بنیامین ناتانیاهۆ: "هەموو جیهان سەركوتكردنەكانی قەزافی بە تاوان داناوە، لەگەل ئێرانیش بەوشێوەی بجووڵێنەوە."
بەر پەرچدانەوەی بنیامین ناتانیاهۆ بەرامبەر خۆپێشاندانە بەربڵاوەكان كە كەسانی ناڕازی و ناكۆك لەگەڵ كۆماری ئیسلامی ئێران، لە تاران و چەندین شاری دیكە بەڕێوەچوو، كە بەم شێوەیە بوو، "هەموو جیهان دەبێ لەگەڵا حكومەتی ئێراندا بەوشێوە هەڵسوكەوت بكات كە بەرامبەر بە حكومەتی سەركوتكەری مەعمەر قەزافی لە لیبیادا بەڕێوەیان برد".
هەرچەندە راگەیاندنە گشتیەكانی كۆماری ئیسلامی ئێران بەڕێوەچوونی خۆپێشاندانە گشتگیرییەكەی خەڵكیان لە تاران و چەندین شاری دیكە بەو جۆرە پیشاندا، كە گوایە هیچ شتێك نەبووە و زۆر بێدەنگە، هەروەها دەیانگووت: ئەو قەرەباڵغییەی شارەكانی ئێران بە هۆی كڕینی شتوومەكی جەژنی نەورۆزەوە بووە، بەڵام كۆی هەڵسەنگاندنەكان باس لەوە دەكەن كاری سەركوتكەرانەی حكومەتی ئیسلامی ئێران، نەك هەر نەیتوانی رێگر بێت لەبەردەم خۆپێشاندانەكانی خەڵك، بەڵكو لە هەندێ كات و شوێنی تاران رێژەی خۆپێشاندەران زیاتر لە رۆژی یەكی ئیسفەند و 25 بەهمەن بوو.
لە راپۆرتەكانی ئەمڕۆی راگەیاندنەكاندا هاتووە لە تاران و شارەكانی دیكە سەدان كەس دەست بەسەر كراون، بەڵام خۆپێشاندەران خۆیان بۆ خۆپێشاندانی گەورەتر ئامادە دەكەن،هەوڵدەدەن هەلومەرجێك پێكبێنن كە خۆپێشاندانەكان بەشێوەی بەردەوام درێژەی هەبێت و بەدواداچوونی بۆ بكرێت.
كار و پرۆسەی حكومەت بۆ بەرگری و رێگربوون لەبەردەم خۆپێشاندانەكانی ناوخۆی ئێران، زیندانیكردنی (میرحسێن موسەوی و مەهدی كەڕوبی)و هاوسەرەكانیان بوو، كە ئەمەش ناڕەزاییەكی گەورەی كۆمەڵگەی نێودەوڵەتیی لێكەوتەوە، بە بڕوای زۆرێك لە چاودێرانی سیاسی سەركوتكردنی هاوڵاتیان لەلایەن كۆماری ئیسلامی ئێرانەوە بارودۆخەكە رۆژبەرۆژ بەرەوە ئاقارێكی خراپتر دەڕوات و متمانەی هاوڵاتیان بە دەستەڵات كەمتر دەبێتەوە.
شێوازی نوێی سەركوت و خۆڕاگری لە بەرامبەریدا:سەرۆك وەزیرانی ئیسرائیل بنیامین ناتانیاهۆ، لە یەكەم كاردانەوەی بۆ خۆپێشاندانەكانی ئێران لە تاران و شارەكانی دیكەی ئێران رایگەیاند: " لە حاڵێكدا خوشحاڵین بەوەی گوشاری نێودەوڵەتی بۆ سەر حكومەتی سەركوتكەری مەعمەر قەزافی هاتۆتە ئاراوە، چاوەڕوانی ئەوەش دەكرێ گوشارێكی لەوشێوە بخرێتە سەر حكومەتی ئێران، كە لە سەركوتكردندا هاوڵاتیانی دەسەڵاتی لیبیایە". هەروەها بە سەرسوڕمانەوە دەڕوانێتە بوونە ئەندامی دەوڵەتی لیبیا لە لیژنەی مافی مرۆڤ، ئەو لیژنەیەی كە لەم ساڵانەی دواییدا زیاتر لە دوو لە سەر سێی بڕیارو پەیماننامە داخراوەكانی دژ بە ئیسرائیل دەركردووە و چاوپۆشی كردووە لە زۆربەی سەركوتكارییەكانی حكومەتە دیكتاتۆرەكان.
پەیامنێری ئازاد لە تاران دەڵێت: هەرچەندە حكومەتی ئێران رێگای تازەیان بۆ رووبەڕووبونەوەی خۆپێشاندەران دۆزیوەتەوە، بەڵام لە بەرامبەریشدا خەڵكی خۆپێشاندەران لە زۆر رێگەی دیكەوە درێژە بە خۆپێشاندانەكانیان ئەنجام دەدەن، بە ئاشكرا دیارە كە خەڵك ئیتر ترسی لە حكومەت و پیاوانی سەكوتكار نەماوە.
لە هەمانكاتدا چاودێرانی سیاسی بڕوایان وایە: بەردەوامبوونی خۆپیشاندانەكان پەیوەستە بە نەمانی ترس لە حكومەت و پیاوانی كوتەك بە دەستی دەسەڵات، هەر ئەمەش دەبێتە هۆی یەكەم شت بۆ بەردەوامبوون و وەڕێخستنی بزووتنەوەیەكی بەرین و رێكخراوی وەك میسر و تونس وڵاتانی دیكەی عەرەبی.
بە پێی سەرچاوەكانی هەواڵ خۆپێشاندانەكانی ئێران تەنها تارانی پایتەختی وڵاتی نەگرتبووەوە، بەڵكو لە زۆربەی شارە گەورەكانی وەك: مەشهەد، شیراز، ئیسفەهان، كەرەج، كرمانشاە، سمنان و چەندین شاری دیكە خەڵك هاتنە ناو شەقامەكان و دژی حكومەتی سەركوتكەری ئیسلامی ئێران دروشمیان بەرز كردەوە.
هەواڵنێری ئازاد لە ئێرانەوە رایدەگەینێت: لە شەقامەكانی تاران هیچ دروشمێك دژی ئەحمەدی نەژاد نەگوتراوە و زۆربەی دروشمەكان "مەرگ بۆ دیكتاتۆر" بووە، كە ئاماژەی راستەوخۆ بووە بۆ سەید عەلی خامنەیی وهەموو پەیكەری رژێمی ئیسلامی ئێران.
پسپۆڕانی شارەزا سەبارەت بە ئێران دەڵێن: "سێیەمین خۆپێشاندانی ناوخۆی ئێران تەنها لە هەفتەیەكدا مانایی ئەوەیە كە هەموو كارێكی رژێم بەرامبەر بە خۆپێشاندەران وەك گرتن و كوشتن و بڕین و لەسێدارەدان نەیتوانیوە رێگر بێت لەبەردەم هاتنەكایەی مافی خۆپێشاندەران، بۆیە ئەوەی ئێستا بە ناوی "بزووتنەوەی سەوز" لە گۆڕەپانەكەدایە، لە راستیدا هەموو گروپە ناڕازی و ناكۆكەكانی دژ بە رژێم لە خۆ دەگرێت، نەك بە تەنها ئەو بزوتنەوەیە.
هەروەها لەلایەكی دیكەوە پسپۆڕانی سیاسی بڕوایان وایە، لەم دواییانەدا هیچ كوشتنێك یان بڕینداربوونێك لە ناو خۆپێشاندانەكاندا نابێنرێت، ئەوەش هێمای ئەوەیە حكومەت ترساوە لەوەی خەڵك و ناتوانێت كوشتن و بڕین بكات، چونكە ئەو كارەیان زیاتر خەڵك تووڕە دەكات و هەر بەوجۆرەی كە لە وڵاتانی دیكە بینرا، بۆیە ئەگەری ئەوە هەیە كە رووبەڕووی لۆمە و ناڕەزایی لەڕادەبەدەری جیهانی ببێتەوە و پایەی سیستمی حكومەتی ئێران لاواز بكات.
لە هەندێ شوێن بینراوە بۆ دەربڕێنی پاڵپشتی لە خۆپێشاندەران، شۆفێرەكان بە بەردەوامی هۆڕینیان لێداوە، بەڵام تەنانەت پاش ئەوەش كە پیاوە لومپەنەكانی حكومەت شووشەی ئوتومبیلەكانیان دەشكێنن، دەنگی هۆڕین زیاتر بەردەوام دەبێت و نابڕێتەوە.
پلانی ئیسراییل بۆ جێبەجێكردنی گەماڕۆ دژ بە رژێمی ئێرانكلینتون: "ئێران دەستوەردەداتە نێو وڵاتانی عەرەبییەوە"
بەپێی سەرچاوەیەك كە لە رۆژنامەیەكی ئیسرائیلیدا بڵاوبووەتەوە، وەزیری دەرەوەی ئیسرائیل پلانێكی بۆ زیاتركردنی گەمارۆ دژ بە حكومەتی ئێران ئامادە كردووە و ئامانجی چالاكی لەڕادەبەدەری ئیسرائیلە بۆ جێبەجێكردنی ئەم گەمارۆیە و دووركەوتنەوەی پەیوەندی بازرگانی لەگەڵ ئەو كۆمپانیانەی كە لەگەل حكومەتی ئیسلامی ئێران كاری بازرگانی دەكەن. رۆژنامەی مەعاریف (Maariv) لە دوایین ژمارەیدا نووسیویەتی: ئەڤیگۆر لیبەرمەن لەمبارەیەوە پلانێكی بۆ هەڵسەنگاندن و واژۆكردن داوەتە لیژنەی دەوڵەتی ئیسرائیل كە بەمزوانە لە كۆبوونەوەیەكی هەفتانەی كابینەدا باسی لە سەر دەكرێت. هێشتا بەرپرسانی وەزارەتی دەرەوەی ئیسرائیل هیچ جۆرە راپۆرتێكیان لەمبارەیەوە پیشان نەداوە.
هاوكات وەزیری دەرەوەی ویلایەتە یەكگرتووەكان ئەمریكا هیلاری كلینتۆن حكومەتی تارانیان بەوە تاوانبار كردووە كە پەیوەندی نهێنی لەگەل ئوپوزسیۆنی وڵاتانی میسر و بەحرەین و یەمەن و وڵاتانی دیكەدا هەیە، تا بتوانێ لە داهاتوودا كاریگەری لە سەر هەموو وڵاتانی عەرەبی هەبێت. ناوبراو لە هەمان كاتدا جەختی لە سەر ئەوە كردەوە كە ویلایەتە یەكگرتووەكان لەگەل گروپە سیاسیەكانی وڵاتانی عەرەبی لە پەیوەندیدایە، بەڵام هیچ جۆرە دەستێوەردانێك لە چالاكییەكانیاندا ناكات. بۆیە هەر لەم بارەیەوە داوای لە كونگریسی ئەمریكا كرد كە یارمەتییەكی سەد ملیۆن دۆلاری ببەخشێتە سوپای لوبنان.
هەر لە هەمان رۆژنامە و لە ژمارەی ئەمرۆیدا لە راپۆرتێك سەبارەت بە بەرنامە ئەتۆمییەكەی ئێران بڵاوی كردەوەتەوە كە، وەزارەتی دەرەوەی ئیسرائیل لە هەوڵی ئەوەدایە زیاتر گەمارۆ بخاتەسەر رژێمی ئێران، چونكە گومان لەوە دەكرێت ئێران بە كەڵك وەرگرتن لە قەیرانەی كە هەموو ناوچەكەی گرتووەتەوە و بووەتە هۆی سەرنجڕاكێشانی كۆمەڵگەی جیهانی بۆ سەر وڵاتانی عەرەبی، هەوڵدەدات خێراییەكی زیاتر بداتە بەرنامە ناوەكییەكانی.
رۆژنامەی مەعاریف نووسیویەتی: ئەم پلانە بۆ هەڵسەنگاندن دراوەتە وەزارەتە جۆراوجۆرەكان و دوایی دەدرێتە لیژنەی دەوڵەت. ئەم رۆژنامەیە باسی ئەوەشی كرد، لە حاڵێكدا یەكێتی ئەوروپا و هەندێ وڵات وەك ژاپۆن پلانی گشتگیریان هەیە دژ بە رژێمی ئێران كە گەمارۆی ئابوری بخەنە سەر، لەم راپۆرتەدا هاتووە ئیسرائیل بۆ جێبەجێكردنی گەمارۆكانی ئێستا بە رادەی پێویست چوارچێوەی یاسایی و رێسای جێبەجێكاری دابین نەكردووە، ئەمەش لە حاڵێكدایە بە پێی چوارچێوەی لیژنەی ئەمنیەتی دژ بە بەرنامە ناوەكییەكانی ئێران هەندێ گەمارۆی دیاری كردووە بە شێوەی زنجیرەیی كە جێبەجێیان بكات.
بە رای پسپۆڕانی یاسایی: لەبەرئەوەی ئێران و ئیسرائیل پەیوەندیی دوو لایەنەیان نیە و كاری بازرگانی ناكەن پێویست بە گەمارۆ ناكات، لە بەرامبەردا دەبێت ئیسرائیل هاوكاری نەكات لەگەڵ ئەو كۆمپانیانەی كە كاری بازرگانی لەگەل ئێراندا دەكەن، بۆ جێبەجێكردنی گەمارۆی لەوشێوە باشتر وایە لە لایەن لیژنەی ئەمنیەتی جیهانیەوە بەڕێوە بچێت و یاسا و رێسای پێویست بگرێتە بەر. بۆ دابینكردنی پلانی نوێی وەزارەتی دەرەوەی ئیسرائیل، چەندین وەزارەتخانەی دیكە بەتایبەتی وەزارەتی بەرگری و پیشەسازی و بازرگانی و دادگا و نووسینگەی سەرۆك وەزیران هاوكارییان تیا هەبووە.
كلینتون: حیزبوڵڵای لوبنان دەڵاڵی حكومەتی ئێرانە لە وڵاتانی عەرەبیدا"وەزیری دەرەوەی ئەمریكا لە كاتی كاروباری كۆمیسیۆنی دابەشكردنی بودجەی سەنای ئەمریكا ڕایگەیاند: "ویلایەتە یەكگرتووەكان دەیەوێ زنجیرەیەك گەمارۆی بەرین بخاتە سەر حكومەتی تاران بۆیە پێویست بە رەزامەندی كۆمەڵگەی نێودەوڵەتی هەیە، هیلاری كلینتون لەم دانیشتنەیدا لەگەل ئەوەی باسی داواكاری سەد ملیۆن دۆلار یارمەتی دارایی بۆ بنیاتنانەوەی لوبنان كرد، كۆماری ئیسلامیشی بەوە تۆمەتبار كرد، كە نەك هەر لە لوبنان بە سوودی حیزبوڵڵا دەستێوەردان دەكات بەڵكو پەیوەندی لەگەل ئۆپۆزیسیۆنی چەندین وڵاتی دیكەی عەرەبی هەیە لەوانەش، میسر و بەحرەین و یەمەن، هەروەها هەوڵدەدات هەر لە ئێستاوە كاریگەری لە سەر داهاتووی سیاسی ئەو وڵاتانە دابنێت.
دوا بە دوای ئەوەش گوتی: دەڵاڵی كۆماری ئیسلامی لەم نێوەندەدا حیزبوڵڵای لوبنانە، كە لەگەل فەلەستینیەكاندا پەیوەندی هەیە و لە رێگای ئەوانەوە پەیوەندی لەگەڵ ئۆپۆزسیۆنی میسردا هەیە. هاوكات ئێران یارمەتی دەگەیەنێتە بەحرەین و لەو رووداوانەش لە یەمەندا تێپەڕ دەبێت كاریگەری هەیە. بۆیە سەرۆكی ولایەتەیەكگرتووەكانی ئەمریكا باراك ئۆباما دەیەوێ گەمارۆی زیاتر بخاتە سەر ئێران و كۆمەڵگەی نێودەوڵەتیش جەختی لە سەر بكاتەوە.
هەر لەمباریەشەوە و لە كاروباری كومیسیۆنی بودجەی سەنای ئەمریكا هەندێ لە سەناتورەكان رەخنەیان گرت كە ویلایەتە یەكگرتووەكان بە پێی پێویست و بە گوێرەی كۆمپانیا گەورە نێودەوڵەتییەكان گەمارۆی نێودەوڵەتی ناخاتە سەر بەرنامەی چەكی ناوەكی ئێران. كلینتونیش گوتی هەوڵەكانمان چڕتر دەكەینەوە لەو بارەیەوە.
هەر لە بارەی دەوڵەتی لوبنان و كاریگەری حیزبولڵا لە ئایندەی ئەو دەوڵەتە، وەزیری دەرەوەی ئەمریكا ڕایگەیاند: ئەو وڵاتە پێش ئەوەی پێشكەشییە مادییەكانی بداتە لوبنان، لە نزیكەوە داهاتووی سیاسی و شێوەی بەڕێوەبردنی دەوڵەتی نوێ چاودێری دەكات بۆیە لە ئێستادا كاریگەری حیزبوڵڵا لە دەوڵەتی نوێی لوبنان مەزندە ناكرێت.
ویلایەتە یەكگرتووەكان سیاسەتی خۆی پاش رەخنە لە چۆنیەتی كاركردنی سەرۆك ئوباما بەرامبەر بە موبارەك دەگۆڕێت.
پاش ئەو رەخنانەی كە لە سیاسەتی پرزیدێنت ئوباما گیرا كە دوای حكومەتەكەی موبارەك لە میسردا خرایەڕوو، پێشهاتەكانی دەوڵەتی واشینگتن ئەوەی خستەڕوو كە ویلایەتە یەكگرتووەكان بە دوای دابینكردنی شێوە كاركردنێكی نوێوەیە كە لەو رێگایەوە دوورەپەرێزی بكات لە پاڵپشتی كردنی یەك لایەنەی خۆپێشاندەران دژ بە حكومەتەكانیان، لە بەرامبەر ئەمەشدا داوا لە حكومەتەكان دەكات بۆ جێبەجێكردنی چاكسازی و ئازایی زیاتر بۆ خەڵك هەنگاوی جدی بنێن. لەم دواییانەدا كە رەخنەی زۆر لە دەوڵەتی ئوباما گیرا بە خستنەڕووی ئۆلتیماتۆمی جیدی لە سەر ئەم مەسەلەیە كە دەبێ پرزیدێنت ئوباما بڕوات لە راستیدا زیانی لە سەقامگیربوونی میسر و ئارامی ناوچەكە گەیاند و هەمیشە ئەم ئەگەرە لە ئارادایە كە گروپە فەندەمینتاڵەكان و بەتایبەتی بنیاتنەگەرا ئیسلامیەكان بتوانن كەڵك لەو هەلومەرجە وەربگرن و هەل بڕەخسێنن بۆ بەهێزكردین خۆیان و تەنانەت دەست بە سەر حكومەتدا بگرن.
پسپۆڕانی سیاسی رایانگەیاندبوو، كە سیاسەتی پێشویی ویلایەتە یەكگرتووەكان نەك یارمەتیدەر نەبووە بۆ پێشخستنی دیموكراسی لە رۆژهەڵاتی ناوەڕاست، بەڵكو بووەتە هۆی دەست بەسەراگرتنی كەسە توندڕەوە و دژە دیموكراتەكان لە ناوچەكەدا.
رووخانی رژێمە میانەڕەوەكان لە بەرژەوەندی حكومەتی ئێراندایە:
رۆژنامەی ئەمریكی (واڵ ستریت جۆرناڵ) لە ژمارەی دەرچووی بەرواری 5ی مارتدا نووسیویەتی: بە هۆی سیاسەتی جێبەجێكاری نوێی ویلایەتەیەكگرتووەكان هاوڕێیە كۆنەكانی هاندەدات بۆ جێبەجێكردنی چاكسازی سیاسی و كۆمەڵایەتی، هەروەها هەوڵبدات ویستی خۆپێشاندەران لە بەرامبەر ئەم حكومەتانەدا لاینگریان لێناكەن.
كاربەدەستە سیاسیەكانی ئەمریكا كاردانەوەیان بەرامبەر ئەو رەخنانە كە بۆچی ئوباما بەمشێوەیە دژی موبارەك پێداگری دەكات و داوای كردووە زوو بە زوو پۆستەكەی بەجێبهێڵێت، رایانگەیاند: جاران سەرۆك كۆماری ویلایەتە یەكگرتووەكان داوای لە سەرۆكی میسر كردبوو كە دەست بداتە چاكسازی دیموكراتی، لە بەرامبەردا موبارەك ئەو پێشنیارانەی رەتدەكردەوە بەو بیانوویە كە رەنگە ئیخوان ئەلموسلمین كە گروپێكی بنیاتگەرایە بێتە سەر كار.
بەپێی سەچاوەكانی ئەو رۆژنامەیە، ئەگەر سەرۆكەكانی وڵاتانی رۆژهەڵاتی ناوەڕاست ئامادە بن دەست بدەنە جێبەجێكردنی چاكسازی، تەنانەت ئەگەر ویست و داواكاری سەرەكی خۆپێشاندەران دابینكردنی دیموكراسی بێ، دیسانەوە دەوڵەتی ئەمریكا پاڵپشتی لەو دەوڵەتە چاكسازیخوازەكان دەكات.
پسپۆڕانی سیاسی بڕوایان وایە، سیاسەتێكی بەو شێوەیە،بە تایبەتی بۆ وڵاتێكی میرنشنی بەحرەین زۆر گرنگە. لەحاڵێكدا كە ئەم میرنیشنە لەگەڵ ویلایەتە یەكگرتووەكان هاوكاری سەربازی تەواوی هەیە و تەنانەت شوێن و رێگای بۆ نۆكەندی دەریایی ئەمریكا كردووەتەوە، بەشێكی زۆری خۆپێشاندەران لە لایەن گروپە توندەڕەوە شیعیەكانەوە هاندراون، كە لەگەڵ رووخانی سیستمی ئێستای سوننەكان ئەگەری زۆرە بەحرەین بكەنە پێگەی كۆماری ئیسلامی ئێران.
پسپۆڕە سیاسیەكان لە ئەمریكادا نیگەرانی خۆیان لەمەڕ ئەوە دەردەبڕن ئەگەر دەوڵەتی واشینگتۆن پاڵپشتی خۆپێشاندەرانی بەحرێنی بكات، بەوجۆرەی پشتی لە موبارەك كرد، هەر بەو شێوەیەش میری بەحرەین بە تەنها بهێڵێتەوە، ئەوسا هەموو میرنیشنە عەرەبیەكان دەكەونە بەر مەترسی لەناوچوونی رێبەرەكانی ئێستایان.
رۆژنامەی واڵ ستریت جورناڵ بڵاوی كردووەتەوە، بەرپرسانی وڵاتانی میانەڕەوی عەرەب ئاگادارییان داوەتە وڵاتەكانیان كە رووخانی حكومەتەكانی ئێستا بۆشاییەكی سیاسی دروست دەكات كە كۆماری ئیسلامی ئێران ئەو بارودۆخە لە بەرژەوەندی خۆی بقۆزێتەوە ئەم كارەش دەبێتە هۆی بەهێزكردنی شیعەكان لە ناوچەكەدا.
وڵاتانی عەرەبی و درێژەی نائارامییەكان
لە وڵاتی لیبیا، موعمەر قەزافی نایەوێ دەست لە كورسییەكەی بەردات، بەڵكو هێزە سەربازییەكەی بەهێزتر كردووە بۆ ئەوەی ئەو شار و ناوچانەی كەوتووەتە دەستی شۆڕشگێڕەكان وەریبگرێتەوە. لە شاری (ئەلزاوییە) یەكە سەربازییەكانی قەزافی هەوڵیان داوە ئەو شوێنە لە دەستی خۆپێشاندەران بهێننە دەرەوە، بەڵام دژەبەرە چەكدارەكانی رژێم توانیان ئەم هێرشە بەتاڵ بكەنەوە و پاشەكشە بە هێرشبەرەكانی حكومەت بكەن.
شۆڕشگیرانی لیبیا دەڵێن ،سەدان كەسی چەكداری سەر بە قەزافی بە دەبابە و جلی درعەوە هێرشیان كردووەتە سەر شاری ئەلزاوییە، بەڵام خۆپێشاندەران دوو دەبابە ە سێ ئۆتۆمبێلی درعیان لێ زەوت كردوون و بوونەتە هۆی پاشەكشەیان هەرچەند سەربازەكانی قەزافی لە دەرەوەی شار خۆیان بۆ هێرشێكی دیكە ئامادە كردووە.
لە چەند وڵاتی دیكەی عەرەبی بارودۆخەكە هەر بەو شێوەیە نائارامە و گروپە شیعیەكان لە سعودییە دەستیان داوەتە خۆپێشاندان دژی رژێمی پاشایەتی و، لە بەامبەردا هێزە ئەمنیەكان لە شاری ریاز سێ كەسیان دەست بە سەر كردووە كە دژی بنەماڵەی میری سعودیە دروشمیان گوتووە. لە شاری قەتائیف خۆپێشاندەران كە خوازیاری ئازادكردنی زیندانییە سیاسیەكان بوون بڵاوەیان پێكراوە و بە پێی راپۆرتی رێكخراوی مافی مرۆڤ بیست ودوو كەس لەو هەلومەرجەدا دەست بە سەر كراون. لە شارۆچكەی شیعەنشینی حەفوف سەدان كەس لە دانیشتوان دەستیان بە رێپێوان كردووە و خوازیاری ئازادكردنی مەلایەك و بیست كەسی هاوڕای بوون كە زیندانی كراون.
لە وڵاتی پاشایەتی عەمانیس خۆپێشاندان دژی چاكسازی سیاسی درێژەی هەیە، بەڵام ئەگەری پێكدادان لە ئارادا نییە.
لە مەراكیش سوڵتان محەمەد رایگەیاند: بڕیاریداوە چالاكی لیژنەی مافی مرۆڤ لەو وڵاتەدا وەڕێبخاتەوە و پەرەی پێبدات. بە هۆی بڕیارو هەڵبژاردنە نوێیەكان كە لە بەردەستیاندایە ئەندامانی لیژنەكە بە مەرجێك بزانن مافی مرۆڤ پێشێل كراوە دەتوانن لەوبارەیەوە خوازیاری لێكۆڵینەوە بن.
هەموو ئەم ئاڵۆگۆڕانە لە كاتێكدا روویانداوە كە لە حكومەتی كۆماری ئیسلامی ئێراندا رێژەی سەركوت بە رادەیەكی زۆر بەرز بووەتەوە.
Ariel Time
وه‌زاره‌تی ئیتلاعاتی كۆماری ئیسلامیی ئێران رایگه‌یاندووه كه چه‌ندین سیخوڕی ده‌زگای هه‌واڵگریی ویلایه‌ته یه‌كگرتووه‌كانی ئه‌مه‌ریكای له ناو ئێران گرتووه 
.jpeg)
هیچ نظری موجود نیست:
ارسال یک نظر