كچێك: "لەبری قەرزی باوكم دەستدرێژی سێكسیان كردە سەرم"

كچێك: "لەبری قەرزی باوكم دەستدرێژی سێكسیان كردە سەرم"

وارڤین – كەركووك: "نیوەڕۆیەك چوومە دەرەوە لە پڕ دوو كەس منیان رفاند و خستمیانە ناو ئۆتۆمبێلێكەوە و ئەوەندەم دێتەوە بەر چاو كە هەردووكیان پەلاماریان دەدام و دەستدرێژیان كردە سەرم، دوای كە چاووم كردەوە لە نەخۆشخانە بووم.." ئەمە وتەی (زارا ئەنوەر)ی تەمەن چواردە ساڵە كە بەهۆی ئەوەی باوكی قەرزدار بووە و پارەكەی نەداوەتەوە، دەستدرێژی سێكسی كراوەتە سەر.

زۆرن ئەو كچانەی بە هۆی بوونی كێشەی كۆمەڵایەتی نێوان بنەماڵەكانەوە، یاخود كێشەی عەشائیریی نێوان دوو عەشیرەتەوە بە جۆرەها شێوە سووكایەتییان پێدە‌كرێت و لە بری خوێن و سوڵحكردن دەبەخشرێن و گەورە بە بچووك و ژن بە ژنیان پێدەكرێت، تەنانەت لە هەندێكحاڵەتدا لە كاتی قوماركردنیشدا پیاوان كچ و هاوسەری خۆیان دۆڕاندووە.

"ئه‌گه‌ر بێینه‌ ده‌نگ ده‌ڵێن سووكه"

لەناوچە جیاجیاكانی هەرێمی كوردستان دیاردەی گێچەڵ و دەستبردن و تانە و تێڕوانینی هەوەسبازانە بەرامبەر بە ژنان دەبینرێت، بەتایبەتی لە شوێنە گشتییەكان و لەكاتی كۆڕ و كوبوونەوە و ئاهەنگە خێزانی و گشتییەكاندا و ئەمەش ژنانی هەراسان كردووە و بەهۆی نەبوونی رۆشنبیری و پەی نەبردن بە مافەكانی ژنان لە لایەن پۆلیسەوە، زۆرێك لە كچان ناتوانن سكاڵاش تۆمار بكەن.

(لاڤە ئازاد) كچێكی تەمەن (21 ساڵ)ە، ئەو كوڕان هەراسانیان كردووە و لە بارەی ئەو گێچەڵكردنەی كوڕانەوە گوتی: "توندوتیژی جۆری هەیە،  دەستبردن بۆ كچان لە ناو بازار و شوێنە گشتییەكاندا زۆر جۆری هەیە و زیادیكردووە".

ئەو كچە گوتیشی: "چەندینجار تووشی حاڵەتی گێچەڵكردنی كوڕان بوومەتەوە و هەر بە تانە و تەشەرەوە نەوەستاون و تەنانەت، دەستیشیان بۆ هێناووم".

كێشەی كچان لەوێوە سەرچاوەی گرتووە، كە ئەگەر بێت و بەرگری لە خۆیان بكەن و بەدەنگ بێت، كۆمەڵگە دووبارە بە چاوێكی "سووك" سەیریان دەكات.

ئەمە دەردی دڵی (لاڤە) بوو، ئەو گوتی: "زۆرجار كە لە بازار گێچەڵم پێكراوە، نەموێراوە، ئاوڕ بدەمەوە و كاردانەوەم هەبێت، چونكە ئەگەر وا بكەم، ئەو كاتە خەڵك بەچاوێكی دیكە، تەماشام دەكات و ده‌ڵێن ئه‌وه‌ خۆی سووكه".

لە بری قەرزی باوكی دەستدرێژی دەكرێتە سەر

باوكی (زارا)، چەند ساڵێك پێش ئێستا پارە لە چەند ناسیاوێكی خۆی بە قەرز وەردەگرێت، بەڵام پارەكە لە وادەی خۆیدا ناداتەوە، بەم كارەشی مەترسیی بۆ سەر ژیانی بنەماڵەكەی درووست دەكات و خاوەن قەرزەكان داوای پارەكەیان دەكەنەوە.

(زارا) كە ناوی خوازراوی ئەو كچە چواردە ساڵەیە، پەنجە ناسكەكانی گوشی و لێوەكانی كرۆژی، چاوەكانی پڕبوون لەفرمێسك و گوتی: "بۆ دەبێت من باجی هەڵەی باوكم بدەم".

گوتیشی: "باوكم قەرزاربوو، (3) ساڵ بوو داوای قەرزەكەیان دەكردەوە دەی دەتوانی بیداتەوە، تا ئەوكاتەی خاوەنی قەرزەكە هەڕەشەی كرد، هەر گوێی پێ نەدا".

"نیوەڕۆیەك چوومە دەرەوە لە پڕ دوو كەس منیان رفاند و خستمیانە ناو ئۆتۆمبێلێكەوە و ئەوەندەم دێتەوە بەر چاو كە هەردوو كیان پەلاماریان دەدام و دەستدرێژیان كردە سەرم، دوای كە چاووم كردەوە لە نەخۆشخانە بووم..بەهۆی ئەوەی باوكم قەرزدار بوو نەشمان توانی لە پۆلیس سكاڵا تۆمار بكەین". ئەمەی بە گریانەوە وت و ئیدی بێدەنگ و سامگرتوو بوو.

پۆلیس جێی متمانەی ژن نییە

بە هۆی ئەوەی تا ئێستا لە كەركووك پۆلیسی ژن نییە و هەرچەندە زۆرێك لە ژنانی كەركووك دەخوازن پەیوەندی بە كەرتی پۆلیسەوە بكەن، بەڵام تا ئێستا هیچ ژنێك وەك پۆلیس دانامەزرێت و لە كاتی بوونی كێشە كۆمەڵایەتییەكان و توندوتیژی دژ بە ژنانیشدا، ژنانی كەركووك ناوێرن روو بكەنە بنكەكانی پۆلیس.

(لاڤە) یەكێكە لە قوربانییەكانی رەفتاری هەراسانكاری گەنجانی شارەكەی و لە بارەی رۆڵی پۆلیسەوە لە فریاكەوتنی و بەتەنگەوە چوونی ئەو كچانەی هەراسانكراوون گوتی: "كاتێك لە پۆلیس سكاڵا تۆمار دەكەیت، هەر پۆلیسەكە پێت دەڵێت بەهۆی ئەوەی جلوبەرگی تەسك لەبەر دەكەن؛ خۆتان پیاو ناچاردەكەن گێچەڵتان پێ بكات".

(لاولاو) ناوی خوازراوی ژنێكی تەمەن (54 ساڵ)ە، ئەو خەم رووخساری داگرتبوو، لە رێگەی یەكێك لەرێكخراوەكانی ژنانەوە توانیمان  بۆ (وارڤین)  بیدوێنین.

ئەو چیرۆكی بێ كەسی خۆی و دەستدرێژیكردنە سەر كچەكەی گێڕایەوە و گوتی: "هەڵەی خۆم بوو، دڵم زۆر ساف بوو، كچەكەم لە هاتوچۆدا سەربەست كردبوو، تا ئەو رۆژەی لەلایان كوڕێكی دراوسێمانەوە دەستدرێژی كرایە سەر".

دوای رووداوەكە، (لاولاو) بۆ دەرباز بوون لەو كێشەیە و بە سزا گەیاندنی تاوانبار، روودەكاتە پۆلیس، بەڵام رووبەڕووی كێشەیەكی دیكەش دەبێتەوە.

"منیش لە بێكەسی خۆم پەنام بردە بەر پۆلیس، كەچی نەمزانی لەوێش تووشی كێشە دەبم, دوای ئەوەی كێشەكەم بۆ پۆلیس باسكرد, پۆلیسێك ژمارەی مۆبایلی وەرگرتم گوایە هاوكاریمان دەكات، بەڵام دواتر رۆژانە خۆی تێلی دەكرد و هەراسانی كردبووین و بەوەشەوە نەدەوەستا و دەهاتە بەر دەرگامان"، (لاولاو) گوتی.

په‌نا بۆ رێكخراوه‌كان ده‌به‌ن

كاتێك (لاولاو) لە پۆلیسیش نا ئومێد دەبێت، پەنا دەباتە بەر رێكخراوێكی تایبەت بە ژنان و گوتی: "لە رێگەی ئەو رێكخراوەوە توانیم ژمارەی مۆبایل و ماڵەكەم بگۆڕم".

لێپرسراوی ئۆفیسی كەركووكی رێكخراوی هیوا، خاتوو(سرود محەممەد) بۆ (وارڤین) لە بارەی ئەو حاڵەتانەوە دواو گوتی: "لە ماوەی یانزە مانگی رابردوودا، قوربانی (3) حاڵەتی دەستدیژی سێكسی پەیوەندیان پێوە كردووین، هانایان هێناوەتە بەر رێكخراوەكەمان و حاڵەتی دیكەشمان هەبووە، كە ژنان لە شوێنە گشتییەكان هەراسان كراوون و رووبەڕووی گێچەڵ بوونەتەوە.

ئەو ژنە چالاكوانەی كەركووك، گوتیشی: "بەداخەوە، زۆرجار كە پیاوێك دەستدرێژی دەكاتە سەر ژنێك، یان كچێك لە بەرچاوی چەند پیاوێكی دیكەوە، ئەوانەی دەیبنن هەڵوێستیان نابێت".

هەروەها گوتی: "بە گوێرەی زانیارییەكانی بەر دەست ئێمە زۆرجار دەستدرێژی سێكسی بۆتۆڵە سەندنەوە بووە، ئەنجامدەری تاوانەكە كێشەی لەگەڵ كەسی ژنەكەدا هەیە و وەك چەكێك لە دژی پەنادەباتە بەر دەستدرێژیكردنە سەر ژن، ئەم دیاردەیەش رۆژ بەرۆژ لە زیاد بووندایە، بەڵام  پەردە پۆش دەكرێت".

دوا ئامار

بە گوێرەی دوایین ئاماری بەڕێوبەرایەتی گشتی پۆلیسی كەركووك، لە بارەی رەوشی كۆمەڵایەتی ژنانەوە، كە وێنەیەكی تایبەت دەست (وارڤین) كەوتووە، لە ماوەی (10) مانگی رابردوودا،  (79) حاڵەتی هەڕەشەكردن لە ژنان،  (8) حاڵەتی دەستدرێژی سێكسی بۆ سەر ژنان، (10) حاڵەتی دەستوەردان هەبووە لەكاری دادگا،  كە دۆسیەكان هی ژنان بووە، (3) حاڵەتی  دەستدرێژی هەبووە بۆسەر فەرمانبەری ژن، (2) حاڵەتی خۆسوتاندن،  كە لەپۆلیس  سكاڵایان تۆماركردووە، (29) حاڵەتی لەشفرۆشی، (12) حاڵەتی سوتان، (4) حاڵەتی ناپاكی هاوسەرگیری تۆمار كراوون.

ئا: نێرگز قادر

------------------------------

لە ئامەد ژنێك لەلایەن هاوسەرەكەیەوە كوژرا 

وارڤین - ئامەد: لە درێژەی ئەو توندوتیژیانەی لە كۆمەڵگەی كوردستانییدا بەرامبەر بە ژنان ئەنجامدەدرێن، دوێنێ له ‌شاری ئامەد، ژنێك لەلایەن هاوسەرەكەیەوە بەچەقۆ كوژرا و وێڕای كوشتنی (30) كەڕەت چەقۆی لە جەستەی داوە و تەرمەكەی شێواندووە. 

بە گوێرەی ئەو زانیارییانەی بەدەستكەوتوون، دوێنێ شه‌ممه‌ (17 / تشرينی دووه‌م - نۆڤه‌مبه‌ر / 2012) ئه‌و تاوانه‌ ئه‌نجامدراوه‌ و ژنەكە تەمەنی (39 ساڵ)ە و هاوسەرەكەی (30) كەڕەت چەقۆی بە جەستەیدا كردووە و وێڕای كوشتنی جەستەی شێواندووە.

تاوانی كوشتنی ئەو ژنە لە گەڕەكی (بارش)ی ناوچەی (باغڵار)ی شاری (ئامەد) ئەنجامدراوە و ئەوەش زانراوە كە ژنەكە دوای گواستنەوەی بۆ نەخۆشخانە، بە هۆی سەختی برینەكانی جەستەیەوە ژیانی لەدەستداوە.

پۆلیس دەستی بە لێكۆڵینەوە لەو تاوانە كردووە و تا ئێستا بكوژەكە دەستگیر نەكراوە و بەرەو شوێنێكی نادیار رایكردووە.

س: ئەنەفە.

http://warvin.org/