆژئاوا، جگە لەوەی بەرپرسانی حكومی دەڵێن بەدەیان ملیۆن دۆلاریان دابینكردووە بۆ یارمەتیدانی ئاوارەكان، پێناچێ ژیانێكی شایستە بۆ ئاوارەكان دابینكرابێ.
ئێستا بیانووی ئەو ژنانەی كاری لەشفرۆشی دەكەن لەكەركووك پاساوهێنانەوەیان بۆ "دەستكورتی و هەژاریی لەڕادەبەدەر"ە، هەروەها گرانی نرخی سێكس كڕینیان دوور نییە ببێتە هۆی ئەوەی لەچەند مانگی داهاتوو ژمارەكەیان زۆر لەوەی ئێستا زیاتربێ كە پۆلیس دەڵێ: "ئافرەتی لەشفرۆشی سووریایی زۆربوون لەكەركووك.
ئه‌م ستۆريه له ماڵپه‌ڕى (هاوڵاتى) له ژێر ناونيشانى: (ده‌ڵاڵی له‌شفرۆشه‌كان: سێكسكردن له‌گه‌ڵ ئافره‌تێكی سوری دوو هێنده‌ی نرخی ئافره‌تێكی عێراقیه) بڵاوكراوه‌ته‌وه.
http://warvin.org/default.aspx////////////////
لە بازاری هەوەسبازیدا بازرگانی بە ژنە ئاوارەكانی سوریاوە دەكرێت
وارڤین – ئەردەن: لە ژێر پەردەی خێركردندا زۆرێك لە بازرگانانی بازاری هەوەس روویانكردووەتە خێوەتگەی ئاوارە سوریاییەكان و لەوێ بەدوای كچانی جێی سەرنجدا دەگەڕێن و بە بانگەشەی هاوسەرگیری و رزگاركردنی كچان لە كولەمەرگییەكانی ژیانیان هەوڵی رازیكردنیان دەدەن بۆ ئەوەی شوویان پێ بكەن و دواتر لە بازاری هەوەسدا بازرگانی بە جەستەی ئەو كچانەوە دەكەن.
رێكخراوە مرۆڤدۆست و خێرخوازییە‌كان مەترسی ئەو دیاردەیەیان راگەیاندووە و لە وڵاتێكی وەكو ئەردەن و لە نێو كەمپی ئاوارەكاندا، دیاردەكە بە شێوەیەكی بەرچاوتر دەركەوتووە و نێوندگیرەكان، كچەكان بە ناوی هاوسەرگیری لە بەرامبەر بڕێك پارەدا لە خۆیان مارە دەكەن و دوای چەند كاتژمێرێك دەیانخەنە بازاری هەوەسبازییەوە و ئەم دەست و ئەو دەستیان پێدەكەن.
نوێنەری رێكخراوی (كتاب و لسوننە)ی ئیسلامی (زیاد حەمەد) گوتی: "دركمان بەوە كردووە لە نێو خێوەتگەی ئاوارەكاندا، كەسانێك كار دەكەن بە پاساوی مارەكردنی شەرعییەوە كچەكان لە خۆیان مارە دەكەن و گرێبەستێكی دەستنووس دەنووسن و دواتر بازرگانی بە جەستەی ئەو ژنانەوە دەكەن و هاوسەرگیرییەكەیان درۆیینە و كاتییە".
ئەو قسەی بۆ رۆژنامەی (دەیلی تەلەگراف)ی بریتانی كردووە و گوتویەتی: "زۆرینەی ئەو كەسانەی ئەو كارە دەكەن، كەسانی خاوەن پارە و كاری كەنداوی عەرەبن و لە دەرەوەی خێ,ەتگەی ئاوارەكان خانووی گەورەیان بەكرێگرتووە و كچەكان دەبەنە ئەوێ و ماوەی چەند رۆژێك لەگەڵیان رادەبوێرن و دواتر تەڵاقیان دەدەن و دەیانخەنە بازارەوە و بازرگانی بە جەستەیانەوە دەكەن".
هەروەها گوتی:"بە كچەكان دەڵێن ئێستا بەم شێوەیە گرێبەستەكە واژوو دەكەین و دواتر دەچینە دادگا، بەڵام دوای بردنی كچەكان ژمارەی مۆبایلیان دەگۆڕن و ئەو ژنانە بەجێدەهێڵن، لە كاتێكدا هەندێك لە ژنەكان دووگیانیش دەبن".
بە گوێرەی راپۆرتی لیژنەی فریاكەوتنی نێودەوڵەتی، زۆرینەی حاڵەتەكانی راكردن لە سوریا لە ترسی دەستدرێژی سێكسی بووە و ئەوانەی لەو وڵاتەوە رادەكەن، نایانەوێـت رووبەڕووی دەستدرێژی سێكسی ببنەوە، كەچی لە كەمپی ئاوارەكاندا چارەنووسیان بەو رۆژە دەگات.
(زەینەب)، دایكی دوو كچە و ئەو لە كەمپە قەرەباڵغەكەی (ئەلزەعتەر)ی هەڵكەوتوو لە باكووری خۆرهەڵاتی ئەردەن دەژیت و وەك خۆی گوتی:"پیاوان روو لێرە دەكەن بۆ ئەوەی كچێكی سووریایی بكەنە هاوسەری دووەم و سێیەمی خۆیان، ئەوان بەناوی چاكەكارییەوە ئەو كارانە دەكەن".
كچێكی دیكەی تەمەن بیست ساڵ و خزمی نزیكی (زەینەب)، باسی لە داخوازی پیاوان كرد و گوتی: "تا ئێستا كە ماوەی كەمتر لە دوومانگە گەیشتوومەتە ئەم خێوەتگەیە، چوار جار داوای هاوسەرگیریم لێكراوە، كە هەندێكیان تا ئێستا لە ژایانمدا نەمبینیبوون".
پاسەوانەكانی ئەو خێوەتگەیە، بۆ رۆژنامەی (دەیلی تەلەگراف) باسیان لەوە كردووە، بە شێوەیەكی بەردەوام پیاوانی كەنداو رویان لێدەنێن و داوایان لێدەكەن رێگەیان بدەن بچنە ناو كەمپەكە و كچێكی شۆخ و شەنگی بێ دەرەتان بۆ هاوسەری خۆیان هەڵبژێرن".
فریودان و دەستەمۆكردن و ناچاركردنی ژنانی لێقەوماو و بێدەرەتانی ئاوارە بوو، بۆ بازرگانیكردن پێیانەوە، بووەتە راستییەكی حاشاهەڵنەگر و لە كاتی قەیرانەكاندا بە شێوەیەكی بەربڵاو دەتەنێتەوە و مەزندە دەكرێت بە هەزاران كچە عێراقی لێقەوماو لە دوای پرۆسەی داگیركردنی عێراق و رووخاندنی رژێمی بەعس لە (2003) لە لایان بازرگانەكانی هەوەسبازییەوە خرابنە بازاری رەشی كڕین و فرۆشتن پێیانەوە و لە ئێستاشدا هەمان ئەو بازرگانانە گیرفانەكانیان بە پارەی فرۆشتنی كچان و ژنانی سوریایی گەرمدەكەن.
بەرپرسانی نەتەوە یەكگرتووەكان رایدەگەیەنن، لەسەرەتای ئەمساڵەوە زیاتر لە (500) كچی تازە پێگەیشتووی سوریا، ناچار كراوون بە هاوسەرگیری درۆیینە.
(ویسام) هاووڵاتیەكی ئەردەنییە و لە نزیكەوە ئەو كەسانە دەناسێت، كە بازرگانی بە جەستەی ژنانەوە دەكەن، ئەو گوتی: "هەندێك ژن رۆڵی نێوەندگیر دەگێڕن و ئەو ژنانە كچەكان دەهێنن و دەیانخەنە بەردەست كڕیارەكان، ئەوان بۆ یەك كاتژمێر رابواردن لەگەڵ كچێك پەردەی كچێنی لەدەستدابێت (50 دینار)ی ئەردەنی و بۆ كچێكیش پەردەی لەدەست نەدابێت (100 دینار)ی ئەردەنی وەردەگرن.
س: ئيلاف.
و: وارڤين.
هیچ نظری موجود نیست:
ارسال یک نظر