Ariel Time
ره‌جه‌ب ئه‌ردۆغان : پ.ک.ک چه‌ک دابنێت و برۆن بۆ وڵاتی سێهه‌م
موراد کارایلان : پێویسته ئێوه له وڵاتی ئێمه ده‌رکه‌ون و برۆن
ئەردۆغان خۆیی کوردستانی داگیر کردوە داوا لە گەلی کورد دەکات وەلاتەکەیان بە جی بەهێلن جا برۆن بۆ وەلاتی سەهەم ئەم قسە قورانە
دوو پارتی کوردی رۆژهه‌ڵات باس له‌تێکۆشانی هاوبه‌ش ده‌که‌ن ــ I ــ
ـ ANF تایبەت / 01 2013
ناوه‌ندی هه‌واڵه‌کان - به ئامانجی روونکردنه‌وه‌ی هه‌ڵوێست و بۆچوونی هێزه کوردییه‌کانی رۆژهه‌ڵاتی کوردستان له‌مه‌ڕ یه‌کێتی نێوانیان و هه‌ڵوێستیان له‌مه‌ڕ دروستبوونی یه‌کێتی نه‌ته‌وه‌یی و هه‌روه‌ها تاووتوێکردنی کۆنفرانسی پراگ و هه‌ندێک مژاری تری گرنگ، عومه‌رى ئێلخانیزاده سکرتێرى گشتى کۆمه‌ڵه‌ى زحمه‌تکێشانى کوردستان و ئازاد ئه‌ورازئه‌ندامی کۆردیناسیۆنی پارتی ژیانی ئازادی کوردستان وه‌ڵامی چه‌ند پرسیارێکی ANF یان دایه‌وه. ..
له‌کاتێکدا که رۆژهه‌ڵاتی کوردستان جیا له پارچه‌کانی تری کوردستان له‌ژێر گوشارێکی توندی سیاسی و کۆمه‌ڵایه‌تی رژێمی کۆماری ئیسلامی ئێراندایه و کۆمه‌ڵگای کوردی خوازیاری دروستبوونی یه‌کێتی و یه‌کڕیزی هێزه‌کانێتی به‌تایبه‌تیش له‌و به‌شه‌ی وڵاتدا، به‌ڵام تا ئێستا ئه‌و یه‌کێتییه‌ی له‌ناو گه‌لدا هه‌یه، له‌ناو هێز و لایه‌نه سیاسییه‌کانی رۆژهه‌ڵاتی کوردستان و له چوارپارچه‌ی کوردستانیشدا دروست نه‌بووه. ئه‌مه‌ش له‌کاتێکدایه که رۆژهه‌ڵاتی ناوین له ره‌وشێکدایه که گرنگی یه‌کێتی نه‌ته‌وه‌یی کورد زه‌قتر ده‌کاته‌وه.
یه‌کێتی نه‌ته‌وه‌یی ئه‌رکی سه‌ره‌کی پارته کوردییه‌کانه
عومه‌رى ئێلخانیزاده سکرتێرى گشتى کۆمه‌ڵه‌ى زحمه‌تکێشانى کوردستان سه‌باره‌ت به پرسی یه‌کگرتنی ستراتیژی نێوان لایه‌نه سیاسییه‌کان و ئاماده‌بوونی پارته‌که‌ی له‌و مژاره‌دا ئاماژه‌ی به‌وه‌کرد که ئه‌وان ئاماده‌ن بۆ یه‌کێتی و یه‌کگرتنی نه‌ته‌وه‌ی و ده‌ستنیشانی کرد:" به‌ڵێ ئێمه ئه‌وه‌مان له مێژه وتووه و باسمانکردووه" و وتی:" ئێمه پێمان وایه گه‌لى کورد له ڕۆژهه‌ڵاتى کوردستان پێویستى به‌وه‌یه که ده‌بێت هه‌موو حزبه‌کانى له ژێر چه‌ترێکدا کۆببنه‌وه؛ مه‌سه‌له‌ى نه‌ته‌وه‌یی و مه‌سه‌له‌ى دیموکراسییه. به تایبه‌ت ئه‌وه له هه‌لومه‌رجى ئێستاى ڕۆژهه‌ڵاتى ناوه‌ڕاستدا پێویستیی بنه‌ڕه‌تییه. هه‌ربۆیه له جارانیش پێویستره ئه‌و کاره بکرێت. من پێم وایه هیچ خه‌باتێکى ڕزگاریخوازانه له جیهاندا به‌بێ بوونى کۆده‌نگى و هاوئاهه‌نگى حزب و لایه‌نه سیاسییه‌کان سه‌رنه‌که‌وتووه، به‌ڵێ ئێمه له مێژه بانگه‌وازى بۆده‌که‌ین و به پێویستى ده‌زانین. "
ئه‌ندامی کۆردیناسیۆنی پارتی ژیانی ئازادی کوردستان PJAK (ئازاد هه‌وراز) یش له‌و رووه‌وه ئاماژه به یه‌کگرتنى پارته‌کانى رۆژهه‌ڵات ده‌کات و سه‌باره‌ت به پرسیاری (ئایا جیا له یه‌کگرتن، له بنه‌مادا هه‌بوونى هه‌ندێک لایه‌ن زیانى نییه بۆ رۆژهه‌ڵات. له په‌یوه‌ندییه‌کانتاندا ره‌چاوى ئه‌م خاڵه ده‌که‌ن یان نا ؟) دا ئه‌وه‌ی خسته روو که " پێویسته وه‌کو نه‌ته‌وه‌ى کورد فێر ببین که هیچ کاتێک پره‌نسیپه نه‌ته‌وه‌ییه‌کان فیداى په‌یوه‌ندییه تاکتیکییه‌کان له‌گه‌ڵ ده‌ره‌وه نه‌که‌ین " و رایگه‌یاند:" پێویسته یه‌کێتی و یه‌کگرتن له هه‌موو پارچه‌کانى کوردستاندا پێکبێت ." و وتی:" له روانگه‌ى ئێمه‌وه جیاوازى بیروڕا، ده‌وڵه‌مه‌ندییه و نه‌ک ته‌نیا نابێته کۆسپێک له به‌رامبه‌ر یه‌کگرتن، به‌ڵکوو یارمه‌تیشمان ده‌دات. به‌ڵام راستییه‌کى حاشاهه‌ڵنه‌گر هه‌یه، ئه‌ویش بیروڕاى هه‌ندێک که‌س و لایه‌ن به هۆى پشت به‌ستن به هێزى ده‌رکى و چاوه‌ڕوانى رزگارى به ده‌ستى ئه‌و هێزه ده‌رکیانه، گه‌لى کورد بێ هێز ده‌بینن. ئه‌م تێڕوانینه ده‌بێته ئاسته‌نگ له به‌رامبه‌رى یه‌کگرتوویى نه‌ته‌وه‌یی. بێگومان له هه‌وڵدانه‌کانماندا بۆ ئه‌م مه‌به‌سته، ئه‌م بابه‌ته‌ی که باسمان لێوه کرد خالێکى گرنگه که له به‌رچاوى ده‌گرین، تا تێیان بگه‌یه‌نین که پێویسته وه‌کو نه‌ته‌وه‌ى کورد فێر ببین که هیچ کاتێک پره‌نسیپه نه‌ته‌وه‌ییه‌کان فیداى په‌یوه‌ندییه تاکتیکییه‌کان له‌گه‌ڵ ده‌ره‌وه نه‌که‌ین ."
جیا له یه‌کگرتنی نه‌ته‌وه‌یی له ئاستی هه‌ر چوارپارچه‌ی کوردستاندا، یه‌کێتی گه‌ل و پارته‌کانیش له هه‌ر پارچه‌یه‌کدا یه‌کێکه له مه‌رجه سه‌ره‌کییه‌کانی سه‌رکه‌وتنی گه‌لی کورد له‌م قۆناخه‌دا، ئه‌مه له‌کاتێکدایه که له میدیاکاندا یه‌کێتی پارته‌کانی رۆژهه‌ڵات له‌ئاستی رۆژه‌ڤی سه‌ره‌کیدایه، له‌و باره‌یه‌وه عومه‌ر ئیلخانیزاده ده‌ڵێت:" ئه‌گه‌ر حزب و لایه‌نه سیاسیه‌کانى ڕۆژهه‌ڵاتى کوردستان پێکه‌وه یه‌کگرتووبن، به پلانفۆڕمێک به‌ره‌یه‌ک پێکبهێنن، ئه‌وا خۆى له خۆیدا یه‌کێتییه‌کى نیشتیمانی یه‌کێتی نه‌ته‌وه‌ی دێته ئاراوه، که ئێمه هه‌مووکات به پێویستمان زانیوه و زۆر به پێویستیشى ده‌زانین."
سه‌باره‌ت به‌و پلاتفۆرمه‌ش که به‌پێویستی دروستکردنی به‌ره‌یه‌کی کوردی یاخود یه‌کێتی نه‌ته‌وه‌یی ده‌ستنیشان ده‌کرێت ئازاد ئه‌ورازسه‌باره‌ت به‌وه‌ی که هه‌موو حزبه‌کان ده‌ڵێن ئاماده‌ین به‌ڵام هیچ کردارێک نییه و یه‌کلاکردنه‌وه‌ی ئه‌و پرسه‌ی که هه‌ندێ لایه‌ن سیاسه‌ت به‌و گوتاره‌وه ده‌که‌ن، ئاراز ئه‌ورازوتی:"قۆناخێک که گه‌لى کورد تێیدایه، قۆناخێکى زۆر مێژووییه که ده‌توانێت چاره‌نووسى گه‌لى کورد دیار بکات. ئێمه، هه‌ستیار بوونى ئه‌م قۆناخه به ساڵانه دێنینه زمان و هه‌ربۆیه‌ش له سه‌ره‌تاوه هه‌وڵدانى خۆمانمان له‌و چوارچێوه‌دا کردووه و به‌رده‌وامیش ده‌بین. به‌ڵام پێویسته هه‌موو پارت، رێکخراوه و که‌سایه‌تییه سیاسى و رۆشنبیره‌کان، به له‌به‌رچاو گرتنى گرنگى و هه‌ستیارى ئه‌م قۆناخه، ده‌ست له به‌رژه‌وه‌ندى تاکه که‌سى و ته‌سکى حیزبایه‌تى هه‌ڵگرن و له چوارچێوه‌ى به‌رژه‌وه‌ندى نه‌ته‌وه‌ییدا هه‌نگاو بنێن. ئه‌مه به ته‌نیا له چوارچێوه‌ى گوتن و دروشمدا نابێت، ده‌بێت هه‌نگاوى کردارى بۆ هه‌ڵبگیردرێت. ئێمه له‌م چوارچێوه‌دا هه‌وڵدانمان له‌گه‌ڵ هه‌موو پارت و رێکخراوه و ته‌نانه‌ت که‌سایه‌تییه سیاسى و رۆشنبیره‌کاندا بۆ وه‌دیهاتنى یه‌کگرتوویى کردووه و به‌رده‌وامیشى ده‌بین . "
ئازاد وتیشی:" له راستیدا وایه که هه‌ندێک لایه‌ن له رواڵه‌تدا باس له یه‌کگرتوویى نه‌ته‌وه‌یى ده‌که‌ن، به‌ڵام له هه‌ناودا ئاماده نین بۆ یه‌کگرتوویى و به پێچه‌وانه‌وه چه‌ڵه‌مه‌ش له‌به‌ر پێى ئه‌و رێکخراوه و پارتانه داده‌نن که ده‌یانه‌وێت یه‌کێتى نه‌ته‌وه‌یى راسته‌قینه پێکبهێنن. چونکه یه‌کێتى نه‌ته‌وه‌یى له روانگه‌ى ئه‌وانه‌وه به‌رامبه‌ره له‌گه‌ڵ (سه‌ره‌تا به‌رژه‌وه‌ندى خۆم)، پاشان (پارته‌که‌م) و پاشانیش هه‌موو (شتێک به گوێره‌ى من)، له‌وێدا تاکه‌ره‌وییه‌کى قووڵ هه‌یه. به‌م زیهنییه‌ته‌وه یه‌کگرتوویى نه‌ته‌وه‌یى درووست نابێت."
" رێکه‌وتنی نێوان موهته‌دی و هیجری مانۆڕێکی سیاسییه "
گه‌ر بگه‌ڕێینه‌وه سه‌ر هۆکاری یه‌کنه‌گرتن یاخود لاوازی هزری دوورکه‌وتنه‌وه له هه‌ڵوێسته یه‌ک لایه‌نه و دوولایه‌نه‌کان ده‌بینین زۆرێک لایه‌ن و که‌سایه‌تى سیاسى واژۆکردنى ڕێکه‌وتننامه‌ى نێوان کۆمه‌ڵه‌ى شۆڕشگێڕى زه‌حمه‌تکێشانى کوردستانى ئێران و حزبى دیموکراتى کوردستانى ئێران به به‌فه‌رمی نه‌ناسینى حزبه‌کانى ترى ڕۆژهه‌ڵاتى کوردستان وه‌سف ده‌که‌ن له‌و باره‌یه‌وه عومه‌ر ئیلیخانیزاده وتی:" من له مێشکى ئه‌واندا نیم تابزانم حزبه‌کانى ترى ڕۆژهه‌ڵاتى کوردستان به‌ڕسمیه‌ت ده‌ناسن یان ناناسن، به‌ڵام ئه‌وه‌ى که هه‌یه، ئه‌وان هیچیان؛ نه کاک (عه‌بدولڵاى مۆهته‌دى) نوێنه‌رایه‌تى هه‌موو کۆمه‌ڵه‌کان ده‌کات و نه کاک (موسته‌فا هیجرى) نوێنه‌رایه‌تى هه‌موو دیموکراته‌کان ده‌کات، ئه‌وه ڕاستییه‌که، ئه‌وه‌ى که بۆ خۆیان وه‌ک دوو لایه‌ن پێکه‌وه بیانه‌وێت هاوکارى یه‌کترى بکه‌ن من هیوادارم هاوکارى یه‌کترى بکه‌ن و هاوکاریه‌کانیان سه‌ربگرێت، به‌ڵام من زیاتر ئه‌و ڕێکه‌وتننامه‌یه وه‌ک مانۆڕێکى سیاسى ده‌بینم. له ڕاستیدا ئه‌گه‌ر به جدى ئه‌و به‌ڕێزانه کاریان کردبا، ده‌بوو هه‌موومان کاربکه‌ین بۆ ئه‌وه‌ى هه‌موو حزبه‌کان کۆببینه‌وه و له‌سه‌ر بنه‌مایه‌ک ڕێکبکه‌وین."
ئیلیخانیزاده وتیشی:"ڕه‌خنه‌ى ئێمه ئه‌وه‌یه که رێکه‌وتنی (2ــ3) حزب نابێته چه‌شنێک ئه‌ڵته‌ڕناتیڤى هاوکارییه‌کى گشتى نه‌ته‌وه‌ى له کوردستانى ڕۆژهه‌ڵاتدا، ده‌نا هه‌ردوو لایه‌ن چۆن ڕێککه‌وتوون له‌سه‌ر چى ڕێکه‌وتون مباره‌کیان بێت، به‌ڵام به هیچ شێوه‌یه‌ک نوێنه‌رایه‌تى لایه‌نه‌کانى ترناکه‌ن و بۆ خۆشیان هه‌ر وایان نوسیوه که وه‌کو باڵێکى دیموکرات و باڵێکى کۆمه‌ڵه هه‌ستاون به‌و کاره. "
ناوبراو سه‌باره‌ت به فه‌رمی داننه‌نان به پارته‌که‌یان (کۆمه‌ڵه‌ی زه‌حمه‌تکێشانی کوردستان) له‌لایه‌ن (کۆمه‌ڵه‌ى شۆڕشگێڕى زه‌حمه‌تکێشانى کوردستانى ئێران)ه‌وه وتی:" ئه‌وه به ده‌لیلى ئه‌وه‌ى که خۆشیان به ڕه‌سمیه‌ت ناناسن، ڕه‌سمیه‌ت چییه ؟ کێ هه‌یه که ده‌بێت ڕه‌سمیه‌ت بدات به‌یه‌کێکى دیکه ؟ من ئه‌و بیرۆکه‌یه به بیرۆکێکى زۆر کۆن و پاوانخوازانه و دور له ڕاستى و دوور له زه‌مان و دور له دنیاى مۆدێرن ده‌زانم، من له‌م کوردستانه حزبێک ناناسم چوبێت داواى ڕه‌سمیه‌تى خۆى له حزبێکى دیکه کردبێت، تا کاک (عه‌بدولڵاى مۆهته‌دى) بوبێت به‌وه. کێیه ئه‌و شوێنه‌ى به کاک (عه‌بدولڵاى موهته‌دى) و کۆمه‌ڵه‌ى شۆڕشگێڕى زه‌حمه‌تکێشانى کوردستانى ئێران داوه. من پێم وایه ئه‌وه جه‌ماوه‌رى گه‌لى کوردستانه به‌ده‌نگى خۆیان جێی حزبه سیاسییه‌کان له نێو خۆیاندا ده‌که‌نه‌وه. به‌باوه‌ڕى من هه‌موو حزبێکیش بچوک و گه‌وره ڕه‌سمیتیان هه‌یه. ئه‌گه‌ریش ده‌سه‌ڵاتێک له ڕۆژهه‌ڵاتى کوردستان دروست بوو، ئه‌وکات له‌وانه‌یه حزبێک بچێت به‌فه‌رمى داواى مۆڵه‌ت ورگرتنى حزبه‌که‌ى له یاسا بکات، هه‌ر وه‌کو چۆن له باشورى کوردستان حزبه‌کان بۆ به‌ڕێوه‌بردنى کاروچالاکییه‌کانیان ده‌چن مۆڵه‌تى فه‌رمى له حکومه‌تى هه‌رێم وه‌رده‌گرن، ئه‌میش به‌و شێوه‌یه ده‌بێت. له هه‌موو وڵاتێکى دیموکراتی جیهانیشدا وایه، ئێمه نه ده‌زگایه‌کى وامان هه‌یه و نه هیچ که‌س هه‌یه به ئێمه‌شه‌وه یا هه‌ر به هه‌چ لایه‌نێکى دیکه‌شه‌وه، یه‌کمان ئه‌وى دیکه‌مان به‌ڕه‌سمى بناسێت یان نه‌ناسێت. "
پراگ باسی نه‌ته‌وه‌کانی ئێرانی نه‌کرد
له رۆژانی 17 ــ 18ی تشرینی دووه‌مدا سێه‌مین کۆنفرانسى " یه‌کگرتن له پێناوى دیموکراسیدا بۆ ئێران " له پراگ به به‌شدارى زیاتر له (١٢٠) که‌س له نوێنه‌رانى هه‌ندێک لایه‌ن و که‌سایه‌تییه سیاسییه‌کانى ئێران له‌سه‌ر کۆمه‌لێک باس کۆبوونه‌وه. به‌ڵام هه‌ندێک له پارته کوردییه‌کانی رۆژهه‌ڵاتی کوردستان و زۆربه‌ی رۆشنبیرانی کورد به‌هۆی باس نه‌کردنی نه‌ته‌وه‌ی کورد و نه‌ته‌وه‌کانی تره‌وه ره‌خنه‌یه‌کی زۆریان ئاراسته‌کردن و راشیانگه‌یاند که کۆنفرانسه‌که به ئامانجی په‌راوێزخستنی پرسی کورد بووه له رۆژهه‌ڵاتی کوردستان و ئێراندا، عومه‌ر ئیلیخانیزاده‌ش له‌روانگه‌ی خۆیه‌وه رۆشنایی ده‌خاته سه‌ر بابه‌ته‌که و وتی:" ئێمه هیچ نوێنه‌رێکمان نه ناردوه بۆ پراگ ئه‌وه‌نده‌ی من ئاگاداربم هیچ که‌سیش وه‌ک لایه‌نى سیاسى بۆ کۆنفرانسى پراگ به‌فه‌رمى بانگه‌هێشت نه‌کراوه، به‌ته‌نها هه‌ندێک که‌سایه‌تى و خه‌ڵک بانگه‌هێشت کراوه له نێو ئێمه‌شدا کاک (وریاى محه‌مه‌دى) که له ئه‌ڵمانیا داده‌نیشێت، له‌لایه‌ن هه‌ندێک که‌س و لایه‌نی تره‌وه بانگه‌هێشت کرابوو، دواتر کاک (عه‌بدولڵاى موهته‌دى) که خۆى یه‌کێک بوو له به‌ڕێوه‌به‌رانی کۆنفرانسه‌که و ئه‌رکدار به بانگه‌هێشتکردنى میوانه‌کانى کۆنفرانسى پراگ، ناڕه‌زایى خۆى نیشاندابوو و به هاوڕێیانى وتبوو (ئه‌گه‌ر وریا محه‌مه‌دى به‌ژدارى پراگ بکات ئه‌وا ئێمه به‌ژدارى ناکه‌ین) ده‌نا به‌داخه‌وه له کۆنفرانسى پراگدا ئه‌سڵه‌ن وه‌ک لایه‌نى سیاسى به‌ژدار نه‌بووین. ئه‌وه هه‌ڵه‌یه که بچن له‌گه‌ڵ ژماریه‌ک ئێرانى و له‌گه‌ڵ ژماریه‌ک ده‌ڵاڵى سیاسى و ته‌نانه‌ت که‌سانێکى به‌دناو ده‌ستى چه‌نده‌مى ئیسڵاحخوازانى ئیسلامى له کۆنفرانسێکدا پێکه‌وه وه‌کو لایه‌نێکی کورد دانیشێت و قبوڵى ئه‌وه‌ش بکات حزبه کوردییه‌کان که به نێوى حزب ڕاسته بۆ خۆیان ده‌ڵێن (ئه‌وه ڕاگه‌یاندنى حزبى دیموکراتى کوردستان، ئه‌وه ڕاگه‌یاندنى حزبى دیموکراتى کوردستانى ئێران) به‌ڵام جیا له‌وه‌ش ئه‌و کۆنفرانسانه بۆ به نهێنى به‌ڕێوه‌ده‌چن بۆ به‌شێکى زۆرى ئۆپۆزسیۆنى ئێرانى به‌ژدارى تێدا ناکات؟. کاریشم به‌وه نیه ئۆپۆزیسیۆنى ئێرانى کێن و چه‌ندن و بۆ خۆى چه‌نده به‌ر بڵاوه، ئه‌گه‌ر گرفت له نێو ئۆپۆزسیۆنى کوردى ڕۆژهه‌ڵاتى کوردستاندا هه‌یه، ئه‌و گرفته به سه‌د ئه‌وه‌نده له نێو ئۆپۆزسیۆنى ئێرانیشدا هه‌یه، بۆ ده‌بێت ئۆپۆزسیۆنى ئێرانى بانگهێشتى ئۆپۆزسیۆنى کوردى ڕۆژهه‌ڵات بکات بۆ شوێنێک. "
هه‌روه‌ها وتیشی:"مه‌سه‌له‌یه‌کى تریش له‌و کۆنفرانسه‌دا که گرنگه له پێشدا براوه‌ته‌وه که ده‌بێت باسى ڕوخانى ڕژێمى کۆمارى ئیسلامى نه‌کرێت باس له مافى یه‌کسانى ژن و پیاو و کرێکارو زه‌حمه‌تکێش نه‌کرێت، هه‌روه‌ها باس له یه‌کسانی نه‌ته‌وه‌کانى نێو ئێران و مافى نه‌ته‌وایه‌تى تێدا نه‌کرێت، چونکه ئه‌گه‌ر ئه‌و مه‌سه‌لانه باسکران، مه‌سه‌له‌ى دیکه‌ش دێته پێشه‌وه بۆ ده‌بێت ئێمه‌ى کورد ئه‌و مه‌رجانه قه‌بوڵ بکات و به‌و شێوه‌یه بچینه پێشوازى دیالۆگ، من دیالۆگم قبوڵه و دیالۆگ له‌گه‌ڵ ئه‌و ئێرانیانه ده‌که‌م ئاماده‌بن ئه‌و مێژووه هاوبه‌شه که گه‌لى کورد هه‌یه‌تى له‌گه‌ڵ باقى نه‌ته‌وه‌کانى ترى ئێرانى دانى پێدابنێن و به‌ڕه‌سمیه‌ت بیناسن. دیالۆگ شه‌رته‌که‌ى ئه‌وه نیه من ناسنامه‌ى خۆم بشارمه‌وه دواتر بێم دیالۆگ له‌گه‌ڵ که‌سى به‌رامبه‌ر بکه‌م له هه‌رسێ کۆنفرانسه‌کانى ستۆکهلۆم و برۆکسل و پراگدا خاڵێکى هاوبه‌شه‌ى تێدایه که نابێت باس له ڕۆخانى ڕژێمى کۆمارى ئیسلامى بکرێت ئه‌ى باشه ئێمه به‌ته‌ماى چین له ئێراندا ئێرانى داهاتوو ده‌بێت چیبێت؟ "
ژماره‌یه‌کى زۆر له رۆشنبیر و سیاسه‌تمه‌دار و هه‌ندێک لایه‌نى کوردى به‌تایبه‌تى رۆژهه‌ڵاتى کوردستان ره‌خنه‌یان له ئاراسته و چه‌مکى کۆنفرانسى هه‌بوو، هه‌ندێک لایه‌ن بانگه‌شه‌ى ئه‌وه ده‌که‌ن که ده‌ستى ده‌ره‌کى له‌پشت ئه‌و کۆنفرانسه‌وه هه‌بووه و هه‌ندێکى تر ئه‌م بانگه‌شه‌یه به بێ بنه‌ما له‌قه‌ڵه‌م ده‌ده‌ن، ئازاد ئه‌ورازئه‌و بانگه‌شانه یه‌کلاده‌کاته‌وه و ده‌ڵێت:" ئه‌و کۆنفرانسه له کاتێکدا درووست بوو که گۆڕانکارى و ئالۆزییه‌کان له هه‌رێمه‌که، رۆژ له دواى رۆژ قووڵتر ده‌بێته‌وه. که‌ش و هه‌واى سیاسى هه‌رێم و ده‌ستێوه‌ردانى ده‌ره‌کى بۆ ئاڵوگۆڕ له هه‌رێمه‌که و به تایبه‌ت له سوریا و به ئه‌گه‌ری زۆریش دوابه‌دواى سوریا له ئێران، کاریگه‌رییه‌کى راسته‌وخۆى له‌سه‌ر بیرۆکه‌ى سازدانى ئه‌و کونفرانسه هه‌بووه. به‌ڵام ناوه‌ڕۆکى ئه‌و کونفرانسه نیشانیدا که دروشمى ئه‌و کۆبوونه‌وه نه ته‌نیا له‌گه‌ڵ کرده‌وه‌کانى یه‌کتر ناگرێته‌وه، به‌ڵکو له‌گه‌ڵ سه‌ره‌تایى و سه‌ره‌کیترین پێوانه‌کانى دیموکراسیدا ناکۆکى جدییان هه‌یه. بۆ وێنه هه‌رچه‌ند باسیان له ئه‌تنیسیته‌کان ده‌کرد، به‌ڵام له‌و کۆنفرانسه‌دا نوێنه‌ر گه‌لان و پێکهاته کۆمه‌ڵایه‌تیانى ئێرانى به‌شدار نه‌بوون. هه‌ندێک که‌سیش نه‌ک له‌سه‌ر ناوى نه‌ته‌وه و حزبێک، به‌ڵکو وه‌کو که‌سایه‌تى له‌و کۆبوونه‌وه‌دا به‌شدارییان کردبوو. ته‌نانه‌ت نوێنه‌رى هه‌ندێک له گه‌لانى ئێران، ده‌رفه‌تى بیروڕا ده‌ربڕینیان پێنه‌درا. "
ئازاد وتیشی:" هه‌روه‌ها پێویسته ئاماژه به‌وه بکه‌ین که ئه‌و کۆنفرانسه له ئوپۆزسیۆنى راسته‌قینه‌ى گه‌لانى ئێران درووست نه‌بووه. پێشتریش ئاماژه‌مان پێکرد که ئه‌و کونفرانسه له راستى پێکهاته کۆمه‌ڵایه‌تییه‌کانى ئێران و ئاستى تێکۆشانى گه‌لان دووره و نه‌یانتوانیوه به دیدێکى واقیعبینانه ره‌چاوی ئه‌و گۆڕانکارییانه‌ى هه‌رێمه‌که بکات. بۆیه نه‌یتوانیوه و ناتوانێت وه‌ڵامده‌رى ویست و داخوازى هه‌موو گه‌لانى ئێران بێت. "
پراگ بانگه‌شه‌بوو بۆ یه‌کگرتنی ئۆپۆزسیۆنی ئێران نه‌ک کورد
عومه‌ر ئیلیخانیزاده پرسیاری (هێزى پارتى کوردى بانگه‌شه‌ى یه‌کگرتنى ئۆپۆزسیۆنى ئێرانیان کرد، بۆچى بانگه‌شه‌ى یه‌کێتى کوردیان نه‌کرد)ی هه‌ڵسه‌نگاند و وتی:"ده‌رده‌که‌ى ئه‌وه‌یه به قه‌وڵى مه‌سه‌لێکى فارسى هه‌یه ده‌ڵێت (ده‌رکه‌وتنی هه‌تاو به‌ڵگه‌یه بۆ هه‌بوونی) کاتێک گه‌لى کورد سه‌ره‌ڕاى بونى ئه‌و هه‌موو مێژووه‌ى به‌هه‌موو به‌شه‌کانى کوردستانه‌وه که ده‌ریخستوه تا وه‌کوو ئێستا نه‌مانتوانیوه هه‌رگیز یه‌کگرتووییه‌کى ته‌واومان هه‌بێت له‌گه‌ڵ لایه‌نێکى دیکه ئه‌گه‌ر کورد خۆى یه‌کگرتوو نه‌بوبێت ئێمه ده‌توانین له‌گه‌ڵ به‌شێکى کوردستان هاوپه‌یمانى و نزیکیمان ببێت، له‌گه‌ڵ بونى بیروڕاو بۆچونى جیاوازى سیاسى حزبه کوردییه‌کان له‌هه‌ر پارچه‌یه‌کى کوردستان که نزیکن له‌یه‌ک به جۆرێک هاوئاهه‌نگییان هه‌یه له‌گه‌ڵ یه‌کترى، من ناڵیم شتى خراپیش ڕوى نه‌داوه، ڕویداوه به‌ڵام به‌هه‌موو ئه‌وانه‌وشه‌وه نیشانده‌دات که‌تۆ ده‌توانیت له‌گه‌ڵ بزوتنه‌وه‌ى کورد، له‌گه‌ڵ به‌شه‌کانى کوردستان په‌یوه‌ندیت هه‌بێت. به‌ڵام به‌داخه‌وه په‌یوه‌ندییه‌کانی نێوان لایه‌نه‌سیاسییه کوردییه‌کان کاتین، که‌م ده‌بینم لایه‌نى دیموکراسیخواز لایه‌نى پێشکه‌وتنخواز داکۆکى له مافه‌ڕه‌واکانى گه‌لى کورد بکات، نه‌ک لایه‌ن. که‌م که‌س هه‌یه ئه‌و که‌سانه ده‌گمه‌نن داکۆکى له مافى کورد بکات، بۆیه ئێمه کاتێک ده‌توانین له‌گه‌ڵ باقى نه‌ته‌وه ژێر ده‌سته‌کانى ترى ئێران نزیک بینوو هاوپه‌یمانیمان هه‌بێت، پێشوه‌خت ده‌بێت ئێمه‌ى کورد له نێوان خۆماندا هاوپه‌یمان بین. "
هه‌روه‌ها عومه‌رى ئێلخانیزاده سکرتێرى گشتى کۆمه‌ڵه‌ى زحمه‌تکێشانى کوردستان سه‌باره‌ت به پرسی ( ئایا ئێوه وه‌کو پارتییه‌ک خۆتان گۆڕى ؟ ده‌تانه‌وێت به چى شێوازێک به‌گه‌ڕێنه‌وه ناو گۆڕه‌پانى سیاسى رۆژهه‌ڵاتى کوردستان به‌تایبه‌تى له ئایینده‌دا ؟ ) وتی:" ئێمه کاتێک ڕۆشتینه نێو حزبى کۆمۆنێستى کرێکارى سیاسه‌تێکى زۆر هه‌ڵه بوو دوا به‌دواى ئه‌وه‌ش بانگه‌شه‌ى سه‌ربه‌خۆ بونه‌وه و بوژاندنه‌وه‌ى کۆمه‌ڵه‌مان کرده‌وه، من پێم وایه ئه‌وه هه‌ر به‌رده‌وامه، پێشم وایه هێشتا ڕه‌وتى کۆمه‌ڵه کارى تێدا ده‌کرێت. به بڕواى من با کۆمه‌ڵه به دوو لایه‌ن و سێ لایه‌نیشى هه‌رکامه‌یان به ناوێک کار بکه‌ن به‌ڵام ئه‌وه ڕاستیه‌که کۆمه‌ڵه حزبێکى خاوه‌ن مێژوو و خاوه‌ن شوێنه‌وارى سیاسییه له ڕۆژهه‌ڵاتى کوردستان ئێمه له‌هه‌وڵى ئه‌وه‌داین کار ده‌که‌ین بۆ کۆمه‌ڵه‌یىکى گه‌وره و له‌هه‌وڵه‌کانماندا به‌رده‌وامین له‌هه‌مانکاتیشدا جێگاى داخه زۆر لایه‌نیش هه‌ن به‌ناوى کۆمه‌ڵه‌وه سیاسه‌تى نادروست کارى پێده‌که‌ن و په‌یڕه‌وى ده‌که‌ن، به‌ڵام ئێمه ئه‌و سیاسته نادروسته که به‌ناوى کۆمه‌ڵه‌وه په‌یڕه‌وى ده‌که‌ن مه‌حکومى ده‌که‌ین و دژى ڕاده‌وه‌ستین، کاریشى بۆ ده‌که‌ین ئاره‌زوو ده‌که‌م ڕۆژێک دابێت ده‌ستمان بگاته‌وه نێو خاکى خۆمان ئه‌وکات ده‌رده‌که‌وێت به سه‌دان کادرى کارامان هه‌ن. ڕه‌نگه ئێستا نه‌توانن چالاکى بکه‌ن به‌ڵام ئه‌وکاتى چالاکیان ده‌بێت و کارده‌که‌ن با ئه‌وه‌شتان پێڕابگێنم؛ ئێمه به سه‌دان که‌سى تێکۆشه‌رى ناسراو مان هه‌یه، کاتێک ده‌رکه‌وتن وتیان ئێمه کۆمه‌ڵه‌ى زه‌حمه‌تکێشانین، ئه‌و کات جه‌ماوه‌ر خۆیان شوێنیان ده‌که‌ون، هه‌ربۆیه سیاسه‌تى ئێمه ئه‌وه یه ده‌بێت ڕه‌وشه‌که هێور بکه‌ینه‌وه له‌گه‌ڵ لایه‌نه‌کانى دیکه‌ى کۆمه‌ڵه جۆرێک هاوئاهه‌نگ و هاوکار بین بۆ دوا ڕۆژ."
له به‌شی دووه‌می بابه‌ته‌که‌شدا عومه‌رى ئێلخانیزاده سکرتێرى گشتى کۆمه‌ڵه‌ى زحمه‌تکێشانى کوردستان و ئازاد ئه‌ورازئه‌ندامی کۆردیناسیۆنی پارتی ژیانی ئازادی کوردستان PJAK مه‌سه‌له‌ی پراگ، ره‌وشی سیاسی ناوچه‌که و به‌تایبه‌تی ئێران، په‌یوه‌ندی نێوان لایه‌نه‌کان و هه‌ندێک گوتاری دژ به PJAK تاووتوێ ده‌که‌ن...
.jpg)
.jpeg)
هیچ نظری موجود نیست:
ارسال یک نظر