پەیامی "رێكخراوی
جەوانانی لیبراڵی كوردستان" بۆ
سێهەمین كۆنفرانسی گەنجانی كورد لە رۆژئاوای
كوردستان
خەڵكی ئازادیخوازی كوردستان
كۆڕو كۆمەڵە سیاسییە كوردستانیەكان
گەنجانی وڵاتپارێز و نیشتمانپەروەری كورد
لەگەڵ سڵاوی كۆڵنەدان و بەرەنگاری تا رزگاری
"رێكخراوی جەوانانی
لیبراڵی كوردستان"بە هاتنی بۆ
رۆژئاوای كوردستان و بەسترانی ئازادانەی سیهەمین كۆنفرانسی گەنجانی چوارپارچەی
كوردستان گەلێك دڵخۆشە و سەرەتا پیرۆزبایی خۆی لە گەلی شۆڕشگێڕ و قارەمانی رۆژئاوای
وڵاتەكەمان دەكات. رێكخراوەكەمان هیواخوازبوو، هەموو لایەن و رێكخراوەكانی گەنجانی
چوارپارچەی كوردستان بەشداریی چالاكانەی خۆیان لەم كۆنفرانسە رابگەیەنن، چونكا ئەمە
بۆ بەرزبوونەوەی گیانی خۆڕاگریی گەلی رۆژئاواش زۆر گرنگ و بەبایەخ بوو.
"رێكخراوی جەوانانی لیبراڵی
كوردستان"وەكو لایەنێكی رۆژهەڵاتی كە بە رۆحێكی نەتەوەییەوە ئامادەیی خۆی لە
رۆژئاوای كوردستان بۆ هەر چەشنە حاڵەتێكی بەرەنگاری نەتەوەیی و بەرگری كوردستانییانە
دەربڕیوە، كوردستانی بوونی ئەم كۆنفرانسە و دانپێدانانی كورد بە مافەكانی خۆیدا لە
گرتنی فرەلایەنانەی ئەم كۆنفرانسانە لە رۆژئاوا دەبینێ و ئەمەش بۆ دابەزاندنی ورەی
دوژمنانی گەلەكەمان كاریگەریی ئێجگاری زۆری دەبێت. واتە نابێ ناكۆكییەكانی نێوان هێزەكانمان
فەرامۆش بكەین كە لە كاتە ناسكەكاندا چەندە زیانی گورچووبڕی لە كورد وەشاندووە.
ئێمە بە بۆنەی بەستنی سێیه‌مین کۆنفڕانسی گه‌نجانی
هەر چوارپارچە له رۆژئاوای کوردستان، پشتیوانی لە هەموو جۆرە كۆبوونەوەیەكی
كوردستانییانە بۆ باسكردن لە كێشەی كورد دەكەین و بۆیەش ئامادەیی خۆمان بۆ بەشداری
لەم كۆنفرانسە راگەیەند.
بە ڕای ئێمە دەبێ لە دوو گۆڕەپانی جیاواز و
هاوسەنگدا كار لەسەر وەدیهێنانی ئامانجەكانی گەل بكەین.
1- ستراتێژیای
نەتەوەیی كورد بۆ دەیەی دووهەمی هەزارەی سێهەم
بەڕای ئێمە "پانكوردیزمی ئینسانی"
باس لەو ژینگە كوردییە دەكات، كە لە مادستانە مەزنەكەیدا، كە وەكو یۆتۆپیایەكی تازە
و ئیمڕۆژی و بە تایبەتمەندییە كوردییەكانیەوە
كە سەرەكیترینیان پێكەوە هەڵكردن و دەستدرێژی نەكردنەسەر مافەكانی ئەویدیكەیە و دەروازەیەكە بۆ رەواجی
بنەماكانی مرۆڤدۆستی بە شێوەیەكی گونجاوتر لە رۆژهەڵاتی ناویندا، نایەوێ هیچ نەتەوەیەك
لەم ناوچەیەدا بە باڵای ئەویدیكەدا بتوێتەوە و باشترین چارەسەری كێشەی ئەمڕۆی جیهانی
پاشكەوتووش بەوە دەزانێ، كە خواستی هەموو یەكە نەتەوەیییە بندەستەكان جێبەجێ بكرێن
و بە هەموو مافەكانی خۆیان بگەن و ئەوانەی زەرەمەند بوون، قەرەبوویان بۆ بكرێتەوە.
لە راستیدا ئێمە دەبێ بۆ ئەو مەتەڵە نەزانراوە
بگەڕێین، كە وەكو نهێنی جیهانی بندەستەكان
ماوەتەوە و بۆ هەر كام لەو نەتەوانەش بە شێوازێك خۆی شاراوە هێشتووەتەوە. ئەو نهێنییەی
كە ئەگەر بزانرێ، سەركەوتنی مەزنترینی جیهانی بندەستەكان - واته كورد - مسۆگەر دەكات.
یەكێك لە گەورەترین بنەما تیۆرییەكانی
"پانكوردیزمی ئینسانی" پلانێكی تایبەتییە بۆ دابەشكردنەوەی مافەكان. ئەم
پلانە "سیاسەتی قەرەبووكردنەوەی رەگەزی" یە.
"سیاسەتی قەرەبووكردنەوەی رەگەزی"
لە كورد و مافە رەواكەی وەكو زیانلێكەوتوو دەڕوانێ. ئەم پلانە باس لەوە دەكات، بۆ ئەوەی
پێش بە جەنگی داهاتوو و زیانی زیاتر بگرین، دەبێ رەگەزە زیانلێكەوتووەكان قەرەبوویان
بۆ بكرێتەوە. ئەم قەرەبووكردنەوەیەش نابێ بە شێوازێك بێت، كە لایەنی بەرهەڵستكار
و زیانلێكەوتوو بۆ داهاتووی كۆمەڵگا بەرهەم بێنێت.
یەكێك لەو رەگەزانەش كه زیانباری مێژوویی بووە،
رەگەزی "مێینە" یە و لە چوارچێوەی سیاسەتەكانی "پانكوردیزمی ئینسانی"
و لە ژینگەی سەرهەڵدانی ئەم بیرۆكەیە واتە"مادستانی گەورە"دا، رەگەزی مێ
قەرەبوو دەكرێتەوە.
هەژموونی نەتەوە و كاریگەریی لەسەر ویژدانی
تاكەكانی، یەكسانە لەگەڵ ئاستی بەرپرسیارێتی نەتەوەیی. واتە چەندە بتوانین لە رەوتی
نەتەوەسازی لە كۆمەڵگادا نەتەوایەتییەكی كارا بەرهەم بێنین ئەوندەش دەتوانین لە بەرهەمەكانی
نەتەوایەتی سودمەند ببین.
دروستبوونی ئەو ویژدانەی كە هەرەسهێنانە وردەكانی
ئاستی خوارەوەی كۆمەڵگا تاكو ئاستی سەرەوە و چڵەپۆپەی سەركردایەتیكردن، بە شكستێكی
قەرەبوونەكراو ببینرێ، دەكاتە هەژموونی نەتەوە لەسەر تاكەكانی خۆی و بەرپرسیارێتیی
مەزن دەخاتە ئەستۆی تاكەكانی بۆ ئەوەی نوشوستی نەتەوەیی تەجروبە نەكەن و لە كەمترین
ئاستی خۆیدا پێشی پێ بگرن.
بەرانبەر هێزەكانی رۆژهەڵاتیش دەبێ بڵێین، شۆڕش
لە خەیاڵی مرۆڤی ئازادبیردا، لە دیزاینكردنەوەی زەینەوە بۆ دیزاینكردنەوەی جیهان و
بوون دەست پێدەكات. كەچی لە كۆمەڵگا بەڵالێدراوەكاندا ئەم واتایە لە زەینی مرۆڤەكاندا
پڕاوپڕ و وەك خۆی ناچەسپێنێت و زۆر جاریش پێچەوانەی ئەم راستییە روودەدات.
لە زۆربەی كاتەكاندا شۆڕش لە كۆمەڵگایەكی بندەست
و كۆیلە لەباری مەعریفی یەوە، دەكاتە ماڵوێرانی و وێرانكردنی خود، نەك ئاوەدانكردنەوەی
زەین و بوون.
ئەمەش ئەو كارەساتەیە كە ترادیسیۆن واتە بیركردنەوەی ترادیسیۆناڵ و جیهانی نەریتی دروستی
كردووە و تا ئەم قۆناغە پڕ لە ژان - ە بەجێ نەهێڵین، كۆتایی بە ڕەنجەكانمان نایەت.
ئێمەی گەنجانی رۆژهەڵاتی كوردستان دەبێ باوەڕ
بەوە بێنین كە جیهانی ئێمە تەنیا بە دەستانی خۆمان دروست دەكرێت و هیچ رزگاردەرێك
لە ئاسمانەكانەوە نایەت، بە بێ هیچ ئەم بەرپرسیارێتییە گەورەیەی كە نەتەوەكانی دیكە
و پارچەكانی دیكە گرتوویانەتە ئەستۆی خۆیان، بۆمان لە ئەستۆ بگرن. دەبێ وەكو سەركردایەتی
داهاتووی ئەو گەلە ئێمە ئەو گیانە مەزنە لە رۆحی خۆماندا پەروەردە بكەین و بۆ ناخی
كۆمەڵگا بیگوازینەوە. تاكو دیسانەوە رۆحی شۆڕشگێڕبوون و یاخیبوون لە داگیركاری لە
ناخی گەنجانی وڵاتەكەماندا بەهێز بكەینەوە.
مەشخەڵانی شۆڕشی كورد ئێستا لەدەستی گەنجاندایە
و هەر بۆیەش ئەو ئامانجانەی لە رابردوودا نەیانتوانی كورد بگەیەننە ئەنجامێكی تەندروست،
دەبێ وەلا بنرێن.
ئێمە دەبێ لەئاستی جیهانیدا لە
پێناوی ئەم ئامانجانەی خوارەوەدا خەبات بكەین:
1- دابەشكردنەوەی
جوغرافیای ناوچە كێشەلەسەرەكانی جیهان و ناوچەی خۆرهەڵاتی ناوین (كە كورد تێیدا نیشتەجێیە)
بە گوێرەی خواستی گەلانی نیشتەجێی ئەو وڵاتانە، كە هەمانا خواستی رزگاری لە ژێردەستەبوون
و خواستی ئازادی لە كۆیلایەتییە.
2- دوور
كەوتنەوە لە كلتووری داگیركاریی توندوتیژی – ئاكار و شەڕكردن لە پێناوی جێگیركردنی
ئەم كلتوورە ئەخلاقییەدا
3- تەندروستكردنی
پێوەندییە ئێتنیكی و مرۆیییەكان لە جیهاندا
4- هێشتنەوەی
سنوورەكان بە دەڵەمەیی و كردنەوەی دەروازەكان بە ڕووی پێوەندییە تەندروستەكاندا
5- قەرەبووكردنەوەی
رەگەزە زیان لێ كەوتووەكان
6- دابەشكردنەوەی
داهاتی دانراوی، بێ كەڵككراوی جیهان و دابینكردنی نیازی نەتەوە و ناوچە هەژارەكان
بە پێی ستانداردێكی نێونجیی پێداویستییە جیهانییەكان
7- گۆڕینی
پەروەردەی جیهانی و هێنانەئارای سیستەمێكی تەندروستی پەروەردەیی مرۆیی، بۆ بنبڕكردنی
هەژاریی مەعریفی لە جیهاندا
8- بردنە
سەری ئاستی بەرپرسیارێتییە ئەخلاقییەكان و دانانی هێزێكی بەرگریكاری جیهانی بە مەبەستی
گرێنتی دانان بۆ ژیانی تاك و گرووپ و نەتەوە بەرمەترسی كەوتووەكان
لە سەردەمی جیهانگیریدا كە سەردەمی ئێستامانە،
كۆمەڵە هەوڵێكی نابەرپرسیارانە لە ئارادا بووە، كە بە پێی نیاز و ئامانجی باڵادەستەكانی
دنیا، كەم و زیاد كراوە و بە مەبەستی كەمكردنەوەی كێشە لە جیهاندا ئەو هەوڵانە پیشان
دراون. كەچی لە ئاكامدا و بە پێی نێوەڕۆكی ئەسڵیی بابەتەكە، كە بریتی بووە لە هێشتنەوەی
باڵادەستی و ملكەچكردنی قەدەرە لاوازەكانی دیكە بە قازانجی خۆیان... ئەم هەوڵانە
تا ئێستاش شكستیان خواردووە.
مەبەستی ئێمە لێرەدا یارمەتیدانی هەوڵە ئینسانی
و رەسەن و شیاوەكانی ئەو نەتەوە و گرووپانەیە، كە جێگای پەسند و پشتیوانیی گەلەكەیانن.
بۆ ئەم مەبەستەش و بۆ سەرگرتنی ئەم ئامانجە پێویستە ئەم چەمك و ناسیارێتییانەی
خوارەوە بگۆڕدرێن.
1- ماناكردنەوەی شوناس بە شێوازێكی ئینسانی و
ئێستایی تر
2- پێداچوونەوەیەكی تایبەت بە خاڵەكانی مانیفێستی
جیهانیی مافەكانی مرۆڤدا، كە لانیكەمی گارانتی بۆ جێبەجێكردنی ئەو خاڵانە بۆ ئێمەی
گەلانی ناوچە هەژارەكان (لە باری مافداری یەوە) تێیدا دەستەبەر بكرێن.
3- نەهێشتنی جیاوازی لە سەردەمی جیهانگیریدا
بۆ هاوڵاتییانی گۆی زەوی.
ئێمە پێمانوایە: نەتەوایەتی ركابەریكاری كۆن، شەڕانگێز
و بیمارە و دژی نەتەوایەتیی یەكسانیخوازی قەرەبووكارە!
ئەم ئامانجە مانای كورتكردنەوەی هەژموونی باڵادەستەكان
لە پێناوی سەرخستنی ئایدیایەكی مرۆڤ و ژینگە پارێز دەدات. یانی ئامانجەكانی (نەتەوایەتیی
كلاسیك) دەبێ هەرەس بێنێ و (نەتەوایەتیی دێمۆكراتیك و ئینسان – تەوەر) جێگای بگرێتەوە.
ئەمەش بەو واتایە دێت، كە لە سەردەمی مۆدێرندا جیهان هیچ حەوانەوە و دڵنیایییەكی بە
خۆوە نەبینی و لەم سەردەمی نادڵنیایی – لە رەوشی ئەمن و ئاسایشی جیهانەدا – دەبێ بە
هەموومان هەست بە مەترسی و بەرپرسیارێتی بكەین. یانی دەبێ لە پێناوی كوشتنی بیرۆكەی
باڵادەستیدا – بە شێوازە كۆنەكەی – كە دەبووە هۆی كاولكاری و قڕكردنی مرۆڤ، خۆمان
و وەچەكانی داهاتووشمان ئاگادار بكەینەوە و تەنانەت وریاییش بە ماڵی نەتەوە باڵادەستەكان
بدەین كە دەست لە پاوانخوازی هەڵبگرن.
هەمووی ئەم ئامانجانەی لەسەرەوە باسكران، دژایەتیكردنی مەعریفەی تۆقێنەرە. یانی لە بیر
كردنی ژینگە و جیهانە ترسناكەكانی
رابردوو.
كەوابوو دەبێ مرۆڤ چیدی لە ئاستی بەرپرسیارێتییە
گەردوونییەكانی خۆیدا – كە یەكێكیان نەكوشتنی مرۆڤەكانی دیكە و هەوڵدان بۆ
دروستكردنی پێوەندیی باشتر لەگەڵ جیهانەكانی دەرەوەی بازنەی خۆیەتی – هەوڵەكانی زیاتر
بكات و ئاراستەی هەوڵەكانی خۆی بگۆڕێ.هەروا كە ئێمەی كورد ساڵانێكە هەوڵ بۆ باشتر
كردنی ئەدەین و دنیا گوێی لە ئاستی داواكانماندا ئاخنیوە.
ئامانجی كوردستانییانەی ئێمە
دەبێ چی بێت؟
"یەكێتی نەتەوەیی" كلیلی چارەسەریی
كێشەی كوردە و نەوەی تازەی خەبات و خۆڕاگریی كوردانیش دەبێ پێشەنگی ئەم پرسە گرنگ
و چارەنووسسازەی گەل بن.
1- دروستكردنی
گیانی بەرپرسیارێتی نەتەوەیی لە تاكەوە بۆ كۆمەڵگا
2- گرتنەبەری
رێوشوێنێكی تایبەت بۆ خەبات، كە لەگەڵ هاتنەئارای پرسە نەتەوەییەكان، پرسە بچووكترەكان
وەلا بنرێن.
كە واتە پرسیارە گرنگەكە ئەوەیە: ئێمە دەبێ شەڕی
كامە عەقڵ بكەین؟
لە راستیدا ئێمە دەبێ هەوڵەكانمان یەك بخەین.
نابێ بیر لەوە بكەینەوە ئەوڕۆ لە گۆڕەپانەكەدا كام حیزبی سیاسی و كام كەسایەتی و
كام زاراوە و كام ناوچە لەپیِش و پێشەنگە!... دەبێ بیر لەوە بكەینەوە كە بە گیانی
بەرپرسیارێتی نەتەوەییمانەوە كوردستان بۆ خۆمان پڕ بكەین لە ئاشتی و پێكەوە بوون و
بۆ دوژمنانیش بیكەین بە جەهەننەمێكی سەخت كە لێی دەرباز نەبن.
بەڕای ئێمە كورد تاكو ئەم قۆناغەش دنیابینییەكی
یەكسانی بۆ هەموو تاكەكانی دروست نەكردووە. هەموومان نەمانتوانیوە لەسەر كۆمەڵە خاڵێكی
بنچینەیی رێك بكەوین كە لە كاتە هەستیارەكاندا ببەنە بنەما ئەخلاقییەكانی نەتەوەییمان.
كەواتە دەبێ دنیابینییەك دروست بكەین. دنیا بینییەك كە زۆرترین ئاستی ئامانجەكانی
تاك بە تاكی نەتەوەكەمانی لە هەر چوار لای ئەم جیهانە پانوبورینەدا پێكابێت.
بە
گشتی چەندین تەوەر دەستنیشان دەكەین كە لەم كۆنفرانسەدا شیاوی باسكردنن.
1-
جوغرافیای كوردستان و دەستنیشانكردنی سنوورەكانی بە گوێرەی ئەو پێوەرە راستەقینە
كوردییانەی خۆمان هەمانە. نەك بە گوێرەی پێوەرە نامۆكان بە رۆحی داخوازە رەواكانی
نەتەوەكەمان.
2-
زمانی كوردی: ئێمەی كورد بە هۆی بوونی بارگرژی و ئاڵۆزییەكی تایبەتی مێژوویییەوە
كە هەموو خاك و شوناسی ئێمەی لەت لەت كردووە، خاوەنی زمان و خەتی یەكگرتوو بۆ دەربڕینی
خواستەكانمان و پێوەندیگرتن بە خۆمانەوە و دنیای دەرەوەمان نین.
كوردستان خاوەنی چوار زاراوەی سەرەكی (كرمانجی
باكوور، كرمانجی ناوەڕاست، گۆران و كرمانجی باشوور و كۆمەڵە بن زاراوەیەكین) كە هەموویان
بە ئاستێك لێك دووركەوتوونەتەوە، كە كێشەیەكی گەورەی بۆ پێوەندیگرتن لەگەڵ خۆماندا
و لە هەمانكاتیشدا لە پەروەردەدا دروست كردووە. هەر چوار زاراوەكە وەكو زمانی رەسمی
لە قۆناغ و ناوچەی تایبەتدا بەكارهاتوون و بە خەتی جیاوازیش نووسراون. ئەمانەش كێشەیەكن
كە دەبێ چارەسەریی پلە بە پلەی بۆ دابنێین و هەر لە یەكەم رۆژانی كۆنفرانسەوە كاری
لەسەر بكەین.
3-
نەتەوایەتی و شوناسێكی مۆدێرن و دەرچوون لە گوتاری پەرتەوازەیی : كاركردن بۆ
بەدەوڵەتبوون و یەكڕیزی.
4-
كلتوور و شوناسی جیاوازی كوردی و دیاریكردنی هێڵەگشتییەكانی شوناسی ئێمە بۆ
جیاكردنەوەمان لەگەڵ شوناسی بێگانەدا.
5-
مافەكانی مرۆڤ و دەرهاویشتنی كورد بۆ دەرەوەی بازنەی مرۆڤ – بوون
6-
پێداچوونەوەیەك بە جاڕنامەی گەردوونیی مافەكانی مرۆڤدا بۆ چەسپاندنی كۆمەڵێك
بەهای تازە، كە كورد بتوانێ بەو دەستەواژە و ماددە و بەندانە خۆی و شوناسی جیاوازی
خۆی لە هەموو دنیادا بسەلمێنێ.
7-
لۆژیك و پرەنسیپەكانی كوردایەتی بۆ هەزارەی تازە
8-
دیپلۆماسیی كوردی
9-
دروستكردنی رۆحی نەتەوەیی بە گوێرەی شەرعییەت وەرگرتن لە ناوخۆی كۆمەڵگا و
بە كاركردن بۆ چەسپاندنی كۆمەڵە بەهایەكی شارستانییانە لە هاتنەدەنگی كورد لەسەر
مافەكانی خۆی.
10- سوپای كوردستان و لینكردنی بە ناتۆو هێزە
جیهانییەكانەوە و بەدەستهێنانی پاڵپشتیی زلهێزەكان بۆ تەیاركردنی ئەم سوپایە بە
ئامرازەكانی شەڕی تازە.
11- سامانی كوردستان و نەوت بە تایبەتی و رۆڵی
ئەو لە وەرگرتنی شوناس و وەرگرتنی مافەكانماندا.
12- خەبات لە هەزارەی تازەدا بە یەك فەرمان و
چەند ئوسلووبی جیاواز.
13- یەكلاییكردنەوەی بایەخە مێژوویی و ئەخلاقی
و مرۆیییەكانمان، بۆ دروستكردنی ویژدانێكی تازە.
14- چونییەتی راكێشانی سەرنجی ناوەندە جیهانییەكان
و نەتەوەیەكگرتووەكان و زلهێزەكان بۆ گرنگیدان بە پێگە و توانای كورد لە چارەسەریی
كێشە هەڵپەسێردراوە جیهانییەكاندا.
15- بەرزكردنەوەی ئاستی بەرپرسیارێتیی نەتەوەیی لە جیاتی شوناسە نانەتەوەیییەكان و گێڕاندنەوەی
شوناسە تۆراوەكان وەك (لوڕ و هاوشێوەكانی) بۆ باوەشی نەتەوەكەمان و دروستكردنی
گوتارێكی كوردیی تایبەت بە ناوی: عەداڵەتی نیشتمانی و سڕینەوەی جیازیی نێوان پێكهاتەكان
لەژێر دروشمی : "نەتەوە یانی یەك پەیكەر"دا.
16- بەجیهانیكردنی دۆزی كورد و بەرزكردنەوەی
ئاستی لۆبیی كوردی بۆ لێژكردنی پێگەی لەرزۆكی دراوسێ ناحەزەكانمان.
ئەمانەو دەیان تەوەری دیكە دەتوانن بەشێكی
گرنگی باسەكانی سێهەەمین كۆنفرانسی نەتەوەیی گەنجانی كورد بن.
كۆنفرانسی نەتەوەیی گەنجان و
ئاراستەكانی:
1- ئاراستەی ناوخۆیی:
أ.
ئاشتی نیشتمانی
ب.
ئاسایشی نەتەوەیی
ت.
پاراستنی بەرژەوەندییە باڵاكان بەپاراستنی قەوارەكان
پ.
شوناسەجیاوازەكانی ماڵی كورد وەك شیعە لەبیركراوە كوردەكان، كەمایەتییەكوردەكان:
كاكەیی و ئەهلی حەق و جوولەكە و ئێزدی و زەردەشتی و شوناسە غەیری كوردە میوانەكانی
ناوماڵی كورد وەك : تورك و فارس و عەرەب و ئەرمەنی و بە یەكسانی هەڵسوكەوت كردن لەگەڵیان.
2- ئاراستەی دەرەكی
أ.
ئاراستەیەك بەرەوماڵی دوژمنانی كورد
ب.
ئاراستەیەك بەرەو سەمپات و دۆستانی دوژمنانی كورد
ت.
ئاراستەیەك بەرەو ئەو نەتەوانەی لە كێشەی كورد تێنەگەییون.
پ.
ئاراستەیەك بەرەو ئەو نەتەوانەی كێشەی كورد باش دەناسن و خۆیان لەئاستی كێشەكانی
ئێمەدا گێل كردووە.
ج. ئاراستەیەك بەرەو لای ئەو دەوڵەت و نەتەوانەی
ئامادەیی هەر چەشنەهاوكاری و پشتگیرییەكیان بۆ كورد و خەباتە رەواكەی دەربڕیوە: دۆستانی
كورد.
ئەنجومەنی باڵای نەتەوەیی
كوردستان
بوونی سەركردایەتی رۆحی و ویژدانیی كورد - لەنەبوونی
دەوڵەتی كوردی بۆ هەر چوارپارچەی كوردستان بە مەبەستی پاراستنی یەكڕیزی و تەبایی نەتەوەیی
- ئامانجی هەمووكوردێكە و ئەم ئەنجومەنە دەتوانن یەكەمین سەركردایەتیی مەعنەویی
كورد بن، كە بە یەكگرتوویی هەڵبژێردرابن.
پێویستە لە دانیشتنی یەكەمی ئەنجومەنی باڵادا
"لێژنەی ئاشتیی نیشتمانی" دابمەزرێنن و لەو كێشە و ناكۆكییە دێرینانە بكۆڵنەوە
كە نەیهێشتووە زۆریەك لە قەوارە و لایەنە كوردییەكان پێكەوە بە شێوەیەكی گونجاو هەڵسوكەوت
بكەن.لە یەكەم كۆنفرانسدا كۆمەڵێك كەسایەتیی هەر چوارپارچەی كوردستان لە لایەن
پارت و رێكخراوو كەسایەتییەكانەوە دەستنیشان دەكرێن و بە چەند ئاستی جیاوازدا دەستەچن
دەكرێن و لە نوێنەرانی هەر چوارپارچەی كوردستان و پارت و رێكخراوو لایەنەكان، كەسایەتی
و لۆبیكاران و ئابووریناس و خاوەن سامانە كوردەگەورەكان دروست دەبن. دواتر ئەمانیش
دوو بەشی سەرەكیی پێكهێنەری "مەجلیسی "سەنا" ی كوردستان" بەدەنگدان
دادەنێن.
لێژنەكان:
1-
لێژنەی یاسایی بۆ نووسین و داڕشتنی یاسا و پڕەنسیپە نەتەوەیییە نەنووسراوەكانی
كورد
2-
لێژنەی دیپلۆماتیك بۆ كاروباری پێوەندییەناوخۆیی و دەرەكییەكان
3-
لێژنەی كلتووری و رۆشنبیری بۆ گەشەپێدان بە كلتوور و بڵاوكردنەوەی شوناسی
ونكراوی كورد لەناوەندەرۆشنبیرییە جیهانییەكان و ناوخۆشماندا
4-
لێژنەی ماڵی و دارایی وەك سندووقی دراوو هاوكاریی نەتەوەیی و دروستكردن و رەواج
پێدانی هێندێك بابەتی بە نرخی وەك پارەی سیمبۆلیك و پوول و سكە.
5-
لێژنەی كۆمەڵایەتی بۆ چارەسەریی كێشە چارەسەرنەكراوو هەڵپەسێردراوەكانی
ناوخۆمان و قەوارەكانمان كە یەكڕیزیی ماڵی كورد تێك ئەدەن.
6-
لێژنەی سەربازی وەك سەرەتایەكی رێكوپێك بۆ دروستكردنی سوپای میللیی
كوردستانی گەورە.
7-
لێژنەی لوردەكان، كە لە خاوەن ئەزموونە سیاسییە دەسەڵات بەدەست و دەوڵەمەندەكانی
كورد دروست دەبن.
پێویستە لەپاش دامەزرانی ئەم لێژنانە "ئەنجومەنی
هەرێمەكان" دروست بكرێن كە بریتین لە:
ئەنجومەنی هەرێمەكان:
1- ئەنجومەنی هەرێمی باكوور
2- ئەنجومەنی هەرێمی باشوور
3- ئەنجومەنی هەرێمی رۆژهەڵات
4- ئەنجومەنی هەرێمی رۆژئاوا
5- ئەنجومەنی هەرێم و ناوچەو قەوارە دابڕاوەكان
پاش ئامادەكارییەكانی ئەم كۆنفرانسە و
راسپاردەكانی بۆ كۆنفرانسی چوارەم، دەتوانین بەشێك لەو پێشنیارانەی دراونەتە كۆنفرانسی
سێهەم بخەینە بواری جێبەجێكردنەوە. واتە ئێمە لەم كۆنفرنسەدا بە ڕەوای دەزانین كار
لەسەر كۆمەڵە خاڵێكی بنچینەیی بكرێت كە ببێتە بەرنامەی كاری كۆنفرانسەكانی
داهاتوو. واتە لە داهاتوودا ئێمە بە هەمان كرداری رابردووەوە كۆنفرانسەكەمان ئیدارە
نەكەین بەڵكو دەبێ لانیكەم لە كۆنفرانسەكانی داهاتوودا كۆمەڵە پڕۆژەیەكی یەكلاییكەرەوەی
نەتەوەیی بخرێنە بەردەست و بكرێن بە یاسا بۆ جێبەجێكردنی لە ناخی شۆڕشەوە تا كۆمەڵگاكةمان.
بە ناوی دەستەی كارگێڕی بەرزی " رێكخراوی جەوانانی لیبراڵی كوردستان" و ئەنجومەنی
سەركردایەتی "پارتی لیبراڵ دیمۆكراتی
كوردستان"ەوە پڕ بە دڵ پیرۆزبایی خۆمان ئاراستەی گەلی قارەمانی كورد و
پارێزەرانی شەرەف و كەرامەتی كورد واتە گەریلاو خەباتكارانی ناو جەرگەی خەباتی رۆژئاوای
كوردستان دەكەین و هیواخوازین ئەم كۆنفرانسە ببێتە هەوێنی تەبایی كوردستانییانە و
دروستبوونی رۆحی نەتەوەیی لە ناو گەنجانی كورد لە ئاستی چوارپارچەی كوردستان و هەموو
جیهاندا.
هەر لەم تریبوونەوە پاڵپشتی خۆمان بۆ داوا ڕەواكەی
خەڵكی بەشەرەف و قارەمانی باكووری كوردستان و پێشنیارە مەزنەكەی رێبەری كوردان لە
باكووری كوردستان "سەرۆك ئۆجالان" دەردەبڕین و هیواخوازین بە زووترین
كات بەڕێزیان رووی گەشی ئازادی و سەربەستیی وڵاتەكەمان ببینن و كاری زیاتر لە پێناوی
سەرخستنی ئامانجەكانی نەتەوەی كورددا بكەن.
سەركەتنمان نێزیكە و دەبێ خۆڕاگر بین. ئێمە هێزی
كەرامەتپارێزی گەلێكی رزگاریخواز و مەزنین.
دەستەی كارگێڕی بەرزی
رێكخراوی جەوانانی لیبراڵی كوردستان
18/3/2013
هیچ نظری موجود نیست:
ارسال یک نظر