عەبدوڵا موهتەدی: رووخانی ئه‌سه‌د شۆڕشه‌که‌ بۆ ئێران ده‌گوازێته‌وه‌

عەبدوڵا موهتەدی: رووخانی ئه‌سه‌د شۆڕشه‌که‌ بۆ ئێران ده‌گوازێته‌وه‌

لە عەرەبیەوە: مۆحەمەدی ئەمینی
     رۆژنامەی "ئەلحەیات"ی عەرەبی کە لە لەندەنی پێتەختی بریتانیا چاپ دەکرێت، رۆژی ٢٩ی گەلاوێژ دەقی چاوپێکەوتنێکی بە زمانی عەرەبی لەگەڵ "عەبدۆڵای مۆهتەدی" سکرتێری گشتی کۆمەڵەی زەحمەتکێشانی کوردستانی ئێران بڵاو کردۆتەوە کە لە خوارەوە وەرگێڕانی کوردیەکەی دەخەینە بەر دەستی خوێنەران.

    عه‌بدوڵا موهته‌دی سکرتێری حزبی کۆمه‌ڵه‌ی کوردستانی ئێران، باس له‌وه ‌ده‌کات روخانی ده‌سه‌ڵاتی به‌شار ئه‌سه‌د ده‌بێته‌ هۆی گواستنه‌وه‌ی شۆڕش بۆ ناوخۆی ئێران، هێمای بۆ ئه‌وه‌ش کردوه‌ که‌ هێزه‌ به‌رهه‌ڵستکاره‌کانی ئێران به‌ بێ ده‌ست تێوه‌ردانی ده‌ره‌کیش له‌ توانایاندا هه‌یه‌ ئاڵوگۆڕی له‌ ده‌سه‌ڵاتی وڵاته‌که‌یاندا بکه‌ن و له‌و بڕوایه‌شدایه‌ تا ئێستا ئه‌مریکا بڕیاری نه‌داوه‌ پشتیوانی له‌ ئۆپۆزسیۆنی ئێران بکات.

    موهته‌دی که‌ له‌گه‌ڵ چه‌ند سه‌د ئه‌ندامێكی حزبه‌که‌ی له‌ کامپێکی سه‌ر سنوری ئێران و عێراق نیشته‌جێیه‌، به‌ رۆژنامه‌ی حه‌یاتی راگه‌یاندوه‌: هێزه‌ نه‌یاره‌کانی کۆماری ئیسلامی ئێران له‌ کۆنفرانسێکدا که‌ له‌ ژێر ناوی "یه‌کگرتن له‌ پێناو چه‌سپاندنی دیمۆکراسی له‌ ئێران" که‌ له‌ماوه‌ی رابردوودا و له‌ ستۆکهۆڵمی پایته‌ختی سوید به‌ڕێوه‌چوو، باسیان له‌ سه‌ر ئه‌وه‌ کردوه‌‌ که‌ سود له‌ ئه‌زمونی شۆڕشه‌کانی به‌هاری عه‌ره‌بی وه‌ربگیرێت بۆ ئه‌نجامدانی گۆڕانکاری له‌ ناوخۆی ئێراندا، ئاماژه‌ی بۆ ئه‌وه‌شکردوه‌ که‌ له‌ کۆنفرانسه‌که‌دا زۆرینه‌ی هێزه‌ به‌رهه‌ڵستکاره‌کانی حکومه‌تی ئه‌و وڵاته‌ ئاماده‌ بوون که‌ بریتی بوون له‌ هێز و لایه‌نی نه‌ته‌وه‌کان و هێزه‌ لیبراڵ و چه‌په‌کانی ئێران و ته‌نانه‌ت ئۆپۆزسیۆنی ناوخۆی ئه‌و وڵاته‌ که‌ به‌ بزوتنه‌وه‌ی سه‌وز ناسراون، باسی له‌وه‌شکرد که‌ نوێنه‌رانی ئه‌مریکا و به‌ریتانیاش له‌ کۆنفرانسه‌که‌دا ئاماده‌بوون ‌ ئه‌وان جه‌ختیان له‌ مه‌ترسی به‌رنامه‌ ئه‌تۆمیه‌که‌ی ئێران کردوه‌ته‌وه‌.

   عه‌بدوڵا موهته‌دی تیشکی خستوه‌ته‌ سه‌ر ئه‌وه‌ی که‌ ئه‌مریکا تا ئێستا بڕیاری نه‌داوه‌ بۆ پاڵپشتی کردنی ئۆپۆزسیۆنی ئێرانی و وتی: ره‌نگه‌ ئه‌مریکا پێی وابێت به‌ رێگای پاڵپشتی نه‌کردنی له‌ ئۆپۆزسیۆن نه‌بێته‌ هۆی هاندانی زیاتری ئێران، به‌ڵام سه‌ره‌رای ئه‌وه‌ش حکومه‌تی تاران به‌رده‌وامه‌ له‌ سیاسه‌ته‌ دوژمنکاریه‌‌کانی له‌ ناوچه‌که‌دا.

        ناوبراو ئه‌وه‌شی خسته‌روو که‌ کلیلی ئه‌نجامدانی گۆڕانکاری له‌ ئێراندا پشتیوانی کردن و هاریکاری ئۆپۆزسیۆنی ئه‌و وڵاته‌یه‌ نه‌ک ده‌ست تێوه‌رانی سه‌ربازی.

        باسی‌ له‌وه‌شكرد، ماوه‌ی‌ 15 ساڵه‌ حزبه‌که‌ی شه‌ری چه‌کداری له‌ دژی‌ ڕژێمی‌ ئێران راگرتوه‌ و شێوازێكی‌ ئاشتیانه‌ی‌ بۆ ئه‌نجامدانی‌ گۆڕانكاری‌ هه‌ڵبژاردووه‌، ئه‌وه‌ش له‌كاتێكدایه‌، ده‌سه‌ڵاتی ئێران به‌رده‌وامه‌ له‌ سیاسه‌ته‌کانی خۆی له‌ دژی لایه‌نه‌ نه‌یاره‌کانی ته‌نانه‌ت له‌ ناوخۆشدا.

        وتیشی‌ حکومه‌تی ئێران بوار به‌بونی‌ ئۆپۆزسیۆن نادات له‌وڵاته‌كه‌یدا ته‌نانه‌ت ئه‌و لایه‌نانه‌ش كه‌ چه‌ندین ساڵه‌ به‌شداربوون له‌ به‌ڕێوه‌بردنی‌ وڵاتداو و بزوتنه‌وه‌ی سه‌وزیشی به‌نمونه‌ هێنایه‌وه‌ که‌ سه‌رکرده‌کانی یان زیندانی کراون یان له‌ماڵێکدا خراونه‌ته‌ ژێرچاودێریه‌وه‌.

        سکرتێری کۆمه‌ڵه‌ی شۆڕشگێڕی زه‌حمه‌تکێشان ئه‌وه‌شی باسکردوه‌ که‌ هێزه‌ گه‌وره‌کانی ئۆپۆزسیۆنی ئێران له‌ دژی ده‌ستوه‌ردانی ده‌ره‌کین چون پێیان وایه‌ له‌ ناوخۆوه‌ ده‌توانن گۆڕانکاری بکه‌ن به‌ڵام ئه‌و هێزانه‌ پێویستیان به‌ هاوئاهه‌نگی و یه‌کریزی زیاتر و پاڵپشتی نێوده‌وڵه‌تی هه‌یه‌.

        موهته‌دی پێی وایه‌ ئه‌نجامدانی گۆڕانکاری له‌ ئێراندا پێویستی به‌ کات هه‌یه‌ و باسی له‌وه‌کردوه‌ که‌ رووخانی حکومه‌تی سوریا پڕۆسه‌ی گۆڕانکاری له‌ ئێران به‌ ڕێگای شۆڕش و راپه‌رین خێراتر ده‌کات و جه‌ختیشی له‌وه‌کرده‌وه‌ که‌ شه‌قامی ئێرانی هاوده‌نگه‌ له‌ سه‌ر ئه‌نجامدانی گۆڕانکاری و کۆتایی هێنان به‌و‌ هه‌ڵاواردنه‌ نه‌ته‌وه‌یی و ئایینییه‌ی له‌ هه‌موو سوچێکی دنیادا کۆتایی پێهاتوه‌ به‌ڵام له‌ ده‌ستوری بنچینه‌یی ئێراندا چه‌سپێنراون و به‌رده‌وامیان پێده‌درێت.

        باسی له‌وه‌شکرد نه‌ته‌وه‌ غه‌یره‌ فارسه‌کانی ئێران رووبه‌رووی زۆرترین ئاستی ئه‌و جۆره‌ هه‌ڵاواردنانه‌ ده‌بنه‌وه‌ که‌ له‌ جیهاندا ناسراون ، بۆ وێنه‌ کورد و به‌لوچه‌کان به‌ پێی یاسای بنچینه‌یی ئێران ناتوانن پۆستی باڵا سه‌ربازی و حکومی له‌و وڵاته‌دا وه‌ربگرن.

        موهته‌دی وتیشی هیچ بوارێک به‌ ئایین و ئایینزاکانی ده‌ره‌وه‌ ئایینی ره‌سمی ئێران نادرێت، بۆ وێنه‌ له‌تاراندا که‌ چه‌ند ملیۆن شوێنکه‌وتووی سوننی سه‌ربه‌ نه‌ته‌وه‌ جیاجیاکان ده‌ژین رێگه‌ نادرێت به‌کردنه‌وه‌ی یه‌ک مزگه‌وتی تایبه‌ت به‌ خۆیان، هه‌مان دۆخ به‌ سه‌ر مه‌سیحی و زه‌رده‌شتی و ئه‌وانیتریشدا جێبه‌جێ ده‌کرێت.

        موهته‌دی ئه‌وه‌شی خستوه‌ته‌ روو که‌ هه‌ڵاواردنه‌ ئایینیه‌کانی ئێران نه‌بوه‌ته‌ رێگر له‌ به‌رامبه‌ر پاڵپستی کردنی حکومه‌تی ئه‌و وڵاته‌ له‌ رێکخراوی قاعیده‌ و سه‌رجه‌م هاوڵاتیانی ئێرانی ده‌زانن که‌ ئه‌و رێکخراوه‌یه‌ به‌ ئاگاداری ده‌زگا هه‌واڵگریه‌کانی ئێران له‌ ئه‌فغانستانه‌وه‌ به‌ره‌و عێراق ده‌په‌ڕنه‌وه‌ و ئه‌وه‌ش ده‌رخه‌ری ئه‌و راستیه‌یه‌ که‌ به‌رژه‌وه‌ندی حکومه‌تی ئێران له‌ سه‌رووی به‌رژه‌وه‌ندی ئایینیه‌وه‌یه‌.

        سکرتێری کۆمه‌ڵه‌ی شۆڕشگێڕی زه‌حمه‌تکێشان پێشیوایه‌ ئێران به‌ باشی له‌ ده‌ره‌نجامه‌کانی رووخانی حکومه‌تی سوریا بۆ سه‌ر داهاتووی خۆی گه‌یشتوه‌، هه‌ر بۆیه‌ به‌ توندی پاڵپشتی له‌ ده‌سه‌ڵاتی دیمه‌شق ده‌کات له‌ رووی ناردنی چه‌ک و ره‌وانه‌کردنی چه‌کدار بۆ ئه‌و وڵاته‌ به‌ رێگای ئاسمانی و وشکانی، به‌و پێیه‌ش ئه‌ندامانی سوپای پاسدارانی ئێران له‌ سه‌ر بنه‌مای ئه‌زمونه‌کانیان له‌ سه‌رکوتی نه‌یارانی وڵاته‌که‌یان مه‌شق و راهێنان به‌ هێزه‌ سه‌ربازیه‌کانی سوریا ده‌که‌ن.

        ناوبراو سه‌باره‌ت به‌و ده‌نگۆیانه‌ی باس له "هاوکاریکردنی پارتی کرێکارانی کوردستان و ده‌سه‌ڵاتی سوریا" ده‌که‌ن ئه‌و تۆمه‌تبارکردنه‌ی پشت راست یان ره‌تنه‌کرده‌وه‌ به‌ڵام وتیشی وه‌ستاندنی هێرشه‌کانی ئێران بۆ سه‌ر په‌ژاک ، باڵی سه‌ربازی پارتی کرێکاران له‌ ئێران به‌ پێی رێکه‌وتنێک بووه‌ و ئاماژه‌ی بۆ ئه‌وه‌شکرد که‌ حکومه‌تی سوریاش به‌ بێ شه‌ڕ کردن ناوچه‌ کوردیه‌کانی ئه‌و وڵاته‌ی راده‌ستی باڵی سوریای پارتی کرێکارانی کوردستان کردوه‌.

        له‌ درێژه‌دا وتی: ئێمه‌ وه‌ک کۆمه‌ڵه‌ په‌یوه‌ندیه‌کی پته‌ومان له‌ گه‌ڵ سه‌رجه‌م لایه‌نه‌ کوردیه‌کانی سوریا هه‌یه‌ و زۆر به‌روونی پشتیوانیمان له‌ سیاسه‌ته‌کانی ئه‌نجومه‌نی نیشتمانی کوردی سوریا کردوه‌ و له‌و بڕوایه‌داین به‌ ئاراسته‌یه‌کی دروستدا ده‌ڕۆن له‌ پێناو به‌دیهێنانی خواسته‌کانی گه‌لی کورد له‌و وڵاته‌، به‌رێگای هاوئاهه‌نگی له‌ گه‌ڵ سه‌رجه‌م لایه‌نه‌کانیتری ئۆپۆزسیۆن.

        موهته‌دی داواشی کرد" کورده‌کانی سوریا به‌شداری له‌ شۆڕشی ئه‌و وڵاته‌دا بکه‌ن و به‌رێگای هاوکاری له‌ گه‌ڵ لایه‌نه‌کانیتر داهاتووی خۆیان مسۆگه‌ر بکه‌ن".

        موهته‌دی گاڵته‌شی به‌ وته‌کانی رابه‌ری رۆحی شۆرشی ئێران کردوه‌ که‌ باسی له‌وه‌ کردبوو شۆڕشه‌کانی به‌هاری عه‌ره‌بی درێژه‌پێده‌ری شۆڕشه‌که‌ی 1979 ی ئیمام خومه‌ینین و وتی" ئه‌و شۆڕشه‌ی ئێران له‌ رۆژهه‌ڵاتی ناوه‌راستدا ناپه‌سه‌نده‌ و نمونه‌یه‌کی شیاو ‌ و دیمۆکراتیک نییه‌ و بۆئه‌وه‌ ناشێت ئه‌زمونی لێوه‌ربگیرێت" به‌ڵام ئه‌وه‌شی خسته‌روو که‌ " شۆڕش و گۆرانکاریه‌کانی داهاتووی ئێران به‌ هۆی گرنگی و کاریگه‌ریه‌ کلتوری، ئابوری و مێژوویه‌کانی ئه‌و وڵاته‌ له‌ ناوچه‌که‌دا یه‌کێک ده‌بێت له‌ گرینگترین بزاڤه‌ دیمۆکراسی خوازه‌کان به‌ به‌راورد له‌ گه‌ڵ شۆڕشه‌کانی به‌هاری عه‌ره‌بی.

        جه‌ختیشی کرده‌وه‌ که‌ پێویسته‌ هه‌موو لایه‌ک چاویان له‌سه‌ر گۆڕانکاریه‌کانی ناوخۆی ئێران هه‌ڵنه‌گرن.

        سه‌باره‌ت به‌ هه‌ڵبژاردنی سه‌رۆکایه‌تی کۆماری ئێران و ده‌ستنیشاکردنی مه‌حمود ئه‌حمه‌دی نه‌ژاد بۆ خولێکیتری مانه‌وه‌ له‌و پۆسته‌دا وتی: سه‌رجه‌م لایه‌نه‌کانی ئۆپۆزسیۆن هه‌ڵبژاردنی سه‌رۆک کۆماریان له‌ ئێران بایکۆت کردبوو به‌هۆی ئه‌وه‌ی حکومه‌ت بڕوای به‌ ئۆپۆزسیۆن نییه‌ و ناهێڵێت به‌شداری بکه‌ن له‌ به‌ڕێوبردنی ده‌سه‌ڵاتدا، هه‌ڵبژاردنی ساڵی 2009 ش دوایین هه‌ڵبژاردنی ئه‌وه‌ وڵاته‌یه‌، به‌هۆی ئه‌وه‌ی له‌مه‌ به‌دوا هه‌ر هه‌ڵبژاردنێک له‌ ئێراندا بکرێت له‌ قازانجی باڵی سه‌ر به‌ رابه‌ری ئێران و له‌ زیانی ئۆپۆزسیۆندا ده‌شکێته‌وه‌.

        موهته‌دی ئه‌وه‌شی نه‌شاردوه‌ته‌وه‌ که‌ بزوتنه‌وه‌ی سه‌وزی ئێرانی هیچ تێڕوانینێکی نوێی سه‌باره‌ت به‌ گه‌ڕانه‌وه‌ی مافی نه‌ته‌وه‌ و که‌مایه‌تیه‌ چه‌وساوه‌کانی ئه‌و وڵاته‌ نه‌خستوه‌ته‌روو ، بڕوای خۆشی نیشانداوه‌ که‌ ئه‌گه‌ر ئه‌زمونی خاته‌می درێژه‌ی پێ بدرایه‌ ده‌کرا به‌ ئارامی له‌ ناوخۆی ده‌سه‌ڵاته‌وه‌ گۆرانکاری بهاتایه‌ ئاراوه‌.

http://nnsroj.com/detiles.aspx?id=2855&ID_map=24

----------------

کوشتاری ڕۆبۆسکی دە نێوان فرمێسک و بە هاناوە چوون دا

عەزیز مەعروفی

بۆ من وایە، نازانم بۆ زۆربەی خەڵکی دیکەش چۆنە، کاتێک بیر لە سێدارەدانی پێشەوا قازی نەمر سەرکۆماری شەهید کوردستان دەکەمەوە، و کاتێک بیر لە ترۆری پێغەمبەری ئاشتی شەهید دوکتۆر قاسملووی ڕیبەر کە بە دەستی دەوڵەتی فاشیستی ئیسلامی تاران لە ئۆرووپای پێشکەوتوو لانکەی پێشکەوتن و مافی مرۆڤ گیانی لێ ئەستێندرا و خوێنی بە نرخی تێکەڵ بە دەریای خوێن  بۆ ئازادی کوردستان بوو، زنجیرە رووداوەکانی ژنۆساید و کوشتارەکانی  ئەنفال، هەڵەبجە ، قاڕنێ، قەڵاتان، سەوزێ، سەرچنار، ترۆری ڕێبەری شەهید دوکتۆر سادق شەڕەفکەندی لە بێڕلینی ئاڵمان، کۆمەڵکوژی دێرسیم، لە دار دانی شێخ سەعیدی پیران و شێخ ڕەزا، کوشتاری رۆبۆسکی و دەیان و سەدان کوشتاری بە کۆمەڵ لە بەندیخانەکانی دەوڵەتی تورکیە، ترۆری شێخ مەعشوقی خەزنەوی لە بیر و دڵمدا دەبن بە ئەڵقەکانی زنجیرە فیملمێکی بە ژان کە هیچ شادی و خۆشێکی ناتوانێ ئۆقرەم پێ ببەخشێ.

ئیدی کوژرانی منداڵێکی نەتەوەکەم، یان کوشتنی کاروانچێکی کورد وام لێ دەکات کە بکەومە نێو گێژاوی دەریا  و خۆم بدەمە دەست شەپۆلە بێ ئامانەکان  بێ سرەوتن بە کەنداڵ و کەڵکە شاخانم دا بدەن.کوشتنی منداڵێکی کورد لە باکوری کوردستان یان لە رۆژئاوای کوردستان بە دەستی ڕژیمە خوێنمژ و داگیرکەرەکان، دەمخاتەوە بیری شەهید "ئامانجی پیرۆتە سوور" تەمەن ١٠ ساڵان کە لە دەروازەی "کۆیە" بە دەستی ترۆریستەکانی کۆماری ئیسلامی شەهید کرا.

      کە دەڵێین کوردستان، هەر چوار بەشەکەی باکور، رۆژهەڵات، باشور و ڕۆژئاوا دەگریتەوە. هەروەها کە دەشڵێین داگیرکەر، دەوڵەتانی داگیرکەری تورکیە، ئیران، عێراق و سوریە دەگریتەوە. هەموو بەشەکانی کوردستان لە روەتی خەبات و تێکۆشان بۆ ئازادی، تووشی دەیان و سەدان کۆست و کوشتاری تاق و بە کۆمەڵ بوونەتەوە، سەرەڕای ئەوەی دەبینین لاپەڕەکانی میژووی خەباتەکەی بە خوێن نەخشاو، هەرگیز لە پێناو تۆڵە سەندنەوە و لە ژێر ناوی تێکۆشان بۆ ئازادی، دەستیان بۆ کاری دژە مرۆیی و نابەرپرسانە نە بردووە. لە بەرامبەردا دەزانین کە هەڵسوکەوت و سیمای دژە ئینسانی و کۆنەپەرەستانەی دەوڵەتانی داگیرکەریش لە زمانی تەور، ساتور، بۆمب و ناپاڵم، وێرانی و سووتمان، ترۆر و هەڵاوەسین، بێ سەر و شوین کردن و بەندیخانە زیاتر نییە. شەهید دوکتۆر قاسملوی نەمر، هاواری دەکرد کە "ئێمە پەنا بۆ گرۆگانگیری نابەین و ئێمە ڕەشە کوژی مەحکوم دەکەین"، هەر ئەو کات شەڕ لە کوردستان گەرم بوو، سیاسەتی قاسملوی نەمر و حیزبەکەی ئەوە بوو کە دەست لە کوشتنی دیلەکانی شەڕ بپارێنزن ، تەنانەت ئەگەر لەو شەڕەدا حیزبی دێموکرات نرخی زۆریشی دابا، ئەوە دیسان دیلەکانی شەڕیان بە زووترین کات ئازاد دەکرد.

ئەوهەڵوێستە ئینسانییەی شۆڕشی ئازادیخوازی کوردستان، هەڵقووڵاو سەرچاوە گرتوو لە خەبات بۆ ئازادی و ئەستاندنی مافی سرووشتی  و مافی نەتەوەیی نەتەوەی کورد بووکە خاکەکەی بە زۆر ملی داگیر کراوە. لێردا شەهید دوکتۆر قاسملووی نەمر، وەک رێبەری شۆڕش و سکرتێری حیزبی دێموکرات " ئەخلاق"ی ئاوێتەی شۆڕش و تێکۆشان کردووە، هەر لە جێدا ریژیمی جنایەتکاری کوۆماری ئیسلامی بەو هەڵسوێستە مرۆیەی شۆڕشی کورد زۆر ناڕەحەت بوو. قاسملووی نەمر هیچ کاتیک باوەڕی بە شەڕ نەبوو  بۆ چارەسەری کێشەی کورد لە رێگە چارەی سیاسی دەگەڕا، بۆیە ڕێژیمی ترۆریستی کۆماری ئیسلامی، پەیام و نییەتی ئاشتیخوازانەی دۆکتۆری نەمری دەخوێن گەوزاند و ترۆری کرد. ئەوەش ئەوپەڕی رسوایی و بێ شەرمی و رەفتاری نامرۆیانەی دەوڵەتی ترۆریستی داگیر کەری ئێران لە کوردستانی رۆژهەلات دەردەخات.

شەوی ٢٨ی دیسامبری ٢٠١١ ئەو کات کە خەڵکی باکوری کوردستان, وەک خەڵکی زۆربەی وڵاتان و سەرانسەری تورکیە بەرەبەرە، بە پێشوازی سەری ساڵی زاییننەوە دەچوون، کوشتارێکی دەگمەن و دڵتەزینی میژووییان لێ کرا. لەو شەوەدا، کۆمەڵێک کاروانچی کە زۆربەی هەر زۆریان مێر منداڵ بوون، لە گوندی رۆبۆسکی ناوچەی شەڕناخ، کە چەند کاتژمێر پێشتر وەک ڕۆژانی پێشوو بە بەرچاوی هێزە جنایەتکارانی تورک دا، بۆ دێهاتێکی سەرسنوور تێپەڕ ببوون، لە گەڕانەوەدا، درانە بەر ئاوری فڕۆکە بێ شەرنسینەکانی دەوڵەتی تورک و لە ماوەی تیەنیا چەند خولەک و چرکەدا ٣٤ ڕۆلەی بی تاوانی کورد، شەهید کران. تاوانی ئەو کاروانچییانە، کوێرەی وەری و شەونخوونی بۆ پەیدا کردنی پارووە نانێک، کرینی قەڵەم و ماژیک بۆ قوتابخانە، پەیدا کردنی برە پوڵێک بۆ پیکەوەنانی ژیانی ژن و مێردایەتی، کڕینی جل و بەرگ بۆجێژنی سەری ساڵ... بوو.

تاوانی کاسپکارە چاوگەشەکانی کورد، ئەوە بوو کە وڵاتەکەیان داگیر کراوە و لە وێشدا شۆڕشیکی ڕەوا کە پشت ئەستوور بە ئیرادەی ئازادیخوازی نەتەوەیەکەیەتی، لە گورێ دایە و لە چاوی شێت و وەیشوومەکانی دەسەڵاتی ئانکاراوە،  کاروانچییەکان چەکدارانی پارتی کرێکارانی کوردستان بوون  و بۆیە کوشتارێکی ئاوا ئاشکرا، ئەگەر بێڵین:" نەمان زانی، پێمان وا بوو ئەوانە چەکدرانی ترۆریستی!! پەکەکەن" و "ئەنجامی هەڵەیەکی تەکنیکی و ئیستخباراتی بوو"  وەک بەرزەکی بانان بۆی دەردەچن و ئیدی ئاو لە ئاو تەکان ناخوات و بڕایەوە!!

 هەر  ئەمڕۆ  ئەو ڕۆبۆسکی یەی هەشت مانگ لەوەپێش خەڵتانی خوێن کرا،.هەر ڕاست لەو کێو و بەندەنانەی کە جنیایەتی دەوڵەتی تورکیەی دەرحەق بە خەڵکی کوردستان لێ تۆمار کرا، ئوتووبوسێکی سەربازانی تورک تووشی کارەساتێکی چاوەڕواننەکارو بۆوە. بوسێکی هەڵگری سەربازانی تورک، کە خەریکی داو و تەڵە دانانەوە  و چاوسوور کردنەوە لە خەڵکی کوردستان بوون، وەردەگەڕێ و بە دۆڵ و نشێوە دا، خللۆر دەبیتەوە. ئەوە دانیشتوانی دڵ بە برین و کۆست کەوتووی گوندی خوێناوی رۆبۆسکی بوون، کە بە زووترین کات خۆ دەگەیننە شوێنی ڕووداوەکە و بە هەموو هەوڵ و تواناوە، سەربازانی تورک لە ژێر  بووسی تێکشکاو دەهیننەر دەر و بە ماشینی خۆیان بەرەوە نەخۆشخانەیان ڕادەگوێزن. لەو ڕووداوەدا ١١ سەربازی پلەدار و بی پلە و جاشێک، دەکوژرێن.

 ئەگەر هەستی تۆڵە کردنەوە و هەستی کوشتن لە بڕی کوشتن، دە مێشکی کورد دا هێلانەی کردبا، دانیشتوانی گوندی رۆبۆسکی نەدەبوو بە هانای سەربازە کوژراوەکانی تورک بچن و بریندارەکان قوتار بدەن!. کورد ئەگەر باکی بە خوین دان لە ڕیگەی ئامانجە پیرۆزەکانی دا نییە، ئەوە وەک لە سەروە وتم، هەستی مرۆیی و مرۆڤایەتی تێکەڵ بە شۆڕشە ئازادیخوازانەکەشی کردووە و لە دڵ و هەناوی کورد دا بنجی داکووتاوە. شۆڕشی مافخوازانەی نەتەوەکەمان، لە هەموو بەشەکانی کوردستان لە گەڵ دەیان نموونەی لەو بابەتە بەرە ڕوویە. وەک شەهید قاسملوو فەرموویەتی" گەلێک ئازادی بوێ دەبێ نرخی ئەو ئازاییەش بدا"، بۆیە بە فیداکردنی باشترین ریبەرەکانی، منداڵە چاوگەشەکانی، ژن و لاو  پیر و کەنەفت... چاوی لەو ئەسڵە نەنوقاندووە ، بەڵام بە خۆشییەوە، سەرەتانی تۆڵە کردنەوە و خوێن لە بڕی خوێن نەبۆتە هەڵوێست و ئیرادەی کورد بەرامبەر بە دوژمنە دڵڕەقەکانی.

بۆیە من وەک خۆم، لە گەڵ ئەوەی شانازی ئەندامەتی حیزبێکی شۆڕشگێڕی مەیدانی خەباتی نەتەوەیاتیم پێ بەخشراوە وەک مافێکی هەرە سرووشتی لە گەڵ ویست و داوای سەربەخۆیی کوردستانم، بەڵام شانازی بە هەڵوێست و هەستی مرۆیانەی نەتەوەکەم دەکەم کە لە ئاست داگیرکەران  و خوێنمژان دەیگرنە بەر. جا ئەو هەڵوێستە لە رۆژهەڵات، باکور، باشور یان ڕۆژئاوا بیت، هەر جێگەی شانازی پێوە کردنە. روو ڕەشی بۆ داگیر کەران و هەر شەکاوە بی ئاڵای ئازادیخوازی کورد کە پڕاوپڕە لە هەڵوێستی ئینسانی. کاتی ئەوە هاتووە داگیرکەران لە کوردستان بکشێنەوە.