Ariel Time
دادگایەکی تورکیا 8 ساڵ و نۆ مانگ زیندانی بۆ سەباحەت تونجەل بڕیەوە
NNSROJ:
لە درێژەی گووشار بۆ سەر سیاسەتمەدارانی کورد و ئامادەکاری بۆ داخستنی بەدەپە، پارلەمانتاری ئیستانبووڵی ئەو پارتە، بە تۆمەتی ئەندامەتی لە پەکەکە سزای 8 ساڵ و 9 مانگ زیندانی بەسەر دا سەپا.
ئەمڕۆ سێشەممە 18-09-2012ی زایینی، لقی 10ی دادگای تاوانی گرانی ئیستانبووڵ، سزای 8 ساڵ و 9 مانگ زیندانی بە سەر "سەباحەت تونجەل"، پارلەمانتاری ئیستانبووڵی بەدەپە دا سەپاند.
ئەو پارلەمانتارە کوردە دەربارەی حوکمی دادگا وتی: "دیارە بە قسەی ئەردۆغانیان کردووە کە چەند رۆژ لەمەوبەر، داوای لە دادوەرەکان کردبوو بکەونە خۆ".
هاوکات "حوسین تانریوێردی"، جێگری سەرۆکی ئاکەپە بە کەناڵی سی‌ئێن‌ئێن تورکی راگەیاند کە "یەکی ئۆکتۆبر و بە کرانەوەی پارلەمان، دەست بە خاوێنکردنەوەی پارلەمان لە بوونی پارلەمانتارانی لایەنگری تیرۆر دەکەین".
مەبەستی ئەو بەرپرسەی ئاکەپە، پارلەمانتارانی بەرەی رەنج سەر بە "پارتی ئاشتی و دێمۆکراسی"یە کە لە لایەن حکومەتی ئەو وڵاتەوە بە درێژکراوەی پەکەکە لە ناوخۆی تورکیا پێناسە دەکرێن.
لەو مانگانەی رابردوو و بە گوڕگرتنی شەڕ لە باکوری کوردستان و کوژران و برینداربوونی سەدان سەربازی تورک، ئەردۆغان و بەرپرسانی تری تورکیا لێدوانی توندیان دژ بە بەدەپە داوە.
چەند رۆژ لەمەوبەر، سەرۆک وەزیری تورکیا، بەدەپەی بە "کلکی پەکەکە" پێناسەکرد و داوای لە دادگا و دادوەرەکان کرد کە دۆز لە بەرانبەر پارلەمانتارانی بەدەپە بکەنەوە.
بە گوێرەی "مەراڵ دانیش"، بەرپرسی بیرۆی حقوقی بەدەپە، هەر ئێستا زیاتر لە 500 داوای هەڵگرتنی مافی حەسانە[مافی پارێزراوی سیاسی] پارلەمانتارانی کورد لە دەستی دیوانی سەرۆکایەتی مەجلیس دایە و ئەگەری ئەوە هەیە بە فەرمانی ئەردۆغان و دەستپێشخەری ئاکەپە، ئەو مافە لە سیاسەتمەدارانی کورد بستێندرێتەوە.
چاوەڕوان دەکرێ کە بە مەحکوومکرانی پارلەمانتارانی کورد، دادگای یاسای بنەرەتی تورکیا، دۆزێک بۆ داخستنی پارتی ئاشتی و دێمۆکراسی بکاتەوە.
.jpeg)
هیچ نظری موجود نیست:
ارسال یک نظر