راگەیاندراوی ئەنجومەنی سەركردایەتی "پارتی لیبراڵ دیمۆكراتی كوردستان" بەبۆنەی 25 هەمین ساڵیادی كیمیابارانی هەڵەبجەوە

راگەیاندراوی ئەنجومەنی سەركردایەتی "پارتی لیبراڵ دیمۆكراتی 

كوردستان" بەبۆنەی 25 هەمین ساڵیادی كیمیابارانی هەڵەبجەوە

خەڵكی خۆڕاگر و قارەمانی كوردستان

بنەماڵەی سەربەرزی شەهیدان

كۆڕوكۆمەڵە مافپارێزەكانی كورد

خەڵكی ئازارچەشتووی هەڵەبجەی لەخوێندا شەڵاڵی هەمیشە زیندوو

لەیادەوەریی هەر نەتەوەیەكدا كۆمەڵە رووداوێكی ناخۆش و سەرسوڕهێنەر هەن كە هەرگیز لەیادی نەوەكان ناچنە دەرەوە و رێك چارەكە سەدەیەك لەمەوبەر رووداوێكی تاڵ و ترسناك لە مێژووی گەلی كورددا رووی دا كە نەوە بۆ نەوە و نووسراو بۆ نووسراو و ساڵیاد بۆ ساڵیاد دووبارە دەبێتەوە و دیسانەوە ئەم گەلە بەش مەینەتە ماتەمبار دەكات.

25 ساڵ لەمەوبەر لە وەها رۆژێكدا شاری هەڵەبجەی مەڵبەندی قارەمانێتی و لانكەی شۆڕش و خۆڕاگری، كرایە ئامانجی بۆردومانكردنی فڕۆكەكانی حیزبی بەعسی فاشیست و لە چەند سەعاتێكدا 5 هەزار گیانی بێتاوان بە چەكی كیمیایی شەهیدكران.

دیارە لە شەڕی ماڵوێرانكەری نێوان داگیركارانی كوردستاندا ئەوە یەكەمجار نییە ئەو هێرش و پەلامار و تۆڵە ئەستاندنەوانە لە لایەنی بەرانبەر زیانی قەرەبوونەكراو بە گەلی ستەملێكراوی كورد دەگەیەنێ‌، بەڵام وەكو ئەو جینایەتەی كە لە هەڵەبجە و بەشێوەی بەڵگەدار كرا، لە مێژووی ناوچەكەشدا بێوێنە بووە.لە هێرشێكی دڕندانەدا بۆسەر گەلی كورد لە شاری هەڵەبجە زیاتر لە 5 هەزار مرۆڤ زیندەبەگۆڕ كران.

پێویستە لەسەرمان ئەم یادە وەك رۆژی ماتەمینی گشتی و بە تێكڕایی و وەك رۆژی "ژینۆسایدی نەتەوەی كورد" بناسین و هەوڵ بدەین بە هەموومانەوە ئەم دۆسیەیە بەجیهانی بكەین و بیكەین بە رۆژێكی ماتەمینی بۆ گەلانی بەش مەینەتی دنیاش كە رێز لەم كارەساتە مێژووییەی كوردان بگرن.

داوا لە هەموو لایەنە كوردستانییەكانیش دەكەینك

1-              بۆ قەرەبووكردنەوەی ئازارەكانی خەڵكی ستەملێكراوی هەڵەبجە هەموو هەنگاوێكی كرداریی مومكین هەڵبگرن بۆ ئەوەی خەم و مەینەتیەكانیان زیاتر ئازاریان نەدات.

2-              هەوڵ بدرێت بە هەموو لایەنەكانەوە بۆ بە ژینۆسایدناساندنی ئەم رۆژە هەوڵ بدرێت تا لە ساڵیادی كارەساتەكە لە ئاستی جیهانیدا بۆ ئیدانەكردنی بەكارهێنانی چەكی كیمیایی لە رابردوو و داهاتوودا مۆمی ماتەمینی هەڵبكرێت.

3-              بۆ ئەوەی ئەم پرسە هەستیارەی گەلی كورد لە ئاستی جیهانیدا پاڵپشتیی گەورەی لێبكرێت، پێویستە رێكخراوی جیهانیی "یەكێتیی نەتەوە ئەنفال و كیمیابارانكراوەكانی جیهان" دروست بكرێت.

هەر لەم یادەدا ئەنجومەنی سەركردایەتی "پارتی لیبراڵ دیمۆكراتی كوردستان" سەری رێز و نەوازش بۆ قوربانیانی كارەساتەكە و بنەماڵەی سەربەرزی شەهیدان دادەنەوێنێ و داواكارە كار بۆ ئەوە بكرێت كە بكەرانی ئەم كارەساتە بە سزای كردارە ناجوامێرانە و دڤەمرۆڤانەكانی خۆیان بگەن.

ئەنجومەنی سەركردایەتی

پارتی لیبراڵ دیمۆكراتی كوردستان

16/3/2013