Ariel Time
شەڕ: وەکو پلانێکی ستراتێژی نەتەوەیی
ن: سەید برایم حسەینی
(ئەندامی ئەنجومەنی سەرکردایەتی لیبراڵ)
ساڵانێکی زۆرە کورد لە ناوچەکەدا باس لە ئاشتی و پلانی شارستانییانە بە مەبەستی ستاندنەوەی مافەکانی دەکات و بە بەردەوامیش بەر هێرش و پەلامار دەکەوێت.
لە کۆتاییەکانی سەدەی بیستەمەوە - بێجگە لە باکووری کوردستان و هاوپەیمانەکانی پ.ک.ک - وازمان لە شەڕی چەکداری هێناوە و بە مەبەستی چارەسەرکردنی ئاشتییانەی دۆسیەکەمان پالمان بە هێزە داگیرکارەکانەوە ناوە، لە ناو قوتوویەکی شووشەییدا زیندانیمان بکەن و جارجارەش بە مەبەستی ترساندن و بچووککردنەوەمان سەری گورگەکەمان لە سووچێکەوە پێ پیشان بدەن و گوێ بە داواکانیشمان- کە ئاگربەست و ئاشتی و دانانی چەکیشی تێدا بوە – نەگرن و هێرش بۆ سەر ئێمەی خۆ – چەککردوو بکەن.
ئۆپێراسیۆن لە دژی نەتەوەی کورد بەردەوامە
ئۆپێراسیۆن لە دژی نەتەوەی کورد- لە هەر چوار لاوە - بەردەوامە و كوردهیچ پلانێكی یەكگرتووانەی پێ نییە. هێشتا هێزی پارچەكان وەك بەرژەوەندیی پارچەیی سەیری دۆسیەی كورد دەكەن و ئەم شێوە بیركردنەوەیەش وایكردووە تەنانەت لە ناو هێزەكانی پارچەیەكیشدا بەرانبەر بە دوژمن پیلانێكی یەكگرتووانە نەبینرێت.
لە دوای شەڕی یەكەمی جیهانییەوە دەوڵەتانی داگیركاری كوردستان بە بەردەوامی پیلانی هاوبەشیان بۆ سەركوتی جووڵانەوەی رزگاریخوازی گەلی كورد هەبووە.
ئێرانی پاشایەتیی پەهلەوی و كۆماری ئیسلامی هەردەم خەریكی خنكاندنی كورد بوون و لە بەرانبەر دۆزی كورددا بریارەكانیان بە گۆڕینی رژێمەكانیش نەگۆڕیوە.
رژێمەكانی پاشایەتی و كۆماری و بەعسی عێراقیش لە هەركاتێكدا كە كورد لاوازیی نواندبێت, كەڵكیان لە دەرفەت گرتووە و توانیویانە هێرش بكەنە سەر كوردستان و ماڵ و گیانی خەڵكەكەمان بە تاڵان ببەن و ئەگەریش سست و لاواز بووبن, هێندێك لە هەڵوێستەكانیان پاشەكشەیان كردوە و دانیان بە بوونی كورددا ناوە.
بەڵام كابینە یەك لەدوای یەكەكانی كۆماری توركیا كە بە چەندین كوودەتا و هەڵبژاردن هاتوونەتە سەركار, ئێستاشی لەگەڵ بێت, بە هەبوونی حیزبی رێگەپێدراوی وەك (دەتەپە) ش كە بۆ وەدیهێنانی مافەكانی كورد خەباتی سیاسی و مەدەنی دەكات, هێشتا ئامادە نین دان بە (نەتەوەبوون) ی كورد و مافە دەستووری و ئینسانییەكانیدا بنێن.
دەسەڵاتی پاشایەتی و كۆماری سووریاش هیچكات ئامادە نەبووە, بوونی كورد وەك نەتەوە و شوناسێكی جودا لە عەرەب و نەتەوەكانی دیكە بە فەرمی بناسێت و ئەم سیاسەتە بووە هۆكاری ئەوەی لە كوردانی رۆژئاوا رێژەیەكی زۆریان بێناسنامە بكرێن.
ئەوەی كە لە هەڵوێست و بەڕێوەبردنی یاساكانی ئەم وڵاتانەدا بەردەوام بینراوە و رەچاو دەكرێت, پێشێلكردنی مافەكانی كورد بە شێوەیەكی سیستەماتیكە و نەوەی دوای خۆیشیان كە بە ناوی جیاجیاوە دەیانەوێ رابردووی ناحەزی خۆیان بسڕنەوە, هەر بە هەمان رێچكە و رێباز معامەلە لەگەڵ كورد دەكەن, چونكا "بەچكەی گورگ هەر دەبێتەوە بە گورگ!"
لە باكووری كوردستان بێجگە لە "بەدەپە" كە پارتێكی كوردستانییە, هەموو حیزبەكان دەنگیان لە پارلماندا بۆ ئەوەدا كە ئۆپێراسیۆنەكان لە دژی خەباتی كورد لە چیاكان بۆ ساڵێك درێژ بكرێتەوە و ئەمەش بەو مانایە دێت كە ئەمساڵیش كورد رووی ئاسایش و سەقامگیری لە نیشتمانەكەیدا لە باكوور, بە خۆیەوە نابینێ .
لە باشووری كوردستانیش كە هێزە كوردییەكان توانیویانە لە هەموو روویەكەوە لە هێزە عێراقییەكان پێش بكەون, هێزەكانی ئۆپێراسیۆنی "دیجلە"یان دامەزراند, بۆ ئەوە بە بەردەوامی كورد لە باشووریش هەست بە ئارامی و ئاسوودەیی نەكات و داوای مافە دەستوورییە جێبەجێ نەكراوەكانیشی نەكات. با ئەوەش بوەستێ كە دەوڵەتی مالیكی خەریكە هەموو جۆرە چەكێكی قورس كە لە شاخ و شار و بیاباندا كاری پێبكرێت, لە وڵاتانی بەرئاوەڵا و نابەرپرسیاری وەكو رووسیا دەكڕێت, كە هەرگیز بە قازانجی پاراستنی مافەكانی مرۆڤ لەم گەردوونەدا دەنگێكی ئەرێنیی نەداوە.
لە رۆژئاوای کوردستانیش کە نزیکەی ٢ ساڵە کوشتنی کورد وێڕای هاوڵاتییانی سووری بەردەوامە و هیچ فریادرەسێکیشان نیە و بە ئاشکرا هێزە جیهانییەکانیش پشتگوێیان دەخەن.
ئێرانیش لەم ئاڵۆزییانەی ناوچەکە کەڵکی خۆی وەرگرتوە و بە هیچ شێوەیەک نایەوێ ملکەچی بریارەکانی نەتەوەیەکگرتوەکان و مافپارێزانی جیهانی بێت و بە بەردەوامی كوردی هەر لە سنوورەكانەوە تاكو زیندانەکان قەڵاچۆ کردوە و لە ٣٤ ساڵی رابردوودا دەیان هێڕشی گەورەی بۆسەر کورستان رێکخستوە و کوشتنی هاوڵاتییانی کوردستانی بۆ هێزەکانی خۆی بە جیهاد وەسف کردوە!
دواچارەسەری:
شەڕی بەردەوام لە دژی داگیرکار دوایین چارەسەریی ئێمەیە و دەبێ ئاگر لە دڵی دوژمن بەر بدەین.
کورد نابێ بیر لەوە بکاتەوە، ئەگەر شەڕ نەکات قازانج دەکات و ئەگەریش شەڕ بکات، لەمە زیاتر زەرەرمەند دەبێت. دەبێ سوپای یەکگرتووی کوردستان پێکهاتوو لە هێزی شەڕکەرو مافپارێزی لایەنەکان دروست بکەین کە هێرش بۆ سەر دەستدرێژییەکانی ئەوان و پێگەکانیان بکەن.
ئێمە دەبێ تەنیا بیر لە بەرژەوەندییەکی تەسکی حیزبییانە و پارچەیی نەکەینەوە و هێزەکانمان وەها بە بیرێکی کوردستانییەوە تەیار بکەین کە جوولەکە-ئاسا لە هەموو شوێنی ئەم دنیایە پارێزگاری لە مافەکانی کورد بکەن.
دوایین دەرفەتی ئێمە لەم سەدەیەدا هاتوەتەئاراوە و لەم دابەشکارییە تازە جیهانییەشدا نابێ بێبەش بکرێین.
دەبێ ناوەندێکی گەورەی پلاندانانی کوردی دابمەزرێنین کە هێزی پارچەکان لە خۆیدا کۆبکاتەوە و ئەمەش بە لەخۆبوردوویی و هەستێکی نەتەوەییانەی بەرفرەتر لە جارانمانەوە دەکرێت، چونکا دوژمن حەسێبی پارچەیەکی لەسەر ئێمە کردوە و دەیەوێ بە لەتکراوی بمانهێڵێتەوە و ئێمەش تا ئەم رێکەوتە حەزمان لە دابڕان و بەژەوەندیی بچووک بووە و هێزە گەورەکەی خۆمان بە فیڕۆ داوە کە لە نەبوونی یەکێتیی هێزەکانی کورددا بە ئەم کارە خۆبەخۆ جێبەجێ بوە و پلانی دابڕاندنی ئێمە لە یەکتر – کە پلانێکی قووڵی دوژمنانی کورد بوە – تا ئێستاش بوونی هەیە و کاری پێدەکرێت.
هیچ نظری موجود نیست:
ارسال یک نظر