دوای سێ مانگ لە چەشتنی ئازاری سووتان ژنێك ژیانی لەدەستدا

دوای سێ مانگ لە چەشتنی ئازاری سووتان ژنێك ژیانی لەدەستدا

وارڤین – شنگال: (گۆری شەمۆ قاسم)، تەمەن (25 ساڵ)، دوای (90 رۆژ) لە چەشتنی ئازاری سووتان، دوێنێ شەممە لە نەخۆشخانەیەكی دهۆك ژیانی لەدەستدا.

(گۆری شەمۆ قاسم)، سێ مانگ بەر لە ئێستا لە ماڵی خۆیاندا، لە كۆمەڵگەی (بورك) هەڵكەوتوو لە خۆرهەڵاتی شارەدێی (سنوون)ی سنووری‌ شنگال، خۆی سووتاندبوو، دوای گواستنەوەی بۆ نەخۆشخانە لە شاری دهۆك خرابوویە ژێر چاودێری پزیشكییەوە.

دوێنێ شەممە (13 / نیسان – ئەپریل / 2013)، ئەو ژنە، لەبەر كاریگەری برینەكانی جەستەی بەرگەی مانەوەی لە ژیان نەگرت و بەو هۆیەوە ژیانی لەدەستدا.

تا ئێستا نازانرێت، ئایا پۆلیس كەسی بەو هۆیەوە دەستگیر كردووە، یان حاڵەتەكە بە قەزا و قەدەر دانراوە.

پۆلیس لە بارەی ئیفادەی ژنەكەوە هیچ شتێكی نەخستووەتەڕوو.

بە گوێرەی زانیاری (وارڤین)، ئەو ژنە چووەتە ناو ژیانی هاوسەرگیرییەوە و دایكی دوو منداڵە.

--------------------

خانەقین: بەهۆی ئەشكەنجەدانەوە ژنێك گەیەندرایە نەخۆشخانە

وارڤین – خانەقین: ژنێكی دانیشتووی خانەقین، لە لایەن برایەكییەوە بە شێوەیەكی نامرۆڤانە ئەشكەنجە دەدرێت و دوای ئەوەی بەسەختی برینداری دەكات، ژنەكە دەگوازرێتەوە بۆ نەخۆشخانە.

لە لێدوانێكی تایبەت بۆ (وارڤین)، سەرچاوەیەك لە نەخۆشخانەی خانەقین، رایگەیند، كاتژمێر (9:00)ی شەوی پێنجشەممە - هەینی (11 – 12 / نیسان – ئەپریل / 2013)، (ب.م.و) دایكی چوار منداڵ، لە لایەن برایەكییەوە بە توندی ئەشكەنجە دراوه‌ و روومەت و دەموچاوی خوێناوی كردووە و بەو هۆیەوە گواستراوەتەوە بۆ نەخۆشخانە.

ئەو سەرچاوەیە گوتی: "مامەكانی (ب.)، ئەویان گەیاندووەتە نەخۆشخانە و سكاڵایان لەسەر برازاكەیان تۆمار كردووە".

تا ئێستا هۆكاری ئەو تاوانە نەزانراوە و پۆلیس پەڕاوی بۆ كردووەتەوە و لێكۆڵینەوە دەستیپێكردووە.

----------------------

پیاوێك بە دەمانچە تەقە لە هاوسەرەكەی دەكات

وارڤین – رانيه: لە گەڕەكی ئاسۆسی شارەدێی سەنگەسەر، پیاوێك بە دەمانچە تەقەی لە هاوسەرەكەی كرد و بە سەختی برینداریكرد و تا ئامادەكرددنی ئەم هەواڵە، رەوشی تەندروستی ژنەكە لە مەترسیدایە.

تاوانەكە ئێوارەی رۆژی پێنجشەممە (11 / نیسان – ئەپریل / 2013) روویداوە و تا ئێستا هۆكارەكەی نەزانراوە.

بە گوێرەی زانیارییەكانی (وارڤین)، ئەو ژنە ناوی (س.)ەو بەهۆی سەختی برینەكەیەوە لە نەخۆشخانەی فریاكەوتنی رانیەوە بە پەلە رەوانەی سلێمانی كراوە.

دوای ئەنجامدانی تاوانەكە، هاوسەری ژنەكە رایكردووە و تا ئێستا دەستگیر نەكراوە و پۆلیس پەڕاوی بۆ تاوانەكە كردووەتەوە و دادوەر فرمانی گرتنی تۆمەتباری سەرەكی تاوانەكەی دەركردووە.

------------------------------

دێگەڵە: تەرمی ژنێك دۆزرایەوە و گولە نراوە بە سەرییەوە

وارڤین – دێگەڵە: لە درێژەی ئەو تاوانانەی بە چەك بەرامبەر بە ژنان ئەنجامدەدرێن، پێشنیوەڕۆی ئەمڕۆ تەرمی ژنێك لە نزیك شارەدێی دێگەڵەی سەر بە شارۆچكەی كۆیە دۆزرایەوە، كە فیشەكێك نراوە بە سەرییەوە.

لە لێدوانێكی تایبەت بۆ (وارڤین)، بەڕێوبەری بەرەنگاربوونەوە توندوتیژی دژ بە ژنان لە هەولێر رائید (ژیلەمۆ عەبدولقادر) رایگەیاند، تەرمی ئەو ژنە كاتژمێر (11:00)ی پێش نیوەڕۆی ئەمڕۆ چوارشەممە (10 / نیسان – ئەپریل / 2013) لە نزیك گوندی (ئەشكەوت سەقا)ی سەر بە شارەدێی (شۆڕش – دێگەڵە) دۆزراوەتەوە.

گوتیشی: "ژنەكە جلوبەرگی كوردی لەبەردایە و بە مەزندە تەمەنی نزیكەی (30 ساڵ)ە به چەك كوژراوە و فیشەكێك نراوە بە سەرییەوە".

هەروەها گوتی: "تەرمەكە نەناسراوەتەوە و هیچ بەڵگەنامە و ناسنامەیەكی لەگەڵدا نیە و بە مەبەستی پشكنین و توێكاری گەیەندراوەتە پزيشكى دادوه‌رى هەولێر".

روونیشیكردەوە، ئەو تاوانە وادەیەكی زۆری بەسەردا تێپەڕی نەكردووە و كاتێك پۆلیس گەیشتووەتە شوێنی تاوانەكە، هێشتا خوێنی ژنەكە نەگیرساوە".

تاوانی كوشتنی ئەم ژنە لە كاتێكدایە كە هەر ئەمڕۆ لە شارۆچكەی زاخۆ، كارمەندێكی سەر بە وەزارەتی ناوخۆی حكومەتی هەرێمی كوردستان بە دەمانچەیەك كە مۆڵەتی رەسمی بۆی وەرگرتووە، دایكە تەمەن (54 ساڵ)یەكەی خۆی كوشت.

---

ئا: ئه‌رسه‌لان ره‌حمان.

--------------------

تریفە عەزیز:خۆسووتاندن و خۆ رووتكردنەوە هەردووكیان ناڕەزایەتی دەربڕینن

وارڤین – هەولێر: رێكخراوەكانی ژنان لە ئەوروپا، رۆژی چواری نیسانیان وەك رۆژی شۆڕشی خۆداماڵین لە بەرگی كلتوور راگەیاند و لە چەندین وڵاتی جیهان وەك پشتیوانی لە كچێكی تونسی چالاكی فڕێدانی بەرگی كلتووریان ئەنجامدا و ژنە چالاكێكی كوردیش دەڵێت: "به ‌راستی كورد، ئاشنا نیە بە جەستەی خۆی، چونكە لەژێر فشاری ئاین و كۆمەڵگەو كلتوردا ئەتلێتەوەو بەشەرمی دەزانێت، ئافرەت شەرم و حەیا تكاندن هەمووی لە جەستەی خۆیدا چڕ كردووەتەوە، بۆیە سوتاندنەكەی پێ باشترە، لە دەرخستنی جەستەی".

شۆڕشی داماڵینی بەرگی كلتوور، لەو كاتەوە دەستیپێكرد، كە (ئامینە تیلەر)ی تەمەن (19 ساڵ)ی تونسی، لە تۆڕی كۆمەڵایەتی فەیسبووك، وێنەی جەستەی رووتی خۆی بڵاوكردەوە و لەسەری نووسی، "جەستەم موڵكی خۆمە".

بەرامبەر بەو كارە، مەلایەكی تونسی فەتوای كوشتنی (ئامینە)ی دەركرد. ئەمەش وای لە رێكخراوەكانی ژنان لە وڵاتانی ئەوروپا كرد، وەك پشتیوانییەك بۆ ئەو ژنە، رۆژی (4 / نیسان – ئەپریل / 2013)، هەڵمەتێكی فراوانی داماڵینی بەرگی كلتووری باو ئەنجام بدەن و سینگیان رووت بكەن.

بە گوێرەی ئەو وتارەی (ئیسماعیل حەمە ئەمین)، لە ژێر ناونیشانی (رەخنەی گاڵـتەجاڕی فێمینستی) لە رۆژنامەی كوردستانی نوێی رۆژی (3 / نیسان – ئەپریل / 2013) بڵاویكردووەتەوە، پێشینەی ئەم شۆرشە دەگەڕێتەوە بۆ كۆتایی دەیەی شەستەكانی سەدەی رابردوو.

لە وتارەكەیدا هاتووە، ئەو كاتەی زانكۆی فرانكفۆرت لە (22ی ئەپڕیلی ساڵی 1969، رووداوێك روودەدات، كە دواتر فەیلەسوفی ئەڵمانی (پیتەر سڵۆتێردایك) لەكتێبی (رەخنەی ئەقڵی گاڵتەجاڕی) لەچەند شوێنێكدا ئاماژەی پێدەدات، ئەویش هێرشی چەند كیژە خوێندكارێك بوو بۆ سەر فەیلەسوفی گرنگی قوتابخانەی فرانكفۆرت (تیۆدۆرئادۆرنۆ)، ئەمە لەكاتێكدابوو كە(ئادۆرنۆ) لەودیوو پۆدیۆمەكەیەوە خۆی بۆ وانەیەكی دیكەی فەلسەفی ئامادەدەكرد، لەپڕێكدا خوێندكاران دەوری پۆدیۆمی پڕۆفیسۆرەكەیان دەدەن و سێ كیژ لەبەرامبەری رادەوەستن، چاكەتەكانیان دەكەنەوە مەمكەڕووتەكانیان نیشانی ئادۆرنۆ دەدەن. بێگومان ئەم چالاكیە دژی دونیای باوكە بەئەخلاق و پڕۆفیسۆرەكانی زانكۆبوو،.

هەروەها هاتووە: "ئەو هەوڵە، خەباتی مێینەكان بوو بەنیشاندانی گۆشتی مێینە بەم ئاشكراو هاوارەوە تەنها بۆ ئەوەنەبوو وێنەیەكی ئیرۆتیكی بخوڵقێنن، یاخود بەدڕەوشتیەك نیشانبدەن، بەڵكو جۆرێك بوو لەپڕۆتێستكردن".

سەبارەت بە شۆڕشی داماڵینی بەرگی كلتوور، لە لێدوانێكی تایبەت بۆ (وارڤین)، چالاكی ژنی كورد لە دەرەوەی وڵات (تریفە عەزیز) رایگەیاند، ئژستاش بەهەمان شژوە ئەوەی، كە روودەدات هەر پرۆتێستە، ناڕەزاییە بەوەی، كە ژن خاوەنی لەشی خۆی و بیری خۆی و كرداری خۆیەتی بۆ ژن بە موڵكی پیاو دابنرێت. 

گوتیشی: "ئەوە شەریعەت و ئاینە ئازادی لە ژن سەندووەتەوە لە كۆمەڵگای ئیسلامیدا، كە خاوەنی خۆیان بن، كە دەڵێن خۆمان خاوەنی لەشی خۆمانین، ئێمە شەرەفی ئێوە نین. ئەوە ئازادی ژنە پارێزگاری لێ دەكات بە چوونەوە بەگژ سیستەمی ستەمكاری پیاو، كە لە چوارچێوەی ئایندا ژن دەكوژن بەناوی شەرەفەوە".

(تریفە عەزیز)، گوتیشی: "ئازادیەك بوونی نیە، كە شەرع بێتو لەسەر جەستەی ژن وێنەی شەرەف بكێشێ ئەم خانمانەی ئەم پرۆتێستە دەكەن نەهاتوون داوای ئەوە بكەن لەش بفرۆشن ئەمە پەیامی ئەم خانمانە نیە ئەمانە دەچنەوە بەگژ كلتورێكدا كە ئیسلام هاتووە سەپاندویەتی بەسەری ژندا".

ئەو ژنە چالاكە لە وەڵامی پرسیاری (ئایا ئەو جۆرە ناڕەزایەتییە، كە ئێستا بە شێوەیەكی بەرچاو دەبینرێت دەكرێت وەك شۆڕشێك بناسرێت، یان وەك جووڵانەوەیەكی كۆمەڵایەتی قسەی لەسەر بكرێت؟) گوتی: "پێموایە ئەمە شۆڕشە و شۆڕشێكی زۆر جەریئانەیه،‌ كە ژنی رۆژهەڵاتی بوێر نین و بگرە زۆریش ترسنۆكین، كە خاوەنی كردارێكی لەم جۆرە بین".

(تریفە) روونیكردەوە، بەهۆكاری ئەوەی كە ئەو تۆقاندن و فتوا دەركردن و بەردبارانكردنەی لە وڵاتە ئیسلامیەكاندا هەیە وایكردوە ژن توانای دەنگهەڵبڕینی نەبێت، یان زۆر بە تاك و تەرا ببینرێت، وەك ماوەی پیشوو بینیمان. 

لە بارەی گرتنە بەری شێوازی كیژانی فرانكۆرت، لە لایەن ژنانی كوردەوە دژی ئەو كوشتن و چەوساندنەوەیەی لەسەر ژنان هەیە، لەم هەرێمەدا و دەربڕینی ناڕەزایەتی بەرامبەر بە فەتوای مەلاكانی نزیك بە دەسەڵاتی سیاسی و خودی بەرپرسانی باڵای هەرێم، ئەو ژنە چالاكەی كورد گوتی: "بەڕاستی كورد، جارێ ئاشنا نیە بە جەستەی خۆی، خۆی ناتوانێت جەسورانە باس لە جەستەی خۆی بكات، چونكە لەژێر فشاری ئاین و كۆمەڵگەو كلتووردا ئەتلێتەوه ‌و بەشەرمی دەزانێت".

(تریفە) لە درێژەی وەڵامەكەیدا ئەوەشی باسكرد، "ژنی كورد ئەوەندەی خۆی دەسوتێنێت؛ ناتوانێت هۆكاری كێشەكەی بسوتێنێت، یان بەگژیدا بچێتەوە، شەرم و حەیا تكاندن هەمووی لە جەستەی خۆیدا چڕ كردووەتەوه،‌ بۆیە تا ئەم ساتە سوتاندنەكەی پێ باشترە لە دەرخستنی جەستەی".

ئەوەشی گوت: "لەبارێكدا، كە ژن جەستەی خۆی دەسوتێنێت، كە رۆحی خۆی دەسوتێنێت كەس نایەتە دەنگ لە كۆمەڵگەدا، بەڵكو پێیان شەرمە خۆشیان، بكەنە خاوەنی ئەو ژنە‌ سوتاوە، بەڵام لە كاتێكدا خۆی رووتبكاتەوە هەموو كۆمەڵگا بەرامبەری دەوەستنەوە و دەیانەوێت بە زیندویی رۆحی لێ وەربگرنەوە بە بەرد‌بارانكردن، كە هەردووكیشی (سوتاندن و رووتكردنەوە) ناڕەزایی دەربڕینە لەو ناهەقی و ناڕەواییەی بەرامبەری دەكرێت".

(وارڤین) بۆ وەرگرتنی بۆچوونی زیاتر لە بارەی ئەم پرسەوە، پەیوەندیكرد، بە ژمارەیەك چالاكی ژنی كورد لە هەولێر و سلێمانی، بەڵام، بە پاساوی هەبوونی رێگەی دیكەی ناڕەزایەتی دەربڕین، داماڵینی بەرگی كلتووریان بە "كارێكی ناشیاو" وەسفكرد.

ژنە چالاكێكیش كە پێی خۆش نەبوو، ناوی بهێنرێت، گوتی: "من لەگەڵ ئەوە نیم جەستە بەكاربهێنرێت بۆ داواكردنی ماف و ئازادی و ئەم كارە زیاتر كارێكی هونەرییه و مەرج نیە ببێتە مۆدیلێك بۆ دەربڕینی ناڕەزایەتی".
http://warvin.org