ژنە نوێنەرێكی كورد لە بەغدا ژەهر خوارد دەكرێت

ژنە نوێنەرێكی كورد لە بەغدا ژەهر خوارد دەكرێت 

وارڤین – بەغدا: لە دانیشتنی رۆژی پێنجشەممەی رابردووی ئەنجومەنی نوێنەرانی عێراقدا ئەندامی ئەنجومەن لە كوتلەی هاوپەیمانی كوردستان (پەریزاد شەعبان بەرواری) لە رێگەی دەبەیەكی ژەهراوییەوە دەرمانخوارد دەكرێت و بە دووریش نازانرێت كە بە پیلان ئەو كارە كرابێت.

لە بەیاننامەیەكدا كە (عیسمەت شەعبان) برای (پەریزاد بەرواری) دەریكردووه و وێنەیەكی دەست (وارڤین) كەوتووە، هاتووە: "لەدانیشتنی رۆژی پێنجشەممەی رابردوو (9 / تشرینی دووم – نۆڤەمبەر / 2012)ی ئەنجومەنی نوێنەرانی عێراقدا ئەندامی كوتلەی هاوپەیمانی كوردستان (پەریزاد شەعبان بەرواری) لە رێگەی پێدانی ئاوی پیسبوو، ژەهراوی كراوە و بەدووریش نازاندرێت كە ئەو كارە بە پیلانڕێژی ئەنجامدرابێت".

لە بەیاننامەكەدا هاتووە، دوای پشكنینی ئاوەكە دەركەوتووە، ئەو ئاوەە پیس بووە و بەكەڵكی خواردنەوە نەهاتووە و بەهۆی ژەهراوی بوونەكەشییەوە، (پەریزاد) گواستراوەتەوە بۆ هەولێر و خراوەتە ژێر چاودێری پزیشكییەوە.

لە بەیاننامەكەدا، برای ئەو ژنە نوێنەرە رایدەگەیەنێت، كە ئەوان وێڕای ئیدانەكردنی ئەو كارە ترسنۆكانەیە، بەرپرسیارێتی تەواو دەخەنە ئەستۆی حكومەت و پێویستە لێكۆڵینەوەیەكی ورد بۆ ئاشكراكردنی وردەكارییەكانی پشت ئەو رووداوە بكرێت".

(بەرواری) بە یەكێك لە ژنە چالاكەكانی ئەنجومەنی نوێنەرانی عێراق هەژمار دەكرێت و لە سەرەتای مانگی رابردووشدا ئەو لە لێدوانێكی رۆژنامەوانیدا رایگەیاند، سەرۆك وەزیرانی عێراق شكستی هێناوە لە پاراستنی ئاسایشی وڵات و پێویستە دەست لەكار بكێشێتەوە و هەمیشە بە لێدوانە راشكاوانەكانی دژ بە گەندەڵی و بەرپرسیارێتی حكومەت لە ئاست كێشە و قەیرانەكانی ئەمڕۆی عێراق ناسراوە.

-----------------------------------

لە پەیجی (یه‌كێتی ئاینده‌یه) داوای لەتوپەتكردنی هۆزان مەحمود دەكرێت

وارڤین – هەولێر: تەنیا لەبەر ئەوەی لە كەناڵی ئاسمانی كوردسات میوانداری كرابوو، یەكێك لەو پەیجانەی بەرگری لە یەكێتی نیشتمانی كوردستان دەكات لە تۆڕی كۆمەڵایەتی فەیسبووك، پەلاماری كەسایەتیی چالاكوانی كورد (هۆزان مەحمود) ده‌دات و فانێكی پەیجەكەش داوا دەكات "لەتوپەتی بكەن".

تەنیا رێكلامی بۆ كراوە

مانگی  (ئەیلوول - سێپتێمبەر)ی رابردوو، كەسایەتی و چالاكوانی ژنی كورد (هۆزان مەحمود) بە سەردانێك لە دەرەوەی وڵاتەوە گەڕایەوە هەرێم و لە چوارچێوەی چالاكییەكانیدا لە بەرنامەی (بنەوشە)ی كەناڵی ئاسمانی (كوردسات) میوانداری كرا، بۆ قسە كردن لەسەر پرسێكی كۆمەڵایەتی تایبەت بە گەنجان، بەڵام بە هۆكارێكی رانەگەیەندراو بەرنامەكە تا ئێستا پەخش نەكراوه.

دوای پیشاندانی رێكلامی بەرنامەكە، لە چەند پەیجێكی ئەندام و لایەنگرانی یەكێتی نیشتمانی كوردستان لە تۆڕی كۆمەڵایەتی فەیسبووك وێڕای هێرشكردنە سەر كەسایەتی كورد (هۆزان مەحمود)، پەیجەكەی یەكێتی رەخنەی لە كەناڵی كوردساتیش گرتووە.

پەیجی (یەكێتی ئایندەیە) لەو بارەیەوە نوسیویەتی: "دەست خۆشی لە كوردسات دەكەین كە ھەموو ئەو كەسانە مقابەلە دەكات، كە ھەتا سەر ئێسقان دژی یەكێتین نەك دژ بەڵكو دوژمنی یەكێتین".

پەیجەكە بەوەوە نەوەستاوە و نوسیویەتی: "ئەم ژنەی كە لە وێنەكەدا دەر كەوتووە ناوی ھۆزان مەحموودە و لە وڵاتی بەریتانیا دەژی ھەر مزاھەرەیەك بكرێ یەكەم كەس دەبێت وێنەی مام جەلال بەرز دەكاتەوە و سوكایەتی پێدەكات... ئەم ھۆزان ناوە تەنانەت لە سەر كوشتنی (دوعا)ی جوانەمەرگ كە لە ژێر دەسەڵاتی یەكێتیش نەبوو لە مقابەلەی CNN ی كرد و خستیە پاڵ یەكێتی و ... بە بەرنامە كار بۆ ناشیرین كردنی یەكێتی دەكات ئێمەش بە بەرنامە كار بۆ گەورە كردنی دەكەین".

كۆمێنت و كاردانەوەكان

ئەو نووسینەی پەیجەكە كاردانەوەی جۆراو جۆری بەدوای خۆیدا هێناو فانەكانی ئەو پەیجە، كە بەشێكیان ئەندام و هەواداری یەكێتی نیشتمانیین لە رێگەی كۆمێنتەكانییانەوە بۆچوونی خۆیان دەربڕیوە.

(رۆژی ئازادی - Rozhi Azadi) لە كۆمێنتێكدا نووسیویەتی: "ئەوە خوێندمەوە، ئێستا چییان نووسیووە، ئەوانە دەیانەوێت هەموو یەكێ وێنەیەكی سەرۆكی حزبەكەیان بدەین لە یەخەمان. بەچاوان، بەڵام بەو مەرجەی ئەوان خزمەتكاری خەڵك بن نەك ماڵی میلـلەت تاڵان بكەن و بۆیشمان نەبێت بڵێین بۆچی وا لەو میللەتە دەكەن!".

(یاسین عەبدوڵڵا رەش - Yassin Abdullah Rash) نووسیویەتی: "ئەوانەی كۆمێنت و قسەی پڕوپوچ دەنوسن تەعبیر لە مستەوای رۆشنبیری خۆیان دەكەن".

هەروەها نووسیویەتی: "ئەو خانمە و خیزانەكەی خاوەن جوانترین مێژوون لەگەڵ یەكیتی، پێش هەموو شتێك ئەوە خوشكی شەهیدە، كە خۆی قەت باسی ناكات، من رێزم هەیە بۆ هۆزان خان و هەموو كارە جوانەكانی لە پێناوی مافی ئافرەتی كورد".

یەكێكی دیكە لە فانەكانی ئەو پەیجە بەناوی (كاروان كوردستانی - Karwan Kurdstany) نووسیویەتی: "ئەی ئێوە چی دەكەن؟ بۆ ناچن لەتوپەتی بكەن؟ یەعنی ناتوانن".

(شێرزاد عەبدوڵڵا) وێڕای رەخنەگرتن لە پەیجەكە نوسیویەتی: "هیچ كادیرێكی یەكێتی بەقەد ئەم خاتوونە بەڕێزە داكۆكی لە مافی ژافرەتی كورد نەكردووە" و لە بارەی كۆمێنتە نابەجێكانیشەوە نووسیویەتی: "ئەمانە هەموو شتی پووچە".

لەبەر زۆری كۆمێنتەكان و ناشیاوویان بۆ بڵاوكردنەوە، (وارڤین) بە پێویستی نەزانی نموونەی ئەو كۆمێنتانە بڵاوبكاتەوە كە دوور لە هەر جۆرە ئاكارێكی مرۆییانە پەلاماری كەسایەتی (هۆزان مەحمود)یان داوە.

"چەند هۆزانی دیكەمان هەیە"

هاوكات لەگەڵ پەلاماری فانەكانی پەیجی (یەكێتی ئایندەیە) بۆ سەر كەسایەتی چالاكوانی ژن (هۆزان مەحمود) بەشێك لە كۆمێنت نووسەكان بەرگرییان لە راستییەكان كردووە و پشتیوانی خۆیان بۆ چالاكییەكانی ئەو كەسایەتییەی كورد دەربڕیوە.

(سەلاح فەتحوڵڵا - Salah Fathulla) نووسیویەتی: "بەراستی مستەوای هوشیاریتان نزمە! لە باتی ئەوەی دەستخۆشی لە هۆزان خان بكەن، تەشهیرو قسەی ناشیرین ئەكەن، لە كوردستان چەند هۆزانی دیكەمان هەیە، هەموو ژیانی خۆی لە پێناوی ئازادی و بزوتنەوەی ژناندا تەرخانكردووە، ئەو تەشهیرانەتان زۆر منداڵانەیە و هیچ گوێگرێكی نیە بەداخەوە".

"سازش لەسەر بیروڕای خۆم ناكەم"

لە گوزارشتێكیدا كەسایەتی كورد (هۆزان مەحمود) روونكردنەوەیەكی لە واڵی خۆی لە تۆڕی كۆمەڵایەتی فەیسبووك بڵاوكردووەتەوە و تێیدا نوسیویەتی: "بۆ من هەموو كەناڵەكانی راگەیاندن پلاتفۆرمێكن بۆ بەیانكردنی بیروڕای خۆم. هەر كەناڵێكی لۆكاڵی، یان جیهانی جیاوازییان نییە لای من".

ئەو جەختیشی لەسەر ئەوە كردووەتەوە كە سازش لەسەر بیروڕاكانی خۆی ناكات و نووسیویەتی: "وەكو چالاكوانێك له هەر كات و شوێنێكدا تەنانەت لە كۆشكی سەرۆكایەتی دیكتاتۆرەكانیشدا بێت قسەی خۆم دەكەم و سازش لەسەر بیروڕای خۆم ناكەم".

هەروەها نووسیویەتی: "ئەم برادەرانە بە گیانێكی دوژمنانە و خنكاندنی ئازادی رادەربڕینەوە كاردەكەن لەسەر ناوزڕاندن و شێواندنی راستییەكان، لەلای من ئەمە دەمێكە سواوە و هیچ لە هەوڵدانم كەم ناكاتەوەو هەمیشە شوێنی من ناو سەنگەری خەڵكی ئازادیخواز و تێكۆشەری كوردستانە".

لە شاخ كلتووری تەور و لە شار كۆدی شەرەف

كەسایەتی كورد (هۆزان مەحمود) رایدەگەیەنێت، ئەوەی  دیارە من دەزانم ئەمە كولتوری هەموو یەكێتی نییە، بەڵام دیسان دەبێت لێیان بپرسین بۆ دەبێت ئەمە كولتوری بەشێكی زۆریان بێت؟ چییە وای كردووە ئەم بەڵتەچێتییە بەشێك بێت لە كولتوریان؟ دیارە بەشێكی زۆر لە سەركردەكانیان ئەمانەیان راگرتوە بەم شێوەیە لە پەیجەكانی یەكێتییەوە سوكایەتی بە كەسانی وەكو ئێمە بكەن".

هەروەها ئەو پێی وایە ئەمە درێژكراوەی كلتوورێكی پڕ لە نادادپەروەرییە كە لە شاخ پەیڕەو كراوە و بە كلتووریی "تەور وەشاندن" وەسفی دەكات و دەڵێ: "ئەمەش سواوە و ڕێسوایی بۆ ئەو كەسانە دەمێنێتەوە كە بەم كارانە هەڵدەستن. لە شاخ كولتوری تەور وەشاندن و لە شاریش كاركردن لە سەر كۆدی ناوگەوڵ و شەرەف بۆتە پیشەیان".

جێی ئاماژه‌یه‌ وێڕای تێپه‌ڕینی نزیكه‌ی سێ هه‌فته‌ به‌سه‌ر ئه‌و سووكایه‌تییانه‌ی به‌و چالاكوانه‌ ژنه‌ی كورددا كراوه‌، تا ئێستا به‌ شێوه‌ی ره‌سمی راگه‌یاندنی یه‌كێتی نیشتمانی كوردستان خۆی  له‌و په‌یجه‌ بێبه‌ری نه‌كردووه ئه‌مه‌ له‌ كاتێكدایه‌ په‌یجه‌كه‌ په‌یجی ره‌سمی ماڵپه‌ڕی (یه‌كێتی ئاینده‌یه) كه‌ یه‌كێكه‌ له‌ ماڵپه‌ڕه‌كانی سه‌ر به‌ یه‌كێتی نیشتمانی كوردستان.

----------------------------

كەركووكیەك: لە بەندیخانەی ژنانیش پۆلیسی ژن نییە

وارڤین – كەركووك: بە گوێرەی ئەنجامی راپرسی رێكخراوێكی كۆمەڵگەی مەدەنی (%58)ی ئەو كچانەی بەشدارییان كردووە لە راپرسییەكە خەون و ئاواتییان ئەوەیە ببنە پۆلیس، بەڵام تا ئێستا لە شاری كەركووك رێگە نادرێت كچان لە ریزی پۆلیسدا كار بكەن و بەڕێوبەری پۆلیسیش دەڵێ "ژنان خۆیان نایانەوێت ببنە پۆلیس".

ئەوانەی داوای دەكەن زۆرینەن

 بە گوێرەی راپرسیەكی كۆمەڵەی هیوا بۆ داكۆكیكردن لەمافەكانی مرۆڤ دەركەوتووە، لە سەدا (58)ی ئەو ژنانەی بەشدارییان كردووە لە راپرسیەكە ئارەزووی ئەوە دەكەن ببنە پۆلیس.

لە لێدوانێكی تایبەت بۆ (وارڤین) لێپرسراوی ئۆفیسی كەركووكی رێكخراوی كۆمەڵەی هیوا بۆ داكۆكیكردن لەمافەكانی مرۆڤ (سرود محەممەد) رایگەیاند، ئەوەی بەدی دەكرێت لەشارەكانی هەرێمی كوردستان و شارەكانی خوارو ناوەڕاستی عێراق ژنانی پۆلیس هاوشانی پیاوان كاردەكەن، بەڵام بەداخەوە تائێستا لە كەركووك  لە بەڕێوبەراتی پۆلیسی كەركووك، پۆلیسی ژن بوونی نیە.

گوتیشی: "لە كاتیكدا پێویستە زیندانیانی ژن لە ناو بەندیخانەی بەڕێوبەرایەتی پۆلیس لە لایەن پۆلیسی ژنەوە چاودێری بكرێن، بەڵام لەبەر نەبوونی پۆلیسی ژن، تەنیا پۆلیسی پیاو ئەو ئەركە ئەنجامدەدەن".

هەروەها گوتی: "ئێمە دەستپێشخەریەكمان كردووە و راپرسیەكەمان ئەنجامداوە و بە گوێرەی ئەنجامی راپرسییەكە، لە سەدا (58)ی بەشداران ئارەزووی ئەوە دەكەن بچنە ریزی پۆلیسەوە و ئەوان داواكارن لایەنە پەیوەندیدارەكان دەرگایان بۆ واڵا بكەن بۆ ئەوەی بتوانن لەو بوارەدا خزمەت بكەن".

بوون بە پۆلیسی هاتووچۆ خەونیەتی

(شاهیناز عەبدوڵڵا) كچێكی تەمەن (27 ساڵ)ە زۆر ئارەزوو دەكات ببێتە پۆلیسی هاتوچۆ، ئەو گوتی: "ئەم پیشەیە خەونی منە"، ئەو بە تامەزرۆییەوە باسی لەو ساتە دەكرد كە خەونەكەی بێتە دی، دەیگوت: "زۆر ئارەزوومە ببمە پۆلیسی هاتوچۆ"، بەڵام وەك خۆی گوتی: "بەداخەوە تائێستا  لە كەركووك دەرفەت بە ژنان نەدراوە تا ببنە پۆلیس".

"لە بەندیخانەی ژنانیش پۆلیسی ژن نییە"

بە گوێرەی زانیارییەكانی (وارڤین) بەندیخانەی تایبەت بە ژنان تەنیا لە لایەن پیاوانی پۆلیسەوە چاودێری و سەرپەرشتی دەكرێت و هێششتا بەرێوبەرایەتی پۆلیسی كەركووك نەیتوانیوە پۆلیسی ژنی بۆ دابین بكات.

"بەڕێوبەرایەتی پۆلیس، كە بەندیخانە ژنانی تێدایە، بەڵام تا ئێستا پۆلیسێكی ژنی نیە" ئەمە قسەی (لاولاو كامەران)  كچێكی تەمەن (18 ساڵ)ە خوێندكاری قۆناغی دواناوەندیە، ئەو كچە پیشەی پۆلیسی بە "گرنگ" ناودەبات و دەڵێ: "بوون بە پۆلیس كارێكی گەورەیە و ئەركێكی پیرۆزە، لە شاری كەركووك  ئەم ئەركە بۆ پۆلیسی پیاو ئەستەمە، بۆ ژنان هەر زۆر لەوە زیاتر قورسترە". ئەو كچە زیاتر گوتی: "ژنان لە پیاوان زیاتر دەتوان رۆڵی خۆیان ببین".

(لاولاو) دوودڵ نییە لەوەی یەكەم كچ بێت، كە ناوی خۆی بنووسێت بۆ ئەوەی بچێتە ریزی پۆلیسەوە، "لەهەركاتێكدا پێویستیان بە پۆلیسی ژن هەبێت ئەوە منیش بێ دوو دڵی یەكەم كچ دەبم  ناوی خۆم تۆماردەكەم، بەبێ ئەوەی گوێ بەدابونەریت بدەم, چونكە نازانم جیاوازی چیە لەنێوان ژنێكی فەرمانبەر و پۆلیسێك  هەردووكیان بەبڕوای من دێنە دەرەوە بۆ كاركردن بۆیە، هیوادارم ژنان گوێ بەم جۆرە بیركردنەوانە نەدەن"، ئەو وای گوت.

(ئیمان عەباس)  كچێكی دیكەی تەمەن (25 ساڵ)ە  ئەو كچە باسی لەوەكرد، "تا ئێستا لەشاری كەركوك پۆلیسی ژن بەدی ناكرێ، هۆكارەكەشی دەگەڕێتەوە بۆ دوو هۆ یەكەم  دابونەریت  و قسەو باسی كۆمەڵگە، هۆكاری دووهەمیش  بەڕێوبەرایەتی  پۆلیس تائێستا گرنگی نەداوە بەو بوارە. لەكاتێكدا زۆر پێویستە ژنان بوونیان هەبێن".

پاساوی دانەمەزراندنی پۆلیسی ژن چییە؟

لە پارێزگاكانی ناوەڕاست و خوارووی عێراق وەك قۆناغی یەكەم گرنگی بە بەشداری ژن دراوە لە ریزی پۆلیسدا و ئەوەی جێگەی نیگەرانیی ژنانی كەركووكە، ئەوەیە تا ئێستا لە شارەكەیاندا رۆڵ و بایەخی ئەوان بۆ بەشداریكردنیان لە ریزی پۆلیس بە گرنگ نازانرێت.

(ئیمان) رەخنەی لە بەڕێوبەرایەتی پۆلیسی كەركووك گرت و گوتی: "ئەگەر پاساوی ئەوە دێننەوە، گوایە كەدامەزراندنیان نیە، ئەوا رۆژ نیە پۆلیس لەم شارە نەبێتە قوربانی, ئەی شوێنی ئەو پۆلیس و ئەفسەرانە بەچی پر دەكرێتەوە, بۆچی ناتوانن ئەو بۆشاییانە بە پۆلیسی ژن پڕبكرێنەوە".

ژنی كەركووك لە شارەكانی دیكە پۆلیسن

سەرەڕای ئەو پاساوانەی دەهێندرێنەوە بۆ پەراوێزخستنی رۆڵی ژنان لەو بوارە تایبەتەدا و دەگوترێت "نەریتی باوی كۆمەڵایەتی شارەكە رێگرە"، بەڵام بەرپرسی ئۆفیسی كەركووكی كۆمەڵەی هیوای عێراقی (سرود محەممەد) بە پێچەوانەوە بیر دەكاتەوە و دەڵێ: "ئەو ژنانەی لەشارەكانی هەرێم پێشمەرگە و پۆلیس ولێكۆڵەرن، بەشێكی زۆریان كەركووكین، ئەی بۆ ناتوانن لەشارەكانی خۆیان ببن بەپۆلیس".

گوتیشی: "ئێمە نەبوونی پۆلیس دەگەڕێنینەوە بۆ كەمتەرخەمی بەڕێوبەراتی پۆلیسی كەركووك، كە تا ئێستا نەمان بینی رۆژێك داوای پۆلیسی ژن بكەن، لە كاتێكدا زۆر پێویستە".

هەروەها گوتی: "بەعەیبی نازانم  ژن بێت بەپۆلیس، بەڵام بەعەیبی دەزانم ژن لە بەندیخانە منداڵی بێت و بەهۆی نەبوونی ژنی پۆلیسەوه، ‌پۆلیسی پیاوی لەدیار بێت".

ئەو گوتیشی: "من دڵنیام ژنانی پۆلیس دەتوانن رۆڵیان هەبێت لەئارام راگرتنی شارەكەمان".

پۆلیس چی دەڵێت؟

بەڕێوبەری گشتی هێزەكانی پۆلیسی كەركووك  لیوا (جەمال تاهیر) لەوبارەیەوە بۆ (وارڤین) قسەی كرد و گوتی: "ئێمە هەوڵی زۆرمانداوە بۆ ئەوەی ژنان بوونیان هەبێت، وەك ئەفسەر و لێكۆڵەر, داواشمان كردووە,  لەئێستادا، ئێمە بەشێكمان هەیە بەناوی پاراستنی ژنان و منداڵان پێویستمان بەوەیە پۆلیسی ژن  دابمەزرێنین".

ئەو بەرپرسە باڵایەی پۆلیس یەكێك لە هۆكارنی بێبەشبوونی ژنانی لەو بوارە گەڕاندەوە بۆ حكومەتی ناوەند و گوتی: "بەداخەوە، بەغدا بۆمان ناكات".

سەبارەت بە هۆكارەكانی دیكەی بێبەشبوونی ژنان، لیوا (جەمال تاهیر) بە پێچەوانەی ئەنجامی راپرسییەكەی كۆمەڵەی (هیوا) قسەی كرد و گوتی: "ژنان خۆیان نایانەوێ بێنە ئەو بوارە,  هیچ ژنێك رازی نیە خەفەریات بگرێت، بمێنێتەوە لەناو پۆلیسە پیاوەكانی هاوكاری یان بەهۆی كەمی مووچەكانیان  نایانەوێت دابمەزرێن".

ئا: نێرگز قادر

-----------------------------

بەغدا: تەرمی ژنێك بە سەربڕاوی دۆزرایەوە  

وارڤین - بەغدا: سەرچاوەیەك لە پۆلیسی عێراق رایگەیاند،  لە رۆژئاوای شاری بەغدا، تەرمی ژنێكی نەناسراو بە سەربڕاوی لەلایەن هێزە ئەمنیەكانی ئەو دەڤەرە دۆزراوەتەوە.

سەرچاوەكە گوتی: "ئێوارەی رۆژی دووشەممە (12 / تشرینی دووەم – نۆڤەمبەر / 2012)، هێزەكانی پۆلیس تەرمی ژنێكیان لە رۆژئاوای بەغداد  بەسەربڕاوی دۆزیەوە و تاكو ئێستا ناسنامەی ئەو ژنە دیارنیە".

هەروەها سەرچاوەكەی پۆلیس، كە نەیویست ناوی ئاشكرابكرێت، گوتیشی: "تەرمی ئەو ژنە رەوانەی فەرمانگەی دادپزیشكی كراوە، بۆ لێكۆڵینەوە لەسەر چۆنیەتی روودانی تاوانەكە و ئاشكراكردنی ئەو لایەنانەی كە پەیوەندیان بەو رووداوەوە هەیە".

لە ماوەی رابردوودا شاری بەغداد چەندین رووداوی لەم شێوەیەی بەخۆیەوە بینیوە و تاكو ئێستا چەندین تەرمی هاووڵاتیان دۆزراونەتەوەو هاوكات تەرمی پیاوانی پۆلیس و دەزگا ئەمنیەكانیشی تێدابوون.

--------------------

كۆیە: دوای خۆسووتاندنی ژنێكی 22 ساڵ ژیانی لەدەستدا 

وارڤین – كۆیە: (ساوێن پیرۆت ئەحمەد) تەمەن (22 ساڵ) دوای حەوت مانگ لە پرۆسەی هاوسەرگیری بەهۆی بوونی كێشە لەگەڵ هاوسەرەكەی، پێشنیوەڕۆی دوێنێ خۆی سووتاند و سەر لە ئێوارەش بەهۆی زۆری سووتانەكەیەوە ژیانی لەدەستدا.

لە لێدوانێكی تایبەت بۆ (وارڤین) بەرپرسی نووسینگەی بەدواداچوونی توندوتیژی دژ بە ژنان لە كۆیە، ملازم (دانا حاجی عەبدوڵڵا) رایگەیاند، پێشنیوەڕۆی دوێنێ یەكشەممە (11 / تشرینی دووەم – نۆڤەمبەر / 2012) لە ماڵی باوكی لە گەڕەكی (قەندیل)ی شارۆچكەی كۆیە ژنێكی تەمەن (22 ساڵ)، خۆی سووتاند و دوای گواستنەوەی بۆ نەخۆشخانە، خرایە ژێر چاودێری پزیشكییەوە.

گوتیشی: "ژنەكە ناوی (ساوێن پیرۆت ئەحمەد)ە و لەدایكبووی (1992)ە و ماوەی (7) مانگە چووەتە ناو پرۆسەی هاوسەرگیرییەوە".

دوای چارەسەری سەرەتایی لە كۆیە، پۆلیس وتەی لە (ساوێن) وەرگرتووە و لە وتەكەیدا بە پۆلیسی راگەیاندووە، كە "كێشەی لەگەڵ هاوسەرەكەی هەبووە و بۆیە خۆی سووتاندووە".

بە گوێرەی زانیاری ئەو بەرپرسەی نووسینگەی توندوتیژی، بۆ چارەسەری پێویست لە كۆیەوە (ساوێن) گواستراوەتەوە بۆ نەخۆشخانەی تایبه‌ت به‌ سووتان له‌ (هەولێر) و لەوێش پۆلیس وتەی وەرگرتووە و هۆكاری خۆ سووتاندنی گەڕاندووەتەوە بۆ بوونی كێشە لەگەڵ هاوسەرەكەی.

بەهۆی زۆری رێژەی سووتانەكەیەوە، (ساوێن)ی (22 ساڵ) ئێوارەی دوێنێ یەكشەممە بۆ هەمیشە چاوی لێكناو ژیانی لەدەستدا.

بە گوێرەی زانیارییەكانی (وارڤین)، (ساوێن) ژنی ماڵەوە بووە و ماڵیان لە گەڕەكی (فیدراڵی)ی كۆیە بووە، بەڵام لە كاتی خۆ سووتاندنیدا بەهۆی كێشەوە ماڵی خۆیانی بەجێهێشتووە و گەڕاوەتەوە ماڵی باوكی لە گەڕەكی (قەندیل) و لەوێ خۆی سووتاندووە.

زانراوە لە نەخۆشخانەی تایبەت بە سووتان لە هەولێر، (ساوێن) هاوسەرەكەی بە هۆكاری خۆ سووتاندنی ناوبردووە و سكاڵای لەسەر تۆمار كردووە و بەو هۆیەوە دادوەر فەرمانی دەستگیركردنی بۆ (أ.)ی هاوسەری كە بە پیشە پۆلیسە لە شارۆچكەی كۆیە دەركردووە.

ئا: ئەرسەلان رەحمان
http://warvin.org