بە بونەی وەستانی سێ دڵی پر لە هیوای کورد لە فەرانسە

بە بونەی وەستانی سێ دڵی پر لە هیوای کورد لە فەرانسە

شەختە گول ناژاکێنێ !!

حەمەی شاسواری

بە فەرمودەی نەمر ماموستا هێمن ، باغەوانە پیرە . بەلێی باغەوانە پێرە کاتێ غەمخور بێت و لە داهات و ژیان و حەیاتی خۆی بیر بکاتەوە و لە لایەکی دی حەز و ئاواتی جوانی لا مەبەست بێت ، شەختە ناتوانێ گول بژاکێنێ . کوردستانی پیرۆز ، خاک و زێدی کوردان گولی رازاوەی جیهان رۆژ نییە شەختەی دڵ رەق و زالم پەلاماری نەدا و لە هه‌ولی ژاکانی دا نەبێ و لە هه‌مان کات باغەوانی لە خەو کەوتو وەئاگا نەیت !!

گورانی هه‌ر نەتەوەیەک پێوەندی بە لایەن گەلێکی جیاوازەوە هه‌یە کە سەرەکی ترینی ، زانست و پێشکەوتنی گەلە ، بەتایبەتی پێوەندی بە رێبەرایەتی یا خۆد لایەنی سیاسی ئەو نەتەوەیەوە هه‌یە کە تا چ رادەیەک بەرژەوەندی گەل لە سەروی هه‌مو فکرە و پلانێکەوە دا دەنێن و چەندە بایەخ بە خستنە گەری هه‌ست و داخوازی گشتی گەل بۆ بەشداری و پالپشتی هه‌مەلایەنەی ئەو نەتەوەیە دەدەن .

گەلو هێشتا برینی شیناوی خوێنی لێی دەتکێ ، هێشتا رولەی کورد بە چیاکانی کوردستان کە گیانیان بەخت کردوە نەنێژراون ، هێشتا چالەقوتەکانی داگیرکەران گەنجانی کوردی تێی ئەخایەنرێت ، هێشتا جینو ساید و ئەنفال و هه‌زاران مەینەتی دیکە قورسایی لە سەر پەیکەری کورد هاویشتوە و بۆ چەندەمین جار لە ناو دڵی ئوروپای خۆ بە ئالا هه‌لگری ئازادی و داکوکی کاری ماڤی مرۆڤ . ٣ خاتونی کورد ، ٣ گولی کوردستان ژاکان !!! ئایا دەبێ باغەوانە پیرەی کورد مشوری چارەسەری کورد بێی ؟ یا خۆد بە تەمای دەستی دەرکی و بێگانە ؟ ئایا لاوانەوە و پێدا هه‌لگوتن و پرسە و سەرەخۆشی ولام دەرەی بەرگری لە قاتوقری کوردە یان وە خۆ هاتنەوە ؟ ئایا خوێنی کە لە باشور دەرژێ ، سەرکردیەک کە لە باکور لە قەفەس دا دەبێت ، کۆمەلکوژێک کە بە دەسی عەرەب دەکرێ یاخۆد لە سێدارەدانی هیوای دوا روژی گەل بە دەس حکومەتی ئێرانی بەردەوامە ، لێک جویە ؟؟

ئەوەی کە بۆ راپەرینی جەماوەری هه‌ر گەلێت پێویستە و دەبێ کاری بۆ بکرێ ، بەشداری هه‌مەلایەنەیە . ئەم بابەتە لە ناو نەتەوەی کورد بەرچاوە و هه‌ستی نەتەوایەتی و نیشتمانی لە خوێن و لەشی گەل دایە ، ئەوەی کە پێویستە و دەبێ بە ویژدانەوە ئاوری لێی بدرێتەوە و داوای سەرەکی گەلە و تاکە ئەلترناتیڤی رزگاری کوردە ، یەک ریزی و تەبایی نێوان چین و توێژەکانی کوردستانە کە بە داخەوە فکرەی چەوت بەرگری لەو یەک ریزی و یەک مالیە دەکات . لایەنی سیاسی کورد دەبێ ولامدەری ئەم هه‌مو نەکسە و خوێن رژانە بێت . داکوکی و بەرگری و پاراستن بە هێزی گەل بە ئەنجام ئەگات ، نەک بە تەنی یەک یان دوو لایەن ، نوێنەرایەتی گەل بە سەرجەم لاینەکان کە بونیان هه‌یە و حاشا یان لێی ناکرێ دەکرێ ، نەک بە یەک یان دوو لایەن . ئایا حاشا لەم واقعە دڵسوزی گەل و نیشتمانە ؟ ئایا رێگەدان بە دەستی دەرەکی و لێک هه‌ل بەزانەوە ، خۆشەویستی خاک و وڵاتە ؟ ئایا بەم شێوازەی کە لە ناوماندا باوە وەک بێی رێزی کردن ، خۆ بە دەسەلاتدار زانین ، پاراستنی بەرژەوەندی حیزبیە یان خاک و نیشتمان و ..... بەم شێوازە نازانستیانە نا راستەو خۆ ئامانجی دوژمنانی کوردمان گەشەدار نەکردوە ؟؟ وە نەبوینتە بەردەئاشەکە بۆ هارینی کودستان ؟؟ تاکەی خوێنی کورد برژێ و لایەنی سیاسی هه‌ست بە بەرپرسیارەتی نەکات ؟؟؟ هه‌ست بە پەرپرسیارەتی پرسە و سەرخوشی و لاوانەوە نییە ، پێیدا هه‌لگوتن و بلاو کردنەوەی هه‌وال نییە ، بەلکو خۆ فیدا کردنی گەل و نیشتمانە و لە پێناوی خزمەت و رزگاری گەل ، زوانی زبر و بێی رێزی و لێک هه‌لپشانەوە وەک نەریت و یاسا بە خەتی سوور زانینە . یەک ریزی مالی کوردە و قەبول کردنی یەکە . رادەستی دەسەلاتە بە یەک و پەروەردە و خستنەگەری چینی نوێیە بۆ ئەم مەبەستە . ئاوردانەوەیە لە داواکاری گەل . کۆکرنەوەی هه‌مو فکرەیەکی سیاسیە لە ژێر چەتری بەرەی نیشتمانی . دوێنی کۆمەل کوژی کرا ، ئەنفال کرا ، کیمیای کرا ، ئیعدام و راوەدوونان کرا ، تیرور و رەشەکوژی کرا ، دڵسوزانی گەل بە پۆل بەند کرا ، چ ماوە کە نەکرا بێی و نەکرێ ؟؟ ئایا دیسان لەوە تێناگەین گەل وە رێبەرایەتی گەل دەبێ چ بکا و بە کامە چەک بەرانبەری داگیرکەران بێتەوە ؟؟ بە چ چەکێک دەتوانی بەرگری و داکوکی بکا ؟؟

ولامی ئەم پرسیارانە ئاراستەی ویژدانی گشتی ئەکەم و ولامی هه‌ر یەکە لە لایەنی سیاسی پێوەندی بە رادەی دڵسوزیەوەیەتی بە گەل و نیشتمانە . من جیا لە دەربرینی غەم و پەژارەم ، جیا لەوەی لە ناو چونی ئەم سێ ژنە ، ئەم سێ قارەمانە ، ئەم سێ گولەی کوردستانە برینی دی لە جەرگم دا هیچم بۆ نایەت بیلێم و هیوام بە گەنجی کوردە وەخۆ بێن و خۆ لە رێگەی چەوت کە هه‌مان یەکتر قەبول نەکردنە دوورە پەرێز بن و با ئاوا شەختە گولی وڵات نەژاکێنێ .

یاد و ناوی ئەم سێ ژنە قارەمانە و سەرجەم نەمرانی کورد و کوردستان بەرز و بەرێز بێت

بژی یەک ریزی مالی کورد لە بەرەی نیشتمانی دا

حەمەی شاسواری

12 - 01 - 2013