کاک هیوا بۆتیمار لە زیندان ئازاد کرا پێرۆزە بێت لە بنەمالەکی

کاک هیوا بۆتیمار لە زیندان ئازاد کرا پێرۆزە بێت لە بنەمالەکی

هیوا بووتیمار: پێشتریش خۆم بە ئازاد زانیوە 

NNSROJ: هیوا بووتیمار چالاكی مەدەنی ‌و ژینگەپارێزی کورد، پاش ٦ ساڵ زیندان، ئێوارەی ئەمڕۆ ئازاد كرا و پاشان لە لایەن جەماوەرێكی زۆر لەخەڵكی مەریوانەوە پێشوازیی لێكرا‌.

سەرچاوەیەكی نزیك لەبنەماڵەی "هیوا بووتیمار" بە ئێن ئێن ئێس رۆژی راگەیاند کە ناوبراو ئێوارەی ئەمڕۆ چوارشەممە[٢١-١١-٢٠١٢]، لەزیندان ئازاد كرا و لە لایەن ژمارەیەكی بەرچاو لە خەڵكی شارەکەی پێشوازیی لێكرا‌و. دوابەدوای ئەمەش، پۆل پۆل هاووڵاتییان ‌و چالاكانی مەدەنی بەمەبەستی پیرۆزباییكردن، سەردانی ناوبراو و بنەماڵەکەیان کردووە.

ئەو سەرچاوەیە راشیگەیاند کە هیوا جەختی لە سەر ئەوە كردوەتەوە کە "پێشتر خۆی بە ئازاد زانیوە" ‌و هیوای ئازادی بۆ زیندانیان و گشت گەلی‌ كورد خواستووە ‌و بە  خوێندنەوەی ئەو شێعرانەی كە لەزینداندا نوسیوینی، سپاسی ئەو هاوڵاتییانەی كردوە‌و کە پێشوازییان لێکردووە.

هیوا بووتیمار چالاكی مەدەنی ‌و ژینگەپارێزی کورد لە ٢٣-١٢-٢٠٠٦ زایینی و لە كاتی سەرقاڵبوون بە كارەكانییەوە لە لایەن هێزە ئەمنیەكانی حكومەتی ئێرانەوە قۆڵبەستکرا. ناوبراو دواتریش لە ١٨-٠٧-٢٠٠٧، لە لایەن دادگای شۆڕشی مەریوانەوە بە تۆمەتی موحاربە (شەڕ لە دژی خوا) سزای لەسێدارەدانی بەسەردا سەپێنرا.

هیوا بووتیمار، لەدژی ئەو سزایە هاوڕێ‌ لەگەڵ "عەدنان حەسەنپور"، رۆژنامەنووسی بەندکراوی کورد، مانی لە خواردن گرت و چالاکییەکەیان لە ئاستی نێوخۆیی‌ و نێودەوڵەتیشدا كاردانەوەی بەرفراوان و سزاکەیان ناڕەزایەتی توندی لێکەوتەوە. هاوکات هەڵمەتێکی نێودەوڵەتیش بۆ هەڵوەشاندنەوەی سزای لەسێدارەدان‌ و ئازادكردنی ئەو دوو گیراوە کوردە رێكخرا.

هەڵمەتی ئاماژەپێکراو سەرنج و پشتیوانی هەژمارێكی زۆر لە رێكخراوە نێودەوڵەتیەكانی پارێزڤانی مافی مرۆڤ‌ و بەرپرسانی رۆژئاوای بە لای خۆی راکێشا و سەرئەنجام لەئەنجامدا بەهۆی پێداگری ئەو گیراوە کوردانە و گوشارە نێودەوڵەتی و نێوخۆییەكان سزاکە هەڵوەشایەوە‌و دواتریش لە دادگای پێداچوونەوەدا، سزاکە بۆ ٩ ساڵ زیندان كەمكرایەوە و سەرئەنجام ناوبراو، پاش تێپەڕبوونی ٦ ساڵ، ئەمڕۆ چوارشەممە ئازادکرا.

هیوا بووتیمار یەكێك لە دامەزرێنەرانی "ئەنجومەنی سەوزی چیا"ی مەریوان بوو کە لە ساڵی ٢٠٠٢ی زایینی دامەزرا. ناوبراو بەدرێژایی ٥ ساڵ تا كاتی قۆڵبەست و زیندانی کرانی، بەشێوەیەكی چالاكانە بەشداریی هەڵمەتەكانی نەمان ناشتن ‌و پاككردنەوەی ژینگەی مەریوان ‌و گۆلی زرێبار و سەیرانگاكان و هاوکات كوژانەوەی ئاگری نێو دارستان و لەوەڕگەكانی ئەو شارەی كردبوو.